Ibyo u Rwanda rwatumije mu mahanga byatwaye miliyari 1,909.8 Frw

  • NTAWITONDA JEAN CLAUDE
  • Nzeri 23, 2022
  • Hashize imyaka 2
Image

Mu mezi atandatu ashize, u Rwanda rwishyuye ibyatumijwe mu mahanga akayabo k’amadolari y’Amerika miliyari 1.8, ni ukuvuga miliyari zisaga 1,909.8 z’amafaranga y’u Rwanda nk’uko byagarutsweho mu mibare mishya ya Banki Nkuru y’u Rwanda (BNR).

Iyo mibare yatangajwe ku wa Kane taliki ya 22 Nzeri 2022, mu gikorwa cyo kugaragaza umucyo w’uko ubukungu bwari buhagaze mu mezi atandatu abanziriza umwaka wa 2022, hanagaragazwa muri rusange uko Politiki y’Igihugu y’Ifaranga ihagaze kugeza ubu..

Umuyobozi Mukuru wa BNR John Rwangombwa, yavuze ko ingano y’agaciro k’ibyishyuwe ku byo u Rwanda rwatumije mu mahanga yiyongereye ku kigero cya 22.5% ugereranyije n’amezi atandatu ya mbere y’umwaka wa 2021, kuko icyo ghe  Rwanda rwishyuye miliyari 1.4 z’amadolari y’Amerika miliyari zisaga 1,485.4 z’amafaranga y’u Rwanda.

Agaciro k’ibicuruzwa biciriritse byinjijwe mu gihugu nk’ibyatunganyirijwe mu nganda, ibikoresho by’ubwubatsi ndetse n’inyongeramusaruro byiyongereyeho 28.9% bigera ku gaciro ka miliyoni 510.2 z’amadolari y’Amerika zivuye kuri miliyoni 395.8.

Ingufu n’amavuta yiganjemo ibikomoka kuri peteroli byongereye igiciro cyabyo ku kigero cya 99.2% bitewe n’ubwiyongere bw’igiciro cyabyo ku isoko mpuzamahanga.

Ibyo byose ngo byatumye icyuho kiri hagati y’ibitumizwa n’ibyoherezwa mu mahanga kigera ku kigero cya 13.7% aho cyageze kuri miliyari 1.1 z’amadolari y’Amerika kivuye kuri miliyoni 978.7 z’amadolari mu mezi atandatu ya mbere y’umwaka ushize.

Yavuze ko ku rundi ruhande, muri ayo mezi u Rwanda rwabonye ubwiyongere bw’ayinjizwa n’ibyoherezwa mu mahanga aho bwageze kuri 37.2%, ni ukuvuga akaba yarageze kuri miliyoni 708.3 z’amadolari y’Amerika (miliyari 751,5 z’amafaranga y’u Rwanda)  avuye kuri miliyoni 516.2 z’amadolari y’Amerika yabonetse mu mezi atandatu y’umwaka wabanjirije uyu.

Ibyo ngo byatewe n’uko habayeho izamuka ry’ibiciro ku isoko mpuzamahanga ndetse n’amabuye y’agaciro akaba yarakomeje kongera agaciro, bikajyana n’uko n’ingano y’ibyohrejwe mu mahanga yarushijeho kwiyongera.

Ibisanzwe byoherezwa mu mahanga nk’amabuye y’agaciro, ikawa, icyayi, ibireti, n’impu, byinjirije u Rwanda amadolari y’Amerika asaga miliyoni 182.9, na yo akaba yariyongereyeho 39.4% ugereranyije na miliyoni 13.2 z’amadolari zabonetse mu mezi atandatu y’umwaka ushize.

Amadovize yinjijwe na Gasegereti yiyongereyeho 101.5%, coltan yiyongera ku kigero cya 54.1 na wolfram yiyongera kuri 66.5%. Ibidasanzwe byiherejwe mu mahanga birimo ibyakorewe mu nganda , indabo, imboga n’imbuto byongereye ayo byinjije ku kigero cya 25.2% agera kuri miliyoni 152 z’amadolari y’Amerika bivuye kuri miliyoni 121.4 z’amadolari y’Amerika.

Ubuyobozi bwa BNR bwatangaje kandi ko izamuka ry’ibiciro rikabije mu Rwanda ridashingiye gusa ku bibazo by’ubukungu ku Isi, kuko no mu Rwanda habayeho ikibazo cy’umusaruo muke mu rwego rw’ubuhinzi.

Bugaragaza kandi ko ubukungu bw’u Rwanda bwazamutse neza mu gice cya mbere cy’uyu mwaka nubwo umuvuduko wo kuzahuka k’ubukungu muri icyo gihe wagabanyutse ugereranyije no mu mwaka ushize ubwo hatangiraga gufatwa ingamba zo guhangana n’ingaruka za COVID-19.

Ku bijyanye n’ikoranabuhanga mu kwishyurana, BNR igaragaza ko agaciro k’ibikorwa byo guhererekanya amafaranga hifashishijwe ikoranabuhanga ugereranije n’umusaruro mbumbe kazamutse ku gipimo kirenga 111.4% kugeza muri Kamena uyu mwaka ugereranyije n’izamuka rya 95.5% mu gihe nk’iki umwaka ushize.

Ibi bitandukanye n’umuvuduko w’ubwitabire mu kurikoresha wari uhari mbere ya COVID-19, kuko nko mu mwaka wa 2019 muri Kamena agaciro k’ibyo bikorwa ku musaruro mbumbe kari kuri 36.4%.

Ikindi cyagarutsweho ni uko, abasaba inguzanyo mu bigo by’imari bagabanyutse ugereranyije n’uko byari bihagaze mu mezi atandatu abanziriza umwaka ushize, aho kuri ubu hagabanyutseho miliyari 45 z’amafaranga y’u Rwanda ugereranyijwe na miliyari 631 z’amafaranga y’u Rwanda zagurijwe abakiliya icyo gihe.

  • NTAWITONDA JEAN CLAUDE
  • Nzeri 23, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE