Handball: Ikipe y’u Rwanda yatsinzwe umukino wa kabiri, Algeria na Misiri zitwara neza

  • Imvaho Nshya
  • Kanama 23, 2022
  • Hashize imyaka 2
Image

Angola 22-25 Tunisia

Libiya 23-38 Algeria

Misiri 40-23 Congo Brazzaville

Maroc 39-22 Rwanda

Ikipe y’u Rwanda yatsinzwe umukino wa kabiri  mu irushanwa ry’Afurika mu batarengeje imyaka 20 mu mukino wa Handball “U-20 African Men’s Handball Championship Rwanda 2022”.

Ku wa Mbere taliki 22 Kanama 2022 ni bwo habaye imikino y’umunsi wa gatatu  aho ikipe y’u Rwanda iri mu itsinda A yakinnye umukino wa kabiri igatsindwa na Maroc  ibitego 39 kuri 22. Mu gice cya mbere, ikipe y’u Rwanda yatsinzwe na Maroc ibitego 21-8 naho igice cya kabiri Maroc itsinda u Rwanda ibitego 18 kuri 14.

Muri rusange, kapiteni w’ikipe y’u Rwanda, Kubwimana Emmanuel ni we watsinze ibitego byinshi muri uyu mukino (10) mu gihe ku ruhande rwa Maroc uwatsinze ibitego byinshi ari Achraf Eladich (8).

Kapiteni w’ikipe y’u Rwanda, Kubwimana Emmanuel

Muri iri tsinda A, ikipe ya  Tunisia yitwaye neza itsinda Angola ibitego 25-22. Uyu wari umukino wa mbere kuri Tunisia naho Angola wari umukino wa kabiri kuko umukino wa mbere yatsinze u Rwanda ibitego 43 kuri 20.

Mu yindi mikino yabaye, ikipe ya Algeria na Misiri ziri mu itsinda B zitwaye neza zitsinda umukino wa kabiri zikatisha itike ya ½ cy’irangiza ndetse n’itike yo kuzaserukira Afurika mu mikino y’igikombe “IHF Men’s Junior World  Handball Championship 2023”.

Ikipe ya Algeria yatsinze Libiya ibitego 38 kuri 23. Uyu wari umukino wa kabiri Algeria itsinze kuko umukino wa mbere yatsinze Congo Brazzaville ibitego 31-30.

Ikipe ya Misiri yitwaye neza ku mukino wa kabiri itsinda ikipe ya Congo Brazzaville ibitego 40 kuri 23. Iyi kipe ya Misiri uyu wari umukino wa kabiri itsinze nyuma yo gutsinda Libiya ibitego 40 kuri 23 ku mukino wa mbere.

Imikino y’amajonjora mu matsinda izakomeza taliki 24 Kanama 2022 aho ikipe ya Congo Brazzaville izakina na Libiya (13h00), Algeria ikine na Misiri (15h00), ikipe ya Maroc ikine na Angola (17h00) naho ikipe ya Tunisia ikine n’ u Rwanda (19h00).

  • Imvaho Nshya
  • Kanama 23, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE