Handball: Misiri na Algeria zirakina umukino wa nyuma  mu mikino y’Afurika

Umwanya wa 7-8

Rwanda 34-35 Congo Brazzaville

Umwanya wa 5-6

Maroc 31-31 Libiya (35-34)

Imikino ya ½

Tunisia 25-29 Algeria

Misiri 33-24 Angola

Taliki 27-08-2022

Umwanya wa gatatu

Tunisia-Angola (BK Arena-17h00)

Umukino wa nyuma

Misiri-Algeria (BK Arena-19h00)

Ikipe ya Misiri  na Algeria ni zo zageze ku mukino wa nyuma mu irushanwa ry’Afurika mu batarengeje imyaka 20 mu mukino wa Handball “U-20 African Men’s Handball Championship Rwanda 2022”.

Iyi mikino yatangiye taliki 20 Kanama 2022 irasozwa kuri uyu wa Gatandatu taliki 27 Kanama 2022 aho ikipe ya Misiri ifite igikombe giheruka ikina na Algeria. Umukino ukaba uteganyijwe  saa moya (19h00) muri BK Arena.

Mbere y’uyu mukino, ikipe ya Tunisia yakinnye umukino wa nyuma ubwo iri rushanwa riheruka muri 2018 irakina na Angola zihatanira umwanya wa 3. Umukino uteganyijwe saa kumi n’imwe (17h00).

Ikipe ya Misiri yageze ku mukino wa nyuma isezereye  ikipe ya Angola muri ½ iyitsinze ibitego 33 kuri 24.

Ikipe ya Algeria yageze ku mukino wa nyuma itsinze Tunisia ibitego 29 kuri 25.

Iyi mikino ya ½ cy’irangiza ikaba yarabaye ku wa Gatanu taliki 26 Kanama 2022.

Habaye imikino yo guhatanira imyanya

Ikipe ya Maroc yegukanye umwanya wa 5 itsinze  ikipe Libiya ibitego 35 kuri 34  nyuma yo kwitabaza penaliti  kuko imikino yagenwe yarangiye aya makipe anganya ibitego 31 kuri 31.

Ikipe ya Congo Brazzaville yegukanye umwanya 7 itsinze u Rwanda ibitego 35 kuri 34.  Ikipe y’u Rwanda isoreza ku mwanya wa 8 wa nyuma.