FERWAFA yakiriye ibaruwa ya Gasogi United isezera mu marushanwa

  • SHEMA IVAN
  • Mutarama 30, 2024
  • Hashize ukwezi 1
Image

Ishyirahamwe ry’Umupira w’Amaguru mu Rwanda (FERWAFA) ryemeje ko ryakiriye ibaruwa ya Gasogi United isezera mu marushanwa kubera kutishimira bimwe mu byemezo by’imisifurire.

Ibi byemejwe n’Umunyamabanga Mukuru wa FERWAFA Kalisa Adolphe, mu kiganiro yahaye B&BFM Umwezi.

Yagize ati: “Yego ibaruwa twayibonye Perezida wa Gasogi KNC (Kakooza Nkuriza Charles) asezera, hari ibigomba gukurikizwa kugira ngo ikipe isezere, hari Komisiyo zibishinzwe zigomba koherezwamo ubusabe bwe, ibyo byose bigiye kwigwaho.”

Icyemezo cya Gasogi United kije cyo kuva muri Shampiyona y’u Rwanda kije gikurikira amagambo Perezida w’iyi kipe KNC yatangaje ku wa Gatandatu tariki 27 Mutarama 2024, ubwo Gasogi United yari imaze gutsindwa na AS Kigali igitego 1-0 mu mukino w’Umunsi wa 18 wa Shampiyona wabereye kuri Kigali Pelé Stadium.

Yagize ati: “Twihanganiye imisifurire inshuro nyinshi, haba mu bato no mu buryo bwose. Ikipe yitwa Gasogi United turayisheshe. Tugiye kureba abo dufitiye amadeni, abakinnyi bashaka kugenda bagende, ntabwo tuzongera gushora na rimwe mu mupira wo mu Rwanda.”

“Ikimbabaje ni uko muri uyu mukino hongeweho iminota ine gusa, bakinnye baryama. Umusifuzi na we twamwita umukinnyi mwiza mu mukino. Yaturwanyaga ntabwo yaduhaga amahirwe, hari penaliti yakorewe ku Munye Congo ntiyayitanga igaragara.”

Yakomeje agira ati: “Ntabwo dushobora gukina hatarimo koroherana kuko dutanga umwanya wacu, tugatanga n’amafaranga. Mugiye gutungurwa n’ibyo ngiye kubabwira. Ikipe ya Gasogi United ndayisheshe guhera uyu munsi. Turambiwe umwanda wo muri ruhago […] Ikipe ya Gasogi ndayisheshe guhera uyu munsi.”

Ikipe ya Gasogi United yashinzwe mu 2016, ijya mu cyiciro cya kabiri iguze izina rya Unity FC, bituma umwaka wa mbere iwukina yitwa Unity de Gasogi kuko yari itaraba umunyamuryango wa FERWAFA.

Yatangiye gukina mu cyiciro cya mbere guhera mu mwaka w’imikino wa 2019-2020.

Kugeza ku munsi wa 18 wa Shampiyona, Gasogi United iri ku mwanya wa munani n’amanota 22, yatsinze imikino itandatu, yanganyije ine, itsindwa imikino umunani.

  • SHEMA IVAN
  • Mutarama 30, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE