Ibyemezo by’Inama y’Abaminisitiri yo ku wa 08 Nzeri 2022

  • Imvaho Nshya
  • Nzeri 8, 2022
  • Hashize imyaka 2
Image

Ku wa Kane, taliki ya 8 Nzeri 2022, Inama y’Abaminisitiri yateraniye muri Village Urugwiro iyobowe na Nyakubahwa Perezida wa Repubulika y’u Rwanda, Paul Kagame.

1. Inama y’Abaminisitiri yemeje imyanzuro y’Inama y’Abaminisitiri yateranye ku wa 29 Nyakanga 2022.

2. Inama y’Abaminisitiri yongeye gusuzuma ingamba zafashwe zo gukumira ikwirakwira ry’Icyorezo cya COVID-19.

Ingamba zisanzweho zizakomeza gukurikizwa, kandi zizongera kuvugururwa mu gihe cy’ukwezi kumwe hashingiwe ku isesengura ry’Inzego z’Ubuzima.

3. Inama y’Abaminisitiri yagejejweho ibi bikurikira:

• Imyiteguro y’Igihembwe cy’Ihinga 2023A.

• Imyiteguro y’itangira ry’Umwaka w’Amashuri 2022/2023.

• Gahunda yo guteza imbere imikino, abaturiye amashuri n’Inzego za Leta bakagira uburyo bakoresha ibikorwaremezo by’imikino by’ayo mashuri.

4. Inama y’Abaminisitiri yemeje imishinga y’amategeko ikurikira:

• Umushinga w’itegeko ryemera kwemeza burundu Amasezerano hagati ya Guverinoma y’u Rwanda na Guverinoma ya Luxembourg ajyanye no gutwara abantu n’ibintu mu kirere.

• Umushinga w’itegeko ryemera kwemeza burundu Amasezerano ajyanye no gutwara abantu n’ibintu mu kirere, hagati ya Guverinoma y’u Rwanda na Guverinoma ya Hongiriya.

• Umushinga w’itegeko ryemera kwemeza burundu Amasezerano yo kohererezanya abakurikiranyweho ibyaha hagati ya Repubulika y’u Rwanda na Repubulika ya Angola.

• Umushinga w’itegeko ryemera kwemeza burundu Amasezerano y’ubufatanye mu by’amategeko mu rwego mpanabyaha hagati ya Repubulika y’u Rwanda na Repubulika y’Angola.

• Umushinga w’itegeko ryemera kwemeza burundu Amasezerano yo kohererezanya abakurikiranyweho ibyaha hagati ya Repubulika y’u Rwanda na Repubulika ya Mozambique.

• Umushinga w’itegeko ryemera kwemeza burundu Amasezerano y’ubufatanye mu by’amategeko mu rwego mpanabyaha hagati ya Repubulika y’u Rwanda na Repubulika ya Mozambique.

• Umushinga w’itegeko rigena imikoreshereze y’ingingo z’umuntu n’uturemangingo.

5. Inama y’Abaminisitiri yemeje Amateka akurikira:

• Iteka rya Minisitiri w’Intebe rigena intego, inshingano n’imbonerahamwe y’imyanya y’imirimo bya Minisiteri ishinzwe Ishoramari rya Leta. • Iteka rya Minisitiri ryemeza ifungurwa ry’agateganyo.

6. Inama y’Abaminisitiri yemeje Politiki n’ingamba zikurikira:

• Politiki y’ikurikiranacyaha (Criminal Justice Policy).

• Politiki yo gukemura ibibazo mu bwumvikane bitanyuze mu nkiko (Alternative Dispute Resolution Policy).

• Amasezerano hagati ya Guverinoma y’u Rwanda na Sosiyeti yitwa CCI Rwanda Limited ku ishyirwaho ry’ikigo gishinzwe gufasha mu byerekeye guhererekanya ibicuruzwa.

7. Inama y’Abaminisitiri yemeje ko aba bakurikira bahagararira ibihugu n’Imiryango Mpuzamahanga mu Rwanda:

Ba Ambasaderi/High Commissioners

Madamu Luisa Maria Machado Da Palma Fragoso, Ambasaderi wa Portugal mu Rwanda, afite icyicaro i Addis Ababa muri Etiyopiya.

Bwana William Alexander McDonald, High Commissioner wa Barbados mu Rwanda, afite icyicaro i Nayirobi muri Kenya.

Bwana Amadou Hassane Mai Dawa, Ambasaderi wa Niger mu Rwanda, afite icyicaro i Addis Ababa muri Etiyopiya.

Bwana Ebrahim Mahmood Ahmed Abdulla, Ambasaderi w’Ubwami bwa Bahrain mu Rwanda, afite icyicaro muri Tuniziya.

Uhagarariye Umurvango Mpuzamahanga

Madamu Hind Hassan Abdalgalil, Uhagarariye mu Rwanda Ishami ry’Umuryango w’Abibumbye rishinzwe kurwanya SIDA (UNAIDS). Uhagarariye inyungu z’Igihugu (Honorary Consuls) 

Dr. Subira Manzi, Uhagarariye inyungu z’Ubwami bwa Eswatini mu Rwanda.

8. Mu bindi:

• Minisitiri w’Ubuhinzi n’Ubworozi yamenyesheje Inama y’Abaminisitiri ko guhera ku itariki ya 6 kugeza ku ya 9 Nzeri 2022, mu Rwanda harimo kubera Inama y’Ihuriro Mpuzamahanga ku Iterambere ry’Ubuhinzi muri Afurika (AGRF 2022 Summit).

Minisitiri w’Ubumwe bw’Abanyarwanda n’Inshingano Mboneragihugu yamenyesheje Inama y’Abaminisitiri ibi bikurikira:

• Itorero ry’Abatoza b’Inkomezamihigo riri kubera i Nkumba (mu Karere ka Burera) kuva ku itariki ya 5 kugeza ku ya 11 Nzeri 2022. Itorero ry’Inkomezamihigo 2022 rizabera mu Karere ka Huye kuva ku itariki ya 16 kugeza ku ya 24 Nzeri 2022.

• Ku itariki ya 11 Nzeri 2022 hateganyijwe igikorwa cyo gutaha ku mugaragaro Ubusitani bw’Urwibutso buherereye ku Rwibutso rwa Nyanza ya Kicukiro.

• Inama mpuzamahanga ku bushakashatsi bwakozwe kuri Jenoside yakorewe Abatutsi iteganyijwe ku buryo bukurikira: icyiciro cya mbere cy’iyo nama kizabera mu Rwanda kuva ku itariki ya 11 kugeza ku ya 19 Nzeri 2022; naho icyiciro cya kabiri kizabera i Paris mu mwaka wa 2023.

• Minisitiri w’Ubucuruzi n’Inganda yamenyesheje Inama y’Abaminisitiri ko kuva ku itariki ya 09 Nzeri 2022 kugeza muri Gashyantare 2023, mu Gihugu hose hazakorwa ubukangurambaga bwo kumenyekanisha Amasezerano ashyiraho Isoko Rusange rya Afurika (AfCFTA).

• Minisitiri w’Ibikorwaremezo yamenyesheje Inama y’Abaminisitiri ko Inama yiga ku itwara ry’abantu n’ibintu mu ndege ku mugabane wa Afurika izabera i Kigali kuva ku itariki ya 12 kugeza ku ya 13 Nzeri 2022.

• Minisitiri w’Imari n’Igenamigambi yamenyesheje Inama y’Abaminisitiri ko ku itariki ya 11 Ukwakira 2022 hazizihizwa isabukuru y’imyaka 20 hatangijwe ukwezi kw’ibikorwa byahariwe gushimira Abasora.

Bikorewe i Kigali, ku wa 08 Nzeri 2022.

Dr. Edouard Ngirente Minisitiri w’Intebe

  • Imvaho Nshya
  • Nzeri 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE