Ibitaro bya Gahini bivura Amaso bizuzura bitwaye miliyoni 900 Frw

  • Imvaho Nshya
  • Nyakanga 25, 2023
  • Hashize amezi 10
Image

Ibitaro bya Gahini bivura amaso, ni ishami ry’Ibitaro bya Gahini biherereye mu Karere ka Kayonza ryitezweho korohereza abarwayi b’amaso bo mu Ntara y’Iburasirazuba byasabaga gusiragira mu ngendo bagiye gushaka serivisi mu Bitaro bya Kabgayi bivura amaso mu Ntara y’Amajyepfo.

Umushinga wo kubaka Ibitaro bya Gahini bivura amaso watangijwe mu Cyumweru gishize, bikaba byitezwe ko iryo shami rizuzura ritwaye amafaranga y’u Rwanda agera kuri miliyoni 900.

Ibyo bitaro bije gukemura ikibazo cy’abarwayi benshi batabonaga serivisi z’ubuvuzi bw’amaso, bitewe n’uko ahatangirwahga serivisi mu bitaro hari hato cyane, bigatuma na serivisi zahatangirwaga ziba nke cyane ugereranyije n’izikenewe.

Abarwayi bivuza amaso mu Ntara y’Iburasirazuba bitezweho kuruhuka ingendo bakoraga berekeza ku Bitaro bya Kabgayi biherereye mu Karere ka Muhanga, Intara y’Amajyepfo.

Ku wa 20 Nyakanga 2023, abayobozi batandukanye bashyize ibuye ry’ifatizo ahatangiye kubakwa ibyo bitaro bivura amaso bigiye no kugabanyiriza umutwaro ibya Kabgayi bivura amaso.

Dr. Gisagara Egide, Muganga w’Amaso mu Bitaro bya Gahini, yavuze ko iyo nyubako izaba igeretse Kabiri, ikazaba ifite ubushobozi bwo kwakira abarwayi barenga 26,000 ku mwaka.

Yavuze ko Ibyo bitaro bije kuziba icyuho kikiri kinini cyane, aho usanga umubare w’abarwayi ku muganga w’amaso ukiri munini cyane.

Yagize ati: “Mu baturage barenga miliyoni eshatu batuye Intara y’Iburasirazuba hari umuganga umwe, nyamara Ishami ry’Umuryango w’Abibumbye ryita ku Buzima (OMS) rivuga ko byibuze umuganga w’amaso umwe akwiye kuvura abantu ibihumbi 250, bisobanuye ko nibura buri Karere k’Intara y’Iburasirazuba kaba gafite umuganga w’amaso.”

Biteganyijwe ko ibyo bitaro bizaba bifite ikoranabuhanga na serivisi zigezweho mu buvuzi bw’amaso, akaba ari na byo bizaba Ibitaro by’Icyitegererezo mu Ntara y’Iburasirazuba aho byitezweho kuzarinda ubuhumyi ibihumbi amagana by’abaturage bo mu Ntara y’Iburasirazuba.  

Umuyobozi w’Ishami ry’Ubuvuzi bw’Amaso mu Bitaro bya Gahini, Jean Paul Sindikubwabo, yavuze ko mu bitaro 10 byo ku rwego rw’Akarere biboneka mu Ntara y’Iburasirazuba, ibya Gahini byonyine ni byo bifite umuganga w’amaso uhahora.

Ibyo bituma ku Bitaro bya Gahini hisuka abarwayi benshi baza kwivuza amaso, aho abenshi bajyaga boherezwa kubona ubuvuzi bugezweho mu Bitaro bya Kabgayi.

Icyo cyuho kigiye gukemurwa mu gihe abarwayi bose bazajya babonera serivisi aho ku Bitaro bya Gahini, kuko hagiye kuzanwa n’izindi nzobere mu buvuzi bw’amaso zunganira uwari ahasanzwe.

Agashya ko muri ibyo bitaro ni uko hazatangirwa serivisi zo kubaga amaso ndetse n’umwihariko w’ubuvuzi bw’amaso ku bana bato.

Musabyemariya Petronille, umwe mu baturage bo mu Ntara y’Iburasirazuba, yashimye uwo mushinga mushya witezweho kuruhura abarwayi begerezwa serivisi babonaga mu Bitaro bya Kabgayi, ari na ho honyine habonekaga serivisi zo kubaga uburwayi bw’amaso mu Gihugu hose.

Mukantagwira Eugene, Umuyobozi w’Umuryango Mpuzamahanga wa Gikiristu wita ku bafite ubumuga (CBM) wateye inkunga uwo mushinga, yavuze ko bahisemo Intara y’Iburasirazuba bashingiye ku mateka bafitanye n’Ibitaro bya Gahini by’umwihariko mu buvuzi bw’abafite ubumuga bw’ingingo.

Ati: “Twasanze ko ari byiza ko twakomerezaho ibi bitaro tukabifasha ku buvuzi bw’amaso, cyane cyane ko hagaragaye ko hari umubare munini w’abantu bafite ibibazo by’amaso, iyi Ntara yagaragaye ko ifite ikibazo cy’uburwayi bw’amaso nyuma y’uko dufashije Intara y’Amajyepfo tunyuze mu Bitaro bya Kabgayi.”

Umuyobozi w’Akarere ka Kayonza Nyemazi John Bosco, yavuze ko ibi bitaro by’amaso bije ari igisubizo ku barwayi b’amaso mu Ntara y’Iburasirazuba no mu bindi bice by’Igihugu, ati: “Ni ivuriro dutezemo byinshi, haba mu Karere ka Kayonza ariko n’abandi baturage bazaza bahagana.”

Biteganyijwe ko imirimo yo kubaka ibyo bitaro bivura amaso mu Bitaro bya Gahini bizamara amezi 18.

  • Imvaho Nshya
  • Nyakanga 25, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE