Ibigeragezo Perezida Kagame yikoreye muri Guverinoma ya mbere

  • NTAWITONDA JEAN CLAUDE
  • Ugushyingo 13, 2022
  • Hashize umwaka 1
Image

Ni Guverinoma yari igizwe na Twagiramungu Faustin, Col. Kanyarengwe Alexis, Seth Sendashonga, Bizimungu Anastase, Nkubito Alphonse n’abandi bayoboye mu bihe by’urujijo, ihungabana n’ihuzagurika ryari mu Banyarwanda benshi bari bamaze kurokoka Jenoside yakorewe Abatutsi, abandi ari bwo bahungukaga bavuye mu bihugu by’abaturanyi basanga abari bakiri mu Gihugu.

Perezida wa Repubulika Paul Kagame, yakomoje ku buryo Guverinoma ya mbere yabayemo ingorane zitandukanye ku buryo abari bayigizebahoraga bameze nk’injangwe n’imbeba, bahanganye ndetse barwana inkundura.

Bamwe bashakaga kugarura amatwara yahiritse igihugu kikisanga muri Jenoside yahitanye abasenga miliyoni imwe mu minsi 100 gusa, mu gihe Perezida Kagame n’abandi bake barwanye inkundura bahagarika iyo myumvire n’umugambi mubisha wo gushaka gusenya Umuryango RPF Inkotanyi ari na wo wabaye umusingi wo gushinga Umuryango Unity Club uharanira ukanimakaza ubumwe bw’Abanyarwanda.

Yagize ati: “Ni byo twagiye duhura na byo muri uru rugendo rwa Unity Club Ndibuka nanone muri Leta. Guverinoma ya mbere twagize guhera mu mwaka wa 1994, hari ibigeragezo byinshi. Abagiye muri Guverinoma icyo gihe sinzi hano bashobora kuba atari benshi cyane, ariko barabizi.”

Byose ngo byahereye ku muhungu wa Rukeba wamuteye mu biro byanjye, aramwibwira ndetse anamubwira ko ari umuhungu wa Rukeba wari Perezida wa Lunari (UNAR), ishyaka ryavutse bwa mbere rirwanya akarengane kakorerwaga n’amashyaka yari ku butegetsi .

Rukeba yamunyuriye mu mateka, arangije arambwira ati “Ariko izi ngabo zawe uyobora uzi ko ari izanjye? Nti ntabyo nari nzi. Ati ni ingabo zanjye, ajya mu mateka ya LUNARI, ndamubwira nti jyewe ariko umbabarire amateka ya LUNARI ntabwo nari nyazi… twebwe turi RPF. Ati se RPF ituruka he, ikomoka he? Mubwira amateka nari nzi ya RPF ati abo bose uvuga ni twe.”

Byabaye impaka ndende, arangije amubaza icyoyifuza, na we amubwira ko ari we ukwiye kuba Umuyobozi bakamuyoboka nubwo yabivuze mu marenga agira ati: “Dushaka ko nyine LUNARI igomba kubona umwanya wayo kubera ko mwakoresheje ingabo zayo.”

Perezida Kagame ati: Ni nko kuvuga ati nanjye ndashaka umwanya hano… Abisubiramo, hari n’umugabo wankoreraga icyo gihe wajyaga ansemurira yitwaga Smaragde. Aza kundeba yabanje kuvugana na we, nakoreraga muri Nyarugenge, ndi hejuru. Aravuga ati n’ikimenyimenyi abantu bagukorera bose ni LUNARI. Ndamubaza nti nka nde se? Ati umuntu witwa Smaragde ugukorera hano…. Amaze kumbwira ibyongibyo ndamubwira nti urashaka iki? Niteguye kuguha ingabo za we ukazitwara aho ushaka. Ndamubwira nti banza uhere kuri Simaragiti (avuga Smaragde) umutware mujyane aho ushaka, hanyuma n’abandi basirikare wumva ushaka uzanzanire amazina yabo na bo mbaguhe ubajyane.”

Perezida Kagame yavuze ko ibyo byari intangiriro kuko haje kuba ibindi birushijeho kuba bibi nyuma, habaga Inama y’Abaminisitiri abayigize bose bamugambaniye ariko we ntiyabimenya. Icyo giheyitabiriye nk’abandi yamaze kumeyeshwa ibiri ku murongo w’ibyigwa, ariko asanga ibintu byahinduye isura.

Ati: “Na ho abantu bamaze gushyira ku murongo uko biri bugende, Perezida nari mwicaye iburyo, hirya hariho Kanyarengwe, hirya hakurikiyeho Seth Sendashonga, Harimo uwitwaga Nkubito wari Minisitiri w’Ubutabera. Ndabibuka uko bari bicaye bakurikiranye. Tugeze mu nama, haza ingingo nshya itari ku rutonde rw’ibyigwa, haza kuza indi ngingo ko hari idosiye izanwa na Minisitiri w’Umutekano Sendashonga. Dosiye iza kuba iya Rukeba na LUNARI. Njye ndabihorera kuko nari namubwiye ibyo nagombaga kumubwira.

Inama y’Abaminisitiri irashyuha, noneho kuko LUNARI hari ibyayo tuyigomba, ariko ubwo umugambi wari uwo kuzana urujijo mu Nama y’Abaminisitiri, kuko hariho abantu bavuga bati ariko iyi RPF tuzayikira ra? Ariko kuyisenya ni uko twayishyiramo amacakubiri tugateranya abantu. Ni wo wari umugambi. Uwitwaga Kanyarengwe ati, ariko ni byo iyi dosiye irata umwanya, harya Seth Sendashonga tubwire bimeze bite? Seth yari afite file (dosiye) arayifungura aravuga uko bakwiye kwinjiramo bakazana abantu muri LUNARI, Kanyarengwe aramwakira, Twagiramungu aramwakira, n’abandi ba Nkubito…”

Hari abahanyanyaje bagerageza kugira ibyo bavuga, birangira bakubiswe barimo Ruhozagara n’uwitwa Karemera. Bizimungu Pasteur wari Perezida, yungirijwe na Kagame wari n’Umukuru w’Ingabo, yari acecetse yaryumyeho.

Perezida Kagame yakomeje agira ati: “Ubwo Perezida Bizimungu aracecetse. Byatinze mbaza Bizimungu nti ariko Perezida, intambara ziri hano mu Nama y’Abaminisitiri wowe urabitekerezaho iki? Ati nanjye ni uko mbibona. Mpera kuri Kanyarengwe kandi yari Umuyobozi Mukuru wa RPF, ndamubaza nti ariko Kanyarengwe na we? Hanyuma se Twagiramungu we? Ubu Twagiramungu na Kanyarengwe na Kayibanda, ni mwe mugiye kurwana intambara z’Abatutsi na LUNARI, ubwo buryarya murazana ubw’iki ahangaha?”

Yakomeje asaba Perezida Bizimungu kubakiranura asa n’ucisha make amaze kubona ko ibintu bitoroshye kandi Kagame akaba yarababwiraga ukuri kwambaye ubusa ntaho abakinze.

“[…] Mbaza Kanyarengwe nti ariko koko ubu buryarya ni bwo mwazanye mu Nama y’Abaminisitiri? Ubu inzira turimo yo kuva muri aya mateka mabi no kugira ngo dutere imbere mwadusubije inyuma iyi myaka yose na Politiki ni yo mwagiye twicare tubatege amatwi ibyo mutubwira? Kandi muri abayobozi b’iki gihugu abantu babatezeho amaso, inzira mudutwaramo ni iyi? Bigeze aho ndababwira nti rero,  n’ubundi nta kibazo ngira ku kubaha abantu. Ndiyubaka kandi nkubaha abantu. Ndababwira nti ariko ubungubu ngiye gukora ibintu bimwe bidasa nk’aho ari ukububaha, kuko hari Perezida yicaye hano, abandi bayobozi bakuru mwicaye hano, mwadusubije muri Politiki mbi.

Ndavuga nti njyewe ntabwo nakwemera ko amaraso yamenetse y’abantu barwanye, ntiturahamba abishwe mu mateka mabi, ntituranabamenya, Abanyarwanda barashize n’abarwanaga na bo abenshi babiguyemo, twe turi ahangaha twasagutse ku bw’amahirwe, tugiye kwicara mujye aho mutobange Igihugu, abantu mutobange, niba mushaka indi ntambara turayirwana.”

Perezida Kagame avuga ko icyo gihe atari akwiye kuba avuga kuko yari afite umukuriye, ariko akimara kumva ibyo perezida yemeje yumva atabyihanganira kubera igiciro cy’amaraso n’imibiri y’abantu bitangiye gushyira u Rwanda ku murongo rukongera kuba Igihugu.

Ati: “Kandi nabivugaga nari Visi Perezida hari Perezida, ubundi bigaragara ko ngomba kuba ntarubashye Inama cyangwa uwari anyoboye icyo gihe. Ariko kubera ubuzima bw’Igihugu, bw’abakiriho, kubera ikibi cyagombaga guhinduka. Ahongaho nta kundi byagombaga kugenda. Na nyuma y’aho ibindi byinshi.”

Yasohotse mu Nama y’Abaminisitiri ku bw’amanjwe barimo

Perezida Kagame yanagarutse ku buryo yamaze iminsi arara amajoro, agenda amanywa yose azenguruka Igihugu asura ingabo zari zihanganye no kugarura umutekno mu bice by’Amajyaruguru n’Uburengerazuba bw’u Rwanda byari byarabaye indiri y’Abacengezi batezaga umutekano muke.

Umunsi atazibagirwa ni uwo yatashye ananiwe mu mwaka wa 1996, yagera i Kigali mu Gitondo agasanga hateranye Inama y’Abaminisitiri agahita ayijyamo atabanje no gufata umwanya wo gukaraba.

Ati: “Ubwo nazindutse, namaze icyumweru ntarakandagira hano ntaragera no mu rugo turi mu ntambara z’Abacengezi, bishe abantu bari hakurya y’amazi muri Congo na hehe, ndaza nkigera aho nsanga hari Inama y’Abaminisitiri mu gitondo ndagenda nyijyamo, uko nakabaye nari ntaranakaraba.

Nkimara kwicara ubwo Inama y’Abaminisitiri iruzuye, abantu batangira gucanirana amarenga. Ni Twagiramungu wabajije Sendashonga ngo natubwire amakuru mu gihugu uko hameze, Arangije avuga ngo noneho, aho mvuye ngira no hari muri za Kibuye, ingabo za Kagame zamaze abantu za Kibuye, Mbanza kugira ngo nabyumvise nabi, n’abandi babigiyemo. Ndavuga nti Seth uvuze ngo iki? Na ho ubwo ndi yo hari ahantu nagiye mpura n’abaturage nzakuvuga disikuru nza kuvuga n’abantu bari muri Congo, mbabwira nti abahungiye muri Congo mureba bamaze abantu, bazagira ubwo bagaruka tubabaze impamvu bishe abantu n’uko babishe. Ibizaba bidashoboka bamwe tuzabasangayo.”

Iryo jambo yavuze yasanze ryamutanze i Kigali, Perezida Kagame akaba akeka ko ari byo bashingiyeho bavuga ko ingabo ze zamaze abantu. Perezida Kagame yaramubwiye ati: “Seth Sendashonga, ubu ureba ntabwo nigeze ndyama naraye ijiro ryose ngenda nshakira Igihugu umutekano. Ubu wampinduye umwicanyi ninjye mwicanyi? Mwabuze abicanyi ubu njye mwampinduye umwicanyi? Sendashonga, nabaye umwicanyi? Msubiramo nka gatatu.”

Perezida Kagame yumvise atakwihanganira kuguma yicaranye n’abantu nk’abo arahaguruka arigendera n’imodoka yari yajemo ayisiga ahaberaga inama agenda n’amaguru.

Ati: “Ndagira ngo mbereke aho twagiye tuva, n’ukuntu abantu bashobora guhitamo; buri gihe iyo ufite icyo ushaka kugeraho hari uburyo kandi buri wese afite ubushobozi, afite uko yatanga umusanzu kugira ngo wa muryango wacu munini, Igihugu, abagituye bashobore kubaho neza. Ariko ubu aho tugeze nta cyatera umuntu uwo ari we wese ubwoba.”

Ubu buhamya burebure, Perezida Kagame yabugarutseho mu ijambo yagejeje ku bitabiriye Ihuriro rya 15 ry’Umuryango Unity Club uhuriza hamwe abayobozi b’Igihugu n’abahoze mu Buyobozi bw’Inzego zo hejuru za Guverinoma.

  • NTAWITONDA JEAN CLAUDE
  • Ugushyingo 13, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE