Denmark igiye gufungura ibiro byakira abimukira mu Rwanda

  • NTAWITONDA JEAN CLAUDE
  • Kanama 19, 2022
  • Hashize imyaka 2
Image

Guverinoma ya Denmark yatangaje ko igiye gufungura ibiro mu Mujyi wa Kigali bishinzwe kwakira abimukira n’abasaba ubuhungiro, nka kimwe mu bigize gahunda y’icyo gihugu yo gutangiza santeri yakira abimukira cyohereje by’agateganyo mu Rwanda.

Minisitiri ushinzwe Abinjira n’Abasohoka muri Denmark Kaare Dybvad Bek, yatangaje ko Denmark itangiye uwo mushinga mu gihe isangiye n’u Rwanda intumbero yo guharanira imibereho myiza n’ubuzima buhesha agaciro abimukira n’abasaba ubuhungiro aho baba baturuka hose mu bice by’Isi.

By’umwihariko, ni mu rwego rwo kurwanya ubwimukira bukorwa mu buryo bunyuranyije n’amategeko kandi bushyira ubuzima bw’Abanyafurika bambuka Inyanja ya Méditerranée, bamwe bakahasiga ubuzima bataragera iyo berekeza ku Mugabane w’i Burayi.

Kaare Dybvad Bek yagize ati: “Intego duhuriyeho ni iyo guhindura imikorere y’ubwimukira iriho ubu ifite ibibazo no guharanira ahazaza h’agaciro kandi harambye ku mpunzi n’abimukira. Bityo nishimiye ko mu bihe bya vuba tuzafungura ibiro mu Rwanda.”

Igihugu cya Denmark ni cyo cya mbere cyamenyekanye ko gishaka kwigana ubufatanye u Bwongereza bwagiranye n’u Rwanda bwo kohereza abimukira n’abasaba ubuhungiro bagafashirizwa i Kigali by’agateganyo mu gihe bashakirwa ibisubizo birambye.

Ku ya 20 Mata 2022 ni bwo abayobozi ba Denmark bahishuye ko batangiye ibiganiro na Leta y’u Rwanda aho bifuza kugirana ubufatanye bwo muri uru rwego kuko bubonwa nk’igisubizo kirambye ku kibazo cy’abimukira binjira mu buryo bunyuranyije n’amategeko n’icuruzwa ry’abantu mu bihugu byo mu Majyaruguru y’Umugabane w’u Burayi.

Minisiteri y’Ububanyi n’Amahanga ya Denmark yatangaje ko ibiro by’uyu mushinga bigiye gufungurwa i Kigali bizafasha Leta ya Denmark kurushaho kwagura ubutwererane isanzwe ifitanye n’u Rwanda mu nzego zitandukanye ibihugu byombi bihuriyeho nko guhangana n’imihindagurikire y’ikirere, kwimakaza imiyoborere myiza byiyongera kuri iyo gahunda yo kwita ku bimukira n’abasaba ubuhungiro.

Ibyo biro kandi biteganyijwe ko bizubahiriza amasezerano y’ubutwererane yasinywe hagati y’ibihugu byombi mu mwaka ushize. Amasezerano ya mbere ni ajyanye n’ibibazo by’abimukira n’abasaba ubuhungiro ndetse n’andi ajyanye no kwimakaza ibiganiro bya Politiki n’ubutwererane.

Gufasha abimukira ni gahunda yashyizwemo imbaraga na Minisitiri w’Intebe Mette Frederiksen ikaba yaranatorewe itegeko n’Inteko Ishinga Amategeko ya Denmark muri Kamena 2021.

Itegeko rishimangira ko abimukira bazajya boherezwa mu bihugu by’abafatanyabikorwa mu gihe ubusabe bwabo bwo guhabwa aho batura mu gihugu burimo kugenzurwa.

Nubwo ari gahunda itaragiye ivugwaho rumwe n’abaharanira uburenganzira bwa muntu ndetse na bamwe mu banyamategeko b’i Burayi, ni yo mahitamo yonyine ahanzwe amaso mu gukemura ibibazo biri mu ruhererekane rw’ubwimukira n’ubuhunzi.

  • NTAWITONDA JEAN CLAUDE
  • Kanama 19, 2022
  • Hashize imyaka 2
TANGA IGITEKEREZO
Faustin Banza Higiro says:
Kanama 19, 2022 at 4:34 pm

Niko tayari na mimi. Jina langu Faustin Banza Higiro kutoka Congo Kinshasa nimber zangu sa Whatsapp +243997266381

Andika igitekerezo

AMATEGEKO AGENGA IYANDIKA RY'IGITEKEREZO CYAWE