Depite Mbonimana yeguye, bihuzwa n’ubusinzi Perezida Kagame yamaganye

  • NTAWITONDA JEAN CLAUDE
  • Ugushyingo 14, 2022
  • Hashize umwaka 1
Image

Mbonimana Gamariel wari Umudepite Mu Nteko Ishinga Amategeko y’u Rwanda yeguye ku ku mirimo ye, abantu benshi mu bakiriye ayo makuru bahita babihuza n’ikibazo cy’ubusinzi Perezida wa Repubulika Paul Kagame aheruka kuvuga kuri umwe mu Badepite washyizweho igipimo kikenda guturika.

 Visi Perezida w’Umutwe w’Abadepite Hon Mussa Fazil Harerimana, yavuze ko bakiriye ubwegure bwa Depite Mbonimana Gamariel, ndetse anemeza ko mu ibaruwa yandikiye ubuyobozi yemeje ko yeguye ku mpamvu ze bwite.

Mbonimana w’imyaka 42 y’amavuko yari ahagarariye Ishyaka rya PL(Parti Liberal), akaba yarinjiye mu Nteko Ishinga Amategeko mu mwaka wa 2018.

Mu gitondo cyo kuri uyu wa Mbere taliki 14 Ugushyingo 2022, ni bwo yashyikirije Inteko Ishinga Amategeko ibaruwa y’ubwegure bwe.

Ubwo yaganirizaga abitabiriye Ihuriro rya 15 ry’Umuryango Unity Club mu mpera z’icyumweru gishize, ni bwo Perezida Kagame yahishuye ko yakiriye raporo ya Polisi y’umwe mu Depite wananiranye kubera ubusinzi, ndetse ko yafashwe inshuro zirenga imwe atwaye imodoka yasinze.

Yagize ati: “Bakoze raporo y’umuntu bafashe, ni umwe mu bagize Inteko Ishinga Amategeko yacu; bafashe yanyoye bapimye igipimo cyari kigiye guturika kubera alukoro yanyoye. Hanyuma baza gusangano mu makuru ye babitse, basanga bamufashe nk’inshuro eshanu, ubwo bwari ubwa gatandatu. Ibingibi babona imodoka mu nzira igenda ikubita hirya hino, amahirwe agira ngira ngo ntabwo arica umuntu ariko ni yo maherezo. Kimwe cyo aziyica cyangwa se azica umuntu wundi.”

Umukuru w’Igihugu avuga ko yagize ikibazo kuri izo raporo za Polisi, yamufashe inshuro zigera kuri esheshatu igakomeza kumurekura kandi ari ikibazo kuri sosiyete kuko atiyambuye ubuzima ntiyazabura n’abandi abwambura mu bo basangira umuhanda igihe atwaye yasinze.

Ati: “Bavuga uko bamufashe, ibipimo biri hejuru y’ibisanzwe. Ubanza atari yazinyoye gusa, ubanza yari yaguyemo. Hanyuma baravuga ngo ariko ngo abagize Inteko Ishinga Amategeko bafite ubudahangarwa, ubwo bamuretse aragenda… Mbibonye mpamagara Umuyobozi wa Police, nti wowe muyobozi wa Polisi umuntu ufite ubudahangarwa inshuro eshanu cyangwa esheshatu, umunsi se yishe umuntu na bwo ni ubudahangarwa? Ubu azagonga umuntu amwice ibyo bibe ubudahangarwa?”

Yakomeje asobanura ko ubudahangarwa budakwiye kuba icyuho cyo gukora ibyaha no gushyira ubuzima bw’abaturage mu kaga, anagaragaza icyo Polisi yakabaye yarakoze mbere y’ibindi byose, birimo kumwambura uruhushya rwo gutwara ibinyabiziga batitaye ku wo ari we, no kumenyesha Inteko Ishinga Amategeko imyitwarire ye idahwitse.

Ati: “Nasanze rero muri ibyo byose nta cyo bakoze baretse aragenda. Ndavuga nti eeeeeh! Sasa mwebwe ni mwe muri bujye mu mwanya we nimutareba neza…”

Perezida Kagame yihanangirije abayobozi bitwaza inshingano bahabwa n’itegeko bakarenga kuri ya mategeko yazibahaye. Biteganyijwe ko abagize Sena baza gukora Ikiganiro n’abanyamakuru cyibanda ku gusobanura byimbitse ubudahangarwa ugize Inteko Ishinga Amategeko afite muri sosiyete.

  • NTAWITONDA JEAN CLAUDE
  • Ugushyingo 14, 2022
  • Hashize umwaka 1
TANGA IGITEKEREZO
nsanzimana Jerome says:
Ugushyingo 14, 2022 at 11:02 am

Ariko igihe cyose nyakubahwa azahora yibutsa inzego zitandukanye ibyo bakagombye gukora biri logique ?Cyakora icyo nkundira H E P.Kagame nuko ibyemezo bye biba biba ariko kuri.Kandi akunda abanyarwanda cyane rubanda rugufi.Turamukumbuye I Runavu

Andika igitekerezo

AMATEGEKO AGENGA IYANDIKA RY'IGITEKEREZO CYAWE