Handball: Ikipe y’u Rwanda U-20 yegukanye igikombe cy’Akarere ka 5 ku nshuro ya gatatu

  • Imvaho Nshya
  • Ugushyingo 1, 2022
  • Hashize umwaka 1
Image

Ikipe y’u Rwanda mu batarengeje imyaka 20 mu mukino wa Handball  mu bahungu yitwaye neza yegukana igikombe cy’Akarere ka 5 “IHF Challenge Trophy 2022” akaba ari inshuro ya gatatu iyi kipe yegukanye iki gikombe  yikurikiranya nyuma ya 2016 na 2018.

Nyuma yo kwegukana iki gikombe iyi kipe y’u Rwanda ndetse n’ikipe y’u Burundi  yegukanye igikombe mu batarengeje imyaka 18  ni zo zizahagararira Akarere ka 5 mu mikino y’Afurika izabera muri Guinea  mu Kuboza 2022.

Iyi kipe y’u Rwanda U-20 yegukanye igikombe cy’Akarere ka 5  itsinze ku mukino wa nyuma ikipe ya Uganda ibitego 39 kuri 37 naho mu batarengeje imyaka 18, ikipe y’u Burundi yegukana igikombe itsinze ikipe y’u Rwanda ibitego 40 kuri 37.

Amakipe y’u Rwanda yagarutse mu Rwanda taliki 31 Ukwakira 2022 yakiranwa ibyishimo  n’abakunzi ba Handball  aho yazengurukije igikombe mu Mujyi wa Kigali.

Uko amakipe y’u Rwanda yitwaye

Iyi mikino y’Akarere ka 5 “IHF Challenge Trophy 2022” yabereye i Nairobi muri Kenya kuva taliki 25 kugeza 29 Ukwakira 2022.

Mu batarengeje imyaka 20, ikipe y’u Rwanda yari mu itsinda B hamwe na Ethiopia na Djibouti naho itsinda A ririmo Kenya, Uganda, Burundi na South Sudan.

Mu mikino y’amajonjora, ikipe y’u Rwanda U-20 yatozwaga na Ntabanganyimana Antoine yatsinze Djibouti ibitego 52 kuri 20 inatsinda Ethiopia ibitego 44 kuri 40.

Muri ½  cy’irangiza,  ikipe y’u Rwanda yatsinze u Burundi ibitego 48 kuri 20.

Ku mukino wa nyuma, ikipe y’u Rwanda  yegukanye igikombe itsinze Uganda ibitego 39 kuri 37 naho ikipe ya Ethiopia  yegukana umwanya wa 3 itsinze u Burundi ibitego 43 kuri 40.

Muri iki cyiciro, ikipe y’u Rwanda yasoreje ku mwanya wa mbere ikurikirwa na Uganda, Ethiopia (3), Burundi (4), Kenya (5), Djibouti (6) na South Sudan (7).

Mu batarengeje imyaka 18, ikipe y’u Rwanda yari mu itsinda  A  hamwe na Uganda n’u Burundi naho itsinda B ryari rigizwe na Kenya, Ethiopia, Djibouti na South Sudan.

Mu mikino y’amajonjora, ikipe y’u Rwanda yatozwaga na Bagirishya Anaclet  yatsinzwe n’u Burundi ibitego 45 kuri 44 nyuma itsinda Uganda ibitego 47 kuri 39.

Muri ½ cy’irangiza, ikipe y’u Rwanda yatsinze Kenya ibitego 38 kuri 29. Ku mukino wa nyuma iyi kipe y’u Rwanda yatsinzwe n’u Burundi ibitego  40 kuri 37  naho ikipe ya Kenya yegukana umwanya wa 3 itsinze Ethiopia ibitego 36 kuri 24.

Muri iki cyiciro, ikipe y’u Burundi yasoreje ku mwanya wa mbere ikurikirwa n’u Rwanda (2),Kenya (3), Ethiopia (4), Uganda (5),Djibouti (6) na South Sudan (7).

  • Imvaho Nshya
  • Ugushyingo 1, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE