Gasabo: Umuryango Ineza watanze inyunganirangingo ku bantu bafite ubumuga

  • NTAWITONDA JEAN CLAUDE
  • Nzeri 24, 2022
  • Hashize imyaka 2
Image

Ineza Organization ni umuryango watangijwe na Aline Gahongayire uzwi cyane mu ndirimbo zo kuramya no guhimbaza Imana.

Iyo uvuze Aline abenshi bahita bumva indirimbo nka Amen, Ndanyuzwe, Hari impamvu pe, Nzakomeza n’izindi zihumuriza abababaye.

Byakugora kubona Aline Gahongayire adaseka kandi agasekera abakeneye kubona ababasekera.

Kuvuga izina rya Aline bijyana no guhita wumva umutima wo gufasha abatishoboye mu byiciro bitandukanye.

Aline Gahongayire uyoboye ‘Ineza Organization’ yavuze ko gufasha abishobozwa na Kristu umuha imbaraga (Foto Kayitare J.Paul)

Umunyarwanda we yaravuze ati ‘Ugira ineza ukayisanga imbere’ Bibiliya na yo igira iti “Kugira neza no kugira ubuntu ntimukabyibagirwe, kuko ibitambo bisa bityo ari byo binezeza Imana” Byanditse mu Abaheburayo 13:16.

Abenshi mukunze kubona Aline atanga Mituweli ku miryango amagana itishoboye, asangira n’abana mu gihe cya Noheli n’ibindi bikorwa by’urukundo akora.

Ijambo ry’Imana riravuga ngo muzabamenyera ku mbuto zabo!

Reka ngaruke ku nkuru nyamukuru mutagira ngo ndaca umugani ku manywa.

Ku mugoroba wo kuri uyu wa Gatanu tariki 23 Nzeri 2022, Umuryango Ineza watanze amagare nk’inyunganirangingo ku bantu bafite ubumuga mu karere ka Gasabo.

Abahawe amagare bishimira urugwiro rwa Aline Gahongayire kandi ko asekera abakeneye ubasekera (Foto Kayitare J.Paul)

Gahongayire yahamirije Imvaho Nshya ko ibikorwa byose akora abishobozwa n’imbaraga z’Imana.

Yagize ati “Mbere na mbere nshobozwa na Kristu umpa imbaraga, nshobozwa n’Imana ariko ni ibintu nkora mbikuye ku mutima, ni ibintu nkora mbikunze.

Simbyita akazi ahubwo ni umutima, kubona umuntu yishimye ni wo mwambaro nambara nkaberwa”.

Ashimangira ko ubushobozi budashobora kubura mu gihe wagize ubushake.

Ni ku nshuro ya kabiri ‘Ineza Organization’ utanze amagare kuko mbere watanze amagare 40 ku bantu bafite ubumuga.

Ni igikorwa afatanyamo n’Umuryango utegamiye kuri Leta ‘Food For The Hungry’ ukora ibikorwa bitandukanye mu guteza imbere abaturage.  

Avuga ko uretse kuba aririmba ariko ko hari ibindi bikorwa yahamagariwe gukora.

Ati “Uretse kuba ndirimba ariko hari n’ibindi bikorwa nkora byitwa ‘We For Love’, ndi umuhanzi ariko wahamagariwe kugira urukundo”.

Ndayisaba Faustin, Umuhuzabikorwa wa Food For The Hungry mu Rwanda, ashimira Leta y’u Rwanda kuko ngo aya magare yinjira mu gihugu adasoze.

Yizeza ko mu magare batanze irigize ikibazo bagikemura kandi ko iyo rishaje batanga iririsimbura hakiyongeraho ko uhawe igare ashakirwa n’icyo gukora kimuteza imbere.

Gacamumakuba Davide utuye mu murenge wa Kimironko mu karere ka Gasabo avuga ko yari afite irindi gare ryamufashaga gukora urugendo rurerure ariko ko ryari rimaze gusaza.

Avuga ko yari azi ko Umuryango Ineza uyobowe na Aline Gahongayire, ufasha abagore n’abakobwa gusa.

Ku rundi ruhande ashima ubugwaneza n’umutima wo gutekereza ku bantu bafite ubumuga biranga Gahongayire.

Yagize ati “Nabwira Aline Gahongayire ko tumushimira ko yafashije abantu benshi kandi atazi”.

Dusabimana Abdul utuye mu kagari ka Kagugu mu murenge wa Kinyinya yishimiye igare yahawe kuko ngo yari amaze igihe kinini akomanga ahantu henshi ariko ntaribone.

Dusabimana Abdul yashimye ko yahawe igare aho yagenderaga mu mbago kuva mu 1982 (Foto Kayitare J.Paul)

Avuga ko yatangiye kugendera mu mbago kuva mu 1982 ubwo yari mu kigo cya Gatagara ariko ubu ngo nibwo agiye gutangira kugendera mu kagare.

Ati “Kuva mu 1982 nagenderaga mu mbago ahubwo zagezeho ziza gusaza ku buryo narimaze imyaka itatu nicaye hasi kuko ntashoboraga kugenda.

Imbago zari zarashaje nshatse ubufasha ndabubura kubera kuba narashyizwe mu kiciro cya gatatu cy’ubudehe.

Ndashimira Ineza Organization impaye igare ryo kugenderamo kandi rizamfasha gukora ibinteza imbere”.

Umuhuzabikorwa w’inama y’igihugu y’abantu bafite ubumuga mu karere ka Gasabo, Jean Bosco, yahamirije Imvaho Nshya iyo uhaye igare umuntu ufite ubumuga uba umuhaye ikintu gikomeye cyane.

Ati “Abana benshi iyo batari muri riya gare baba barambaraye hasi, uwo muntu iyo umuhaye igare, uba umuhaye ikintu gikomeye cyane mu buzima bwe kuko azicara muri rya gare ajye no ku kazuba ndetse ajye ku ishuri”.

Ku bantu bakuru bo babona uko bakora ibibateza imbere kuko aba abonye uburyo kugira aho ajya abifashijwemo n’inyunganirangingo nk’izi zatwanzwe.

Umuyobozi Nshingwabikorwa w’akarere ka Gasabo, Umwali Pauline, ashimira abafatanyabikorwa b’akarere ka Gasabo ko bafatanya muri byose.

Yishimira ko Ineza Organization yabahaye amagare nk’inyunganirangingo ku bantu bafite ubumuga 30, ariko ngo bakaba bongewe andi 40 nyuma yo kugaragaza ko hari abantu bafite ubumuga 125 bakeneye amagare abafasha muri aka karere.

Avuga ko batazemerera abantu bafite ubumuga gusabiriza.

Ati “Ntabwo twabemerera gusabiriza kuko dufite ubufasha nka Leta ukongeraho n’ubuva mu bafatanyabikorwa.

Uwo dusanze ku muhanda asabiriza turahamukura tukamuganiriza akatubwira ikibazo afite tukagikemura”.

Ineza Organization yatanze amagare, aho rimwe rihagaze amafaranga asaga ibihumbi 400.

Ubuyobozi bwa Ineza Organization bwabwiye itangazamakuru ko amagare bwatanze ari meza kandi azingwa bityo ko afasha abantu bafite ubumuga.

????????????????????????????????????
  • NTAWITONDA JEAN CLAUDE
  • Nzeri 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE