FARDC yasabwe gucyura umusirikare wayo wafatiwe mu Rwanda

  • NTAWITONDA JEAN CLAUDE
  • Nzeri 26, 2022
  • Hashize imyaka 2
Image

Imwe mu nkuru zakwirakwiye mu bitangazamakuru bitandukanye mu mpera z’icyumweru gishize ni iy’umusirikare mu Ngabo za Repubulika Iharanira Demokarasi ya Congo (FARDC) wafatiwe ku butaka bw’u Rwanda.

Umuvugizi w’Ingabo z’u Rwanda Brig. Gen Ronald Rwivanga, yagaragaje ko ibyabaye ku wa Gatandatu taliki ya 24 Nzeri ari uko uwo musirikare yibeshye ku mipaka akinjirana intwaro ku butaka bw’u Rwanda bigaragara ko yasinze, bityo agahita afatwa ndetse anitabwaho aho kuri ubu hategerejwe ko ubuyobozi bwa FARDC bwaza kumucyura.

Brig. Gen. Rwivanga, avugana n’Ibiro Ntaramakuru by’Abafaransa (AFP) yagize ati: “Ejo (ku wa Gatandatu) umusirikare wa Congo yinjiranye intwaro ye ku butaka bw’u Rwanda. Byagaragaraga ko yasinze. (…) Twaragenekereje dusanga ari ikibazo cyoroheje bityo dusaba ko baza kumutwara bakamusubiza muri RDC.”

Nyamara ku rundi ruhande, ubuyobozi bwa Teritwari ya Nyiragongo uwo musirikare yabarizwagamo bwo buravuga ko uwo musirikare yatawe muri yombi agiye gusenya inkwi zo gutekesha.

Patrick Iduma Molengo uyobora Polisi ikorera muri Teritwari ya Nyiragongo mu Ntara ya Kivu y’Amajyaruguru, yagize ati: “Turemeza ko umusirikare wa Congo yafashwe n’abasirikare b’u Rwanda ari mu gace ka Kabagana. Yari yagiye gutashya inkwi kugira ngo ateke ibyo kurya.

Yavuze ko hatangiye ibiganiro bigamije kureba uko uwo musirikare wa RDC nyuma y’ubugenzuzi bwakozwe n’Itsinda rishinzwe ubugenzuzi bw’imipaka mu Karere k’Ibiyaga Bigari (EJVM).

Si ubwa mbere umusirikare wa FARDC afatiwe ku butaka bw’u Rwanda, ndetse Ingabo z’u Rwanda (RDF) ndetse n’iza RDC zagiye zigaragaza imikoranire mu guhanahana abasirikare bafashwe barenze imipaka.

Uyu musirikare yambutse ubutaka ashinzwe kurinda agera mu Rwanda mu gihe ibihugu byombi bifitanye umubano utameze neza watewe n’ubwumvikane buke bushingiye ku mutekano muke ubarizwa mu Ntara ya Kivu y’Amajyaruguru.

Leta y’u Rwanda ifite impungenge z’uko umutwe wa FDLR ukomeza gukingirwa ikibaba mu myaka isaga 25 ishize yose mu gihe ari na wo uza imbere mu guhungabanya umutekano w’u Rwanda, ndetse ukanabangamira umutekano w’Abanyekongo bavuga ururimi rw’Ikinyarwanda.

Uwo mutwe unavugwaho kuba intandaro y’ishingwa ry’umutwe w’inyeshyamba wa M23 kuri ubu wigaruriye ibice bitandukanye byo mu Ntara ya Kivu y’Amajyaruguru, nyuma yo gushingwa n’Abanyekongo bari barambiwe guhora batotezwa na FDLR n’indi mitwe ibashinja kuba Abanyarwanda kandi bafite gahondo yabo muri Congo.

Igiteye impungenge by’umwihariko, ni uko umutwe w’iterabwoba wa FDLR washinzwe n’abiganjemo abasize bakoze Jenoside yakorewe Abatutsi mu Rwanda, wakomeje ingengabitekerezo ya Jenoside ku banyekongo biganjemo abo mu bwoko bw’Abatutsi.

  • NTAWITONDA JEAN CLAUDE
  • Nzeri 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE