FPR Inkotanyi na Israel baganiriye ku byagirira akamaro abaturage

Umuryango FPR Inkotanyi watangaje ko Umunyamabanga Mukuru wayo, Amb. Christophe Bazivamo yakiriye mu biro bye, Ambasaderi wa Israel mu Rwanda, Einat Weiss.

Ubutumwa bwashyizwe ku rubuga rwa X rw’Umuryango FPR Inkotanyi, bugira buti: “Abayobozi bombi baganiriye ku bifitiye inyungu ibihugu byombi n’abaturage babyo muri rusange.”

U Rwanda na Israel bifitanye umubano mwiza n’ubufatanye mu nzego zirimo ubuhinzi, ikoranabuhanga n’izindi.

Ibihugu byombi kandi bisanzwe bifatanya mu bijyanye n’umutekano, amahugurwa y’inzego zishinzwe umutekano, hamwe no gusangira ubunararibonye mu kurwanya iterabwoba.

Mu burezi, Abanyarwanda bamwe babona amahirwe yo kwiga no guhugurirwa muri Israel. Hari kandi imishinga ifasha mu rwego rw’ubuzima n’ikoranabuhanga rikoreshwa mu buvuzi.

Mu bijyanye n’ubucuruzi, umubano uragenda urushaho kwaguka, kuko ibigo byo muri Israel bikomeje gushora imari mu Rwanda, cyane cyane mu ikoranabuhanga, ubuhinzi n’ingufu.