Dore igituma Perezida Kagame atorwa n’abaturage barenze 90%

  • NTAWITONDA JEAN CLAUDE
  • Nyakanga 25, 2022
  • Hashize imyaka 2
Image

Mu gihe mu 2017 ibihugu byo mu Burengerazuba bw’Isi byatungurwaga n’intsinzi y’akataraboneka ya Perezida wa Repubulika y’u Rwanda Paul Kagame atorewe manda ya gatatu, Abanyarwanda babyinaga intsinzi bari mu byishimo byo kuba bongeye gushimangira icyizere babonye mu buyobozi bufite icyerekezo batanga amajwi yabo ku kigero cya 98.8%.

Kubera iki se Abanyarwanda bakunda Kagame? Tito Rutaremara, Inararibonye muri Politiki y’u Rwanda akaba n’Umuyobozi Mukuru w’Urwego rw’Igihugu Ngishwanama rw’Inararibonye, yavuye imuzingo impamvu zidashidikanywaho zituma Abanyarwanda n’umubare munini w’Abanyafurika bamwiyumvamo batitaye ku myumvire ya bamwe bakora hasi no hejuru bashaka kumuharabika.

Tito Rutaremanara yabigarutseho mu butumwa yanyujije ku mbuga nkoranyambaga, aho yagaragaje umuzi w’impamvu Abanyarwanda bakunda Umukuru w’Igihugu cyabo, Abanyamerika n’Abanyaburayi bakabibonamo ikibazo.

Taliki 12 Nzeri 2003, ni bwo Perezida Kagame yarahiriye kuyobora u Rwanda muri manda ye ya mbere, nyuma yo gutsinda amatora ku majwi 95%.

Gutsindira ku majwi ari hejuru ya 90% byakomeje kugaragara no muri manda zakurikiyeho, kugeza n’aho mu 2015 abaturage ubwabo bisabiye ko Itegeko Nshinga rya Repubulika rihinduka kugira ngo bakomeze kuyoborwa na we.

Tito yagaragaje ko ibyo bitabaye nk’impanuka kuko Abanyarwanda bazirikanaga ko Kagame ari we wabohoye u Rwanda akaruha umutekano, kunga ubumwe binyuze mu bwiyunge, ari na byo byabaye umusingi w’iterambere n’agaciro buri Munyarwanda yagize mu ruhando mpuzamahanga.

Yagize ati: “Perezida Kagame yabohoye iki gihugu, agiha umutekano, agiha ubumwe, agiha iterambere, yahaye Abanyarwanda agaciro, Abanyarwanda bose n’Abanyafurika babona  ko akiganisha heza, bakimukeneye.”

Muzehe Tito yakomeje ashimangira ko indi mpamvu y’ingenzi  Abanyarwanda bakunda Umukuru w’Igihugu ari uko abandi baba mu mashyaka atandukanye baba bashaka guhiganwa na we, abenshi baba bataragira imihigo ingana cyangwa iyingayinga iye.

Yakomeje agira ati: “Abandi ni abaza bashyigikiye amacakubiri Abanyarwanda batakibonamo cyangwa batagishaka… Urugero: Faustin Twagiramungu yaraje [ariyamamaza] abona amajwi 3%. Abandi baza bigisha ingengabitekerezo ya Jenoside bagahanywa n’amategeko.”

Amahitamo y’Abanyarwanda yayobeye Abanyamerika n’Abanyaburayi

Muzehe Tito yavuze ko abayobozi b’ibihugu bikomeye ku Isi ndetse n’imiryango mpuzamahanga batarabasha gusobanukirwa n’amahitamo y’Abanyarwanda ku Mukuru w’Igihugu cyabo bishimira ko atabatenguha mu kubageza ku cyerekezo cy’indoto zabo.

Yavuze ko impamvu bibagora kubyumva harimo kuba abayobozi b’i Burayi n’Amerika badakorera abaturage, ahubwo “bakorera udutsiko duto tw’abanyembaraga cyangwa abafite imitungo myinshi.”

Ati: “Ni cyo gituma iyo biyamamaza babeshya abaturage ngo bazakora ibi ni ibi ntihagire igikorwa. Abaturage babo usanga baranze abanyapolitiki, bavuga ko ari abanyabinyoma ko na Politiki ari ibinyoma, nyamara politiki ari ukuyobora  sosiyete ukayifasha gutera imbere.”

Yatanze urugero rushimangira uburyo abaturage benshi baba baratakarije icyizere abanyepolitiki, ari na yo mpamvu abaturage bitabira amatora baba ari bake cyane cyane ugereranyije n’abamerewe gutora.  Ati: “Birabatangaza  iyo babonye mu Rwanda amatora ari umunsi mukuru, abaturage bose bitabira.”

Mu gihe habura umwaka umwe gusa ngo 2024, Abanyarwanda benshi bakomeje kugaragaza ko biteguye kuzongera gushimangira igihango bafitanye na Kagame bongera kumuhundagazaho amajwi, mu gihe na we yamaze kwemeza ko yiteguye kongera kwiyamamariza kuyobora u Rwanda muri manda ya kane.

Birabavuna kubona umuyobozi uzana impinduramatwara muri Afurika

Patrice Emery Lumumba, Thomas Sankara n’abandi, ni ingero z’Abanyafurima bagiye bicwa cyangwa bagatotezwa kubera umuvuduko udasanzwe bagiye bagambanirwa n’ibihugu byo mu Burengerazuba bw’Isi bitifuza ko Abanyafurika bakanguka, kuko byaba bivuze ko imbehe ya benshi yubamye.

Muzehe Tito yavuze ko Abayobozi b’impinduramatwara bashinzwe guhindura sosiyete barwanya ubukene n’ubujiji, baha abaturage babo agaciro, bikaba bigabanya ububasha amahanga abafiteho mu kubakoresha ibyo yishakiye, ahubwo bagahinduka abafatanyabikorwa na yo.

Yagize ati: “Abanyaburayi barabitinya kuko iyo abaturage bajijutse kandi bagatera imbere, bashaka ubwigenge ntabwo baba bakemera igitugu cy’abanyaburayi. Barabarwanya: bakoresha amafaranga batanga nk’imfashanyo kugira ngo babone uko bagushyiraho igitugu cyo gukora ibyo bashaka cyangwa se bakayaha abarwanya Leta ngo bakurwanye.”

Zimwe mu ntwaro kirimbuzi bakoresha harimo imiryango minini y’ubukungu nk’Ikigega Mpuzamahanga cy’Ubukungu (IMF) na Banki y’Isi, imiryango y’ubutabera nka ICC, iy’uburenganzira bwa muntu nka Human Right Watch n’Indi miryango itegamiye kuri Leta.

Yavuze ko hejuru ya byose, haza intwaro ikomeye y’itangazamakuru ryabo ryifashishwa mu gucura imvugo no guhindura ukuri hagamijwe impamvu za Politiki. Kuri ibyo hiyongeraho no gukoresha amadini bashinze agahindura imyemerere n’indangagaciro z’Abanyafurika.

  • NTAWITONDA JEAN CLAUDE
  • Nyakanga 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE