Ibigo 400 bikomeye mu itumanaho rya telefoni bigiye guhurira i Kigali

  • NTAWITONDA JEAN CLAUDE
  • Ukwakira 18, 2022
  • Hashize imyaka 2
Image

Inama Mpuzamahanga yiga ku ikoranabuhanga rya telefoni ya mbere igiye kubera muri Afurika, izakirwa mu Mujyi wa Kigali hagati y’italiki ya 25 na 27 Ukwakira 2022 bikaba byamenyekanye ko izitabirwa n’abahagarariye ibigo bikora mu ruhererekane rw’ikoranabuhanga rya telefoni ku Isi bigera kuri 400.

Iyi nama yateguwe n’Ikigo Mpuzamahanga gishinzwe Itumanaho rya Telefoni (Global Ststem for Mobile Communications/ GSMA), yitezweho kwitabirwa n’abasaga 2000 barimo abazaba baturutse mu bigo by’itumanaho birenga 75 bikorera mu bice bitandukanye by’Isi.

Minisiteri y’Ikoranabuhanga no Guhanga Udushya ivuga ko hari byinshi u Rwanda rwiteze kungukira muri iyi nama izitabirwa n’abantu batandukanye bakomeje kugira uruhare mu guhindura itumanaho, cyane cyane irya telefoni.

Umunyamabanga Uhoraho muri iyo Minisiteri Yves Iradukunda, yagize ati: “Ni inama mu by’ukuri ihuriza hamwe abantu bafite ubunararibonye butandukanye mu rwego rw’itumanaho rya telefoni, harimo n’abanyepolitiki baturutse muri Minisiteri z’ikoranabuhanga ku Isi, imiryango itegamiye kuri Leta, ibigo by’ubucuruzi n’iby’ubushakashatsi. Iyi nama izaba yihariye.”

Iradukunda yakomeje avuga ko inama nk’iyi iba ifite ubushobozi bwo kuyobora icyerekezo cy’inzego zishyiraho politiki z’itumanaho rya telefoni no gushyiraho ingamba ziziba ibyuho bikigaragara mu itumanaho rya telefoni. Yongeyeho ko u Rwanda rwiteguye kwigira ku bunararibonye bw’izo mpuguke, inararibonye n’abashakashatsi.

Iradukunda yakomeje agira ati: “Uzaba umwanya mwiza wo kunguka umusaruro ushingiye ku bumenyi, cyane cyane ari na ko twungurana ibitekerezo ku guhangahana ubumenyi n’ishoramari.”

Biteganyijwe ko iyo nama izaba mu cyumweru gitaha izafungurwa ku mugaragaro na Perezida wa Repubulika y’u Rwanda Paul Kagame, aho yitezweho kugeza impanuro ku batumirwa bazaturuka mu bice bitandukanye by’Isi.

Umuyobozi Mukuru wa GSMA Mats Granryd, amaze kwakirwa na Perezida Kagame ku wa Kabiri taliki ya 20 Nzeri 2021, yavuze ko bashimishijwe no kuba Perezida Kagame ari we uzatangiza iyo nama ku italiki ya 25 Ukwakira.

Yagize ati: “Ni iby’igiciro gikomeye kuba Nyakubahwa Perezida Paul Kagame ari we uzafungura inama yacu ya mbere yiga ku Isi ya Telefoni muri Afurika ibaye imbonankubone. Ubwitabire bwe bushimangira uruhare rw’ingenzi telefoni zikwiye kugira mu kuyobora iterambere ry’ubukungu n’uburumbuke ku mugabane w’Afurika wose.”

Yakomeje ahamya ko yiteguye kwitabira iyo nama izarangwa n’ibiganiro byisanzuye kandi bitanga umusaruro mu kurushaho kongera uruhare rwa telefoni mu iterambere, byitezwe kubera i Kigali. 

Gahunda y’Inama Mpuzamahanga yiga ku ikoranabuhanga rya telefoni, itegurwa n’abafatanyabikorwa batandukanye. Ubuyobozi bwa GSMA buterwa ishema n’uko bushyigikiwe n’ibigo mpuzamahanga n’ibyo mu Karere birimo MasterCard, MTN, Orange, ZTE, ASVL Summit 2022 na Smart Africa. 

GSMA ni Ikigo Mpuzamahanga gihuza uruhererekane rw’itumanaho rya telefoni rugamije kuvumbura, guhanga no gutanga  umusingi w’udushya dushyigikira ubucuruzi n’impinduka zikenewe muri sosiyete. 

Intumbero nyamukuru y’icyo kigo ni iyo gufungura burundu imbaraga zo kubona ihuzanzira rya telefoni ku Isi kugira ngo abantu, inganda na Sosiyete bikomeze kwiteza imbere bihujwe n’ikoranabuhanga. 

Iki kigo kizaba gihagarariye ibindi bigo bitanga serivisi z’itumanaho rya telefoni n’imiryango yose ikora mu ruhererekane rw’itumanano rya telefoni n’inganda zishamikiyeho, giharanira ko itumanaho rya telefoni ribyazwa umusaruro mu nyungu rusange, kwagura serivisi z’inganda no gutanga ibisubizo bigera ku baturage benshi, mu bihugu byose. 

Ibyo bikorwa biba bikubiyemo no kwimakaza Politiki zikemura imbogamizi zikomeye kurusha izindi Isi ihanganye na zo, kugaragaza ikoranabuhanga nk’umusingi w’iterambere, n’uburyo telefoni ifasha kwagura urubuga ruhuza rubanda.

Iyi nama ibereye mu Rwanda mu gihe Leta ikomeje umushinga wo gukwiza telefoni zigezweho mu baturage, muri gahunda ya Connect Rwanda yatangijwe mu mwaka wa 2019 mu rwego rwo kwihutisha iterambere ry’ubukungu bushingiye ku ikoranabuhanga.

  • NTAWITONDA JEAN CLAUDE
  • Ukwakira 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE