Haringingo Francis yagizwe umutoza mushya wa Bugesera FC

  • Imvaho Nshya
  • Ugushyingo 15, 2023
  • Hashize amezi 3
Image

Umutoza w’Umurundi Haringingo Francis Christian ’Mbaya’ wari umaze iminsi 42 asezerewe na Sofapaka FC yo muri Kenya kubera umusaruro mubi, yatangajwe nk’umutoza mushya wa Bugesera FC asimbuye Nshimiyimana Eric watandukanye na yo ku bwumvikane kuri uyu wa Kabiri tariki 14 Ugushyingo 2023.

Mu gitondo cyo kuri uyu wa Gatatu tariki 15 Ugushyingo 2023, ibinyujije  ku mbugankoranyamba zayo iyi kipe yemeje ko basinyishije Haringigo Francis nk’umutoza  mushya ku masezerano y’umwaka umwe n’igice.

Haringingo azungirizwa na Nduwimana Pablo bakoranye muri Rayon Sports na Sofapaka FC ndetse na Kagabo Peter ushinzwe kongerera imbaraga abakinnyi.

Umukino wa Mbere nk’umutoza mushya wa Bugesera FC azahura na Marine FC i Nyamata ku wa 25 Ugushyingo 2023.

Si inshuro ya mbere Haringigo Francis aje gutoza muri shampiyona y’u Rwanda kuko yatoje Mukura VS muri 2017 ayifasha kwegukana igikombe cy’amahoro itsinze Rayon Sports ku mukino wa nyuma.

Mu 2019, Haringingo yagizwe umutoza wa Police FC ariko ayivamo nabi mu 2021 kubera umusaruro muke, ajya muri Kiyovu Sports yafashije kuba iya kabiri muri Shampiyona ya 2021-2022 arushwa na APR FC amanota ane.

Muri Kamena 2022, Haringingo yasinye amasezerano y’umwaka umwe muri Rayon Sports, ayihesha Igikombe cy’Amahoro cya 2023 itsinze APR FC igitego 1-0 ku mukino wa nyuma ndetse isoza Shampiyona iri ku mwanya wa gatatu.

SHEMA IVAN

  • Imvaho Nshya
  • Ugushyingo 15, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE