Guhuza abagore bari muri Ex-FAR na RPA byasabye imbaraga nyinshi

  • KAYITARE JEAN PAUL
  • Mata 4, 2024
  • Hashize ibyumweru 2
Image

Muberanyana Jeanne ni umwe mu banyamuryango ba Ndabaga wari umukada (Intore y’umuryango) mu gihe cy’urugamba rwo kubohora igihugu, avuga ko guhuza abagore bahoze muri Ex-FAR na APR byasabye imbaraga nyinshi.

Icyatumye byoroha ngo ni uko mu ntego 8 za RPF harimo gusigasira ubumwe bw’abanyarwanda.

Ni ingingo yagarutsweho mu kiganiro cyatambutse kuri RBA, cyagarukaga ku ruhare rw’abagore mu rugamba rwo kubohora igihugu.

Nubwo Muberanyana atari mu bakada bakuru (Top Cadres) ariko atekereza ko gushyiraho intego yo gusigasira ubumwe babitekereza ku bantu bari hanze, mu gihugu, mu macakubiri ari mu gihugu, batekereza ubumwe muri urwo rwego.

Ati: “Urugamba rurangiye ubumwe bwabaye ikintu gikomeye cyane kugira ngo ubwire abanyarwanda biciwe ababo hakagira abacika ku icumu ubabwire kwiyunga, ubumwe ni ukubana neza, mu mahoro, kubana tutishishanya umubwire kutishisha uwamwiciye abantu amubona […]

Ubwire ingabo zarwanaga n’izindi kubana n’izatsinzwe, ubwire abakada n’ingabo gusigasira ubumwe baraje bagasanga ababo barashize, ubabwire kubana neza n’abo bantu, byasabye imbaraga zitoroshye n’ubuyobozi bufite icyekerezo kandi bugihagazeho.”

2nd Lt (Rtd) Marie Josée Mukanyamwasa, umunyamuryango wa Ndabaga, asobanura ko Ndabaga ari Umuryango uhurije hamwe abahoze mu ngabo za RPA n’abahoze mu ngabo zarwanaga na RPA hamwe n’abafashaga mu mirimo y’ubukangurambaga n’indi mirimo itandukanye kugira ngo urugamba rwo kubohora igihugu rugende neza.

Hari ibikorwa byinshi Ndabaga yakoze bigamije kubaka igihugu cyangwa gutanga umusanzu mu kubaka igihugu.

Ati: “Nk’abakobwa b’u Rwanda muri iryo shyirahamwe ryacu twakoze ibikorwa bitandukanye, guhuza izo mpande zose cyabaye igikorwa cya mbere dushyiraho n’ibikorwa byubaka ubushobozi bw’abanyamuryango.”

Ndabaga yatangiranye n’abahoze mu ngabo za RPF ndetse n’abari bakiri muri serivisi z’ibikorwa bya RPA hanyuma Umuryango Ndabaga ugenda waguka.

Uyu muryango ni wo watangije ikaragiro ry’amata yamenyekanye nka Nyabisindu.

Uko Ssgt (Rtd) Jeanne d’Arc Mukarunyange wahoze muri Ex-FAR yisanze muri Ndabaga

Avuga ko yari mu ruhande rw’abarengeraga ubusugire bw’igihugu bivuze ko barwanaga na RPA.

Urugamba rurangiye barahunze. Avuga ko hari akayira gato Inkotanyi zabasigiye banyuramo nkuko amategeko ya gisirikare abigena.

Ati: “Murarwana ariko hakaba akayira basigira abatsinzwe kugira ngo bagende, barakadusigiye rero turabashimira.”

Avuga ko icyo gihe bari benshi hafi igihugu cyose berekeza muri Repubulika Iharanira Demokarasi ya Congo, icyo gihe yari Zaïre.

Akomeza agira ati: “Abumvaga umutima utabacira urubanza kuko twese twarwaniraga igihugu, bamwe twahise tugaruka, uko twumvaga bavuga Inkotanyi; zifite amatwi, … ntabyo twabonye twaraje turicara ndetse tujya no mu mitungo yacu twari dufite.”

Ntibatari bazi ko hari Ndabaga ahubwo bari bafite ubwoba no kugira ngo umuntu akubwire ko wabaye umusirikare byabaga ari ibintu bikomeye.

Ati: “Ntabwo wabyemeraga. Waravugaga uti nibamenya ko nabaye umusirikare baranyica, dukomeza kubihisha.”

Avuga ko yarebye kure akabona bazatsindwa agashaka gusanga Inkotanyi ariko akabura aho yanyura kuko barimo barwana.

Agarutse mu gihugu ntabwo yashoboye kumenya ngo yabaza nde, bajya he? Bakomeje kwihishahisha n’ubu akeka ko hari abantu bari mu ntara bakihishahisha bataramenya aho ibintu bigeze.

Ni na zo nshingano zabo zo kubereka ngo dore ibyiza by’igihugu, dore ibyiza byo kubana n’abandi.

Akomeza avuga ati: “Byageze mu kwezi kwa Kanama 2004, nibwo twumvise itangazo rihamagara, abantu babanza gutinya, tubanza guhamagarana turavuga ngo turashize, bagiye kuturundira hamwe batumare.”

Bavuga ko bahumurizanyije bakavuga ko urugamba ari nk’urundi biyemeza kugenda.

Ati: “Gahunda ya Guverinoma yari uguhuza ingabo ariko twe ntabwo twiyumvaga nk’ingabo, twiyumvaga nk’abantu batsinzwe, twumvaga kuba twarabaye muri icyo gisirikare ari icyaha twakoze, twumvaga dufite ipfunwe.

Nawe umuntu yatsinzwe akajya imbere y’uwamutsinze, ntabwo biba byoroshye”.

Mbere yo kujya muri Ndabaga avuga ko Abakada (Cadres) babanje kujya muri buri ntara barabashakisha, muri make bagiyemo baramazwe ubwoba.

Ati: “Natwe twaraganiraga ariko abakada bakoze akazi, bagendaga muri buri Karere bashaka uwabaye umusirikare bakabereka ibyiza byo kubana”.

Avuga ko babaga bafite ubwoba, bajya mu cyumba cy’inama bakajya hafi y’urugi kugira ngo nibavuga bahite biruka.

Agira ati: “Tuti Inkotanyi! Inyenzi! Niko twabitaga rero! Inyenzi zifite ubwenge bwinshi nimukomeza mukajya hirya, nimubura ubwenge murashiriramo.

Tuhageze twabonye umutima mwiza, tubona urukundo mu minota 30 byari bishize, turahoberana ukajya uvuga ngo buriya twapfaga iki koko? Kuki tutari tuziranye […] turahoberana, turarira ni uko twahuye”.

  • KAYITARE JEAN PAUL
  • Mata 4, 2024
  • Hashize ibyumweru 2
TANGA IGITEKEREZO
Betty says:
Mata 4, 2024 at 2:36 pm

Umukada ahora ariwe. Ntiyari we ahubwo nubu aracyari we. Nice article. Murakoze cyane

Andika igitekerezo

AMATEGEKO AGENGA IYANDIKA RY'IGITEKEREZO CYAWE