Ibigo 351 byapiganiye ibihembo bizatangwa muri Hanga PitchFest

  • NTAWITONDA JEAN CLAUDE
  • Ugushyingo 18, 2022
  • Hashize umwaka 1
Image

Ibigo bitandukanye bya Leta n’iby’abikorera byahize ibindi mu gutangiza udushya tw’ikoranabuhanga muri serivisi bitanga guhera mu 2020, mu byumweru bitatu biri imbere bizahembwa akayabo kabifasha kurushaho kwagura imishinga bifite, muri gahunda y’ibihembo byiswe Hanga PitchFest.

Ni umuhago witezwe kubera muri BK Arena taliki ya 10 Ukuboza. Bitegayijwe ko ibyo bihembo bizatangwa mu byiciro bibiri, harimo ibigenewe ibigo by’abikorera (Hanga Corporate Innovation Awards) ndetse n’ibiteganyirijwe ibigo bya Leta byahanze udushya (Hanga Public Innovation Awards)

Icyiciro cya mbere cy’ibyo bihembo cyabaye mu mwaka ushize wa 2021, ahahembwe ibigo 5 byahize ibindi mu guhanga udushya tw’ikoranabuhanga ndetse n’impano zigamije gutera abandi ishyaka ryo kuvumbura udushya twinshi dutanga ibisubizo birambye ku ingorane Abanyarwanda n’Isi muri rusange bahanganye na zo. 

Hanga PitchFest ni ibihembo bitegurwa n’Urwego rushinzwe Iterambere mu Rwanda (RDB), Minisiteri y’Ikoranabuhangano Guhanga Udushya (MINICT) n’Ishami ry’Umuryango w’Abibumbye rishinzwe Iterambere (UNDP) rikorera mu Rwanda.

Ibihembo bya Hanga byateguriwe ibigo byigenga n’inzego za Leta bigamije gushimira ibigo n’inzego za Leta byagaragaje ubudasa mu guhanga udushya mu mirimo  bikora guhera mu mwaka wa 2020, bikaba byaratanze umusaruro ukomeye mu mitangire ya serivisi bigeza ku bagenerwabikorwa.

Minisitiri w’Ikoranabuhanga no Guhanga Udusshya Paula Musoni Ingabir, yagize ati: “Guhanga udushya mu masosiyete n’inzego za Leta y’u Rwanda ni ingenzi mu gufasha Igihugu kugera ku cyifuzo cyacyo cyo kuba ihuriro ry’udushya tubereye Afurika.

Binyuze muri ibi bihembo, turashimira ibigo bikoresha ikoranabuhanga mu kunoza imikorere yabyo, kuyihuza n’imihindagurikire y’ibyo abaguzi n’abaturage bakeneye, no gufungura impano nshya n’ibitekerezo. Turashaka gushyiraho uruhererekane rw’udushya aho Umunyarwanda ashobora guhanga no gutanga ibisubizo by’ibibazo duhura na byo buri munsi.”

Kuri ubu abazahatana mu cyiciro cya nyuma bakomeje gutoranywa ndetse ibigo bikaba bitoranywa hashingiwe ku ngingo zirimo umusaruro n’ikwirakwira ry’udushya byahanze, ikoreshwa ry’ikoranabuhanga rigezweho no kurihuza n’imibreho y’Abanyarwanda, kuba ridahura n’imbigamizi nyinshi n’ibindi.

Mu bigo 351 byasabye harajonjorwamo 25 bizahagararirwa mu mwiherero uzatoranywamo ibigo bitanu bizahembwa ku munsi nyirizina mu kwezi k’Ukuboza. 

Mu mwaka ushize, hahembwe ibigo bitanu ari byo Afruduino Ltd, Second Life Storage, Afri-Farmers Market Ltd, BAG Innovation, na Karisimbi Tech Solutions byatoranyijwe mu bisaga 200. Ikindi kandi, hatoranyijwe imishinga mito n’iciriritse 45 yemerewe guhabwa serivisi z’inyongera ndetse n’inkunga biyifasha gutera imbere.

  • NTAWITONDA JEAN CLAUDE
  • Ugushyingo 18, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE