Girumugisha yatowe nk’umukinnyi wahize abandi muri shampiyona y’u Rwanda 2025/26

Umurundi Girumugisha Jean Claude ukinira Al Hilal SC ni we watowe nk’umukinnyi wahize abandi muri shampiyona y’u Rwanda mu mwaka w’imikino wa 2025/26, ahembwa imodoka ya miliyoni 15 Frw.

Uyu muhango wo guhemba abakinnyi, abatoza bitwaye neza muri shampiyona y’u Rwanda mu mwaka w’imikino wa 2025/26 wabaye ku mugoroba wo kuri iki Cyumweru tariki ya 12 Nyakanga 2026, kuri Marriott Hotel.

Ni igikorwa cyitabiriwe n’abayobozi mu nzego z’umupira w’amaguru, amakipe, abakanyujijeho n’abandi banyuranye.

Ibi bihembo byatanzwe ku nshuro ya Gatatu n’ubuyobozi bwa Rwanda Premier League binyuze mu baterankunga bayo biyemeje kujya bahemba abakinnyi n’abatoza mu mwaka w’imikino.

Umukinnyi watsinze ibitego byinshi yabaye Umunya- Burkina Faso Djibril Ouattara, ukinira APR FC winjije ibitego 18.

Umutoza mwiza w’umwaka yabaye Umunya-Roumania, Laurențiu Reghecampf watozaga Al-Hilal SC mu gihe Umunyezamu mwiza w’umwaka yabaye Desire James w’Ikipe ya Kiyovu Sports.

Igitego cy’umwaka cyabaye icya Rutonesha Hesbon ukinira Gorilla FC ubwo yakinaga na Al-Merrikh naho umukinnyi mwiza muto w’umwaka yabaye Umunya-Liberia Emmanuel Flomo w’Ikipe ya Al-Hilal SC.

Umukinyi mwiza w’umwaka yabaye Umurundi Girumugisha Jean Claude ukinira Al Hilal SC ndetse ahabwa igihembo cy’imodoka ya miliyoni 15 Frw.

Uyu mukinnyi w’Umurundi yatsinze ibitego icyenda, atanga imipira irindwi yavuyemo ibindi bitego kuri bagenzi be.

Ni igihembo yari ahataniye na Mbonyumwami Taiba wa Marine FC, Madické Kane bakinana muri Al-Hilal n’abakinnyi babiri ba APR FC ari bo Djibril Ouattara na Byiringiro Jean Gilbert.

Ikipe y’umwaka ya Rwanda Premier League 2025/26

Umunyezamu: James Desire (Kiyovu Sports)

Ba myugariro: Byiringiro Jean Gilbert (APR FC), Ernest Luzolo Nsita (Al-Hilal), Mohamed Saeed Ahmed (Al-Hilal), Daba Sogoba (Al-Merrikh).

Abakina hagati: Madicke Kane (Al-Hilal), Joseph Sackey (Mukura VS) na Jules Razafimaro (Al-Merrikh).

Ba rutahizamu: Girumugisha Jean Claude (Al-Hilal), Djibril Ouattara (APR FC) na Mbonyumwami Taiba (Marine FC).

Biteganyijwe ko Shampiyona y’u Rwanda ya 2026/27 izatangira tariki 4 Nzeri 2026.