Gakenke: Inkomezabigwi zashyikirije Akizanye inzu zamwubakiye

  • NYIRANEZA JUDITH
  • Ukuboza 19, 2023
  • Hashize amezi 5
Image

Akarere ka Gakenke kasoje Urugerero rw’Inkomezabigwi ku wa 18 Ukuboza bashyikiriza mukecuru Akizanye inzu bamwubakiye.

Kimwe n’ahandi mu gihugu, hasojwe ibikorwa by’Urugerero rw’Inkomezabigwi 11/2023, ibirori bibera mu Murenge wa Nemba ari na wo wahize indi muri ibyo bikorwa.

Mu bikorwa byakozwe n’Inkomezabigwi 11/2023 zo mu Murenge wa Nemba mu Karere ka Gakenke hubatswe inzu 2 n’ubwiherero 10, inzu 3 zavuguruwe, ubwiherero 5 bwavuguruwe, hakozwe umuhanda wa 120 m, hakozwe ubukanguramba bwo gusubiza abana mu ishuri, n’ibindi.

Guverineri w’Intara y’Amajyaruguru Mugabowagahunde Maurice yifatanyije n’Akarere ka Gakenke, Umurenge wa Nemba, ari na wo wahize iyindi muri ibyo bikorwa, ashimira abasoje urugerero ibikorwa by’indashyikirwa bakoze.

Ati: “Rubyiruko muri ubuzima bw’Igihugu, ibi bikorwa mwakoze by’indashyikirwa, ni ikimenyetso cy’uko muri imbaraga z’igihugu”.

Ibirori byabimburiwe no gushyikiriza Umukecuru Akizanye Lucie inzu yubakiwe n’Urugerero Inkomezabigwi 11/2023 no kumuremera ibikoresho n’ibiribwa bitandukanye.

Mukecuru Akizanye mu byishimo byinshi cyane yagize ati: “Nshimiye uru rubyiruko runyubakiye inzu, nkabona aho kuba, rwaratojwe kandi ndashimira Nyakubahwa Perezida wa Repubulika ku nzu nziza nubakiwe”.

Umuyobozi w’Akarere ka Gakenke Mukandayisenga Vestine yavuze ko gusoza ibikorwa by’Urugerero rw’Inkomezabigwi 11/2023 byahuriranye no kwizihiza Umunsi Mpuzamahanga w’Ubukorerabushake, aho anashimira inkomezabigwi ku bikorwa bizana impinduka ku mibereho y’abaturage zakoze.

Yagize ati: “Ibikorwa nk’ibi bihindura imibereho y’abaturage mubikomeze kandi nk’Akarere turabashimira ibi bikorwa kuko bigira uruhare mu iterambere ry’Akarere n’Igihugu muri rusange”.

Urugerero rw’Inkomezabigwi icyiciro cya 11 rwasoje ku wa 18 Ukuboza 2023 cyari cyaratangiye tariki 25 Nzeri 2023.

  • NYIRANEZA JUDITH
  • Ukuboza 19, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE