Cricket: Tanzania na Nigeria zakomeje mu cyiciro cya nyuma cyo gushaka itike y’igikombe cy’Isi

Kuva taliki 01 kugeza 09 Ukuboza 2022 mu Rwanda habereye imikino y’irushanwa ryo gushaka itike y’igikombe cy’Isi 2024 mu mukino wa Cricket mu bagabo  “ICC Men’s T20 World Cup 2024” ku rwego rw’Afurika  mu itsinda B “ICC Men’s T20 World Cup Africa Sub-Regional Qualifier  Group B”.

Iyi mikino yo mu itsinda B  yahuje ikipe ya Cameroun, Eswatini, Gambia, Ghana, Mozambique, Nigeria, Sierra Leone na Tanzania. Nyuma y’uko aya makipe yakinnye hagati yayo, ikipe ya Tanzania na Nigeria ni zo zabonye itike yo gukomeza mu cyiciro cya nyuma cyo gushaka itike “Africa Regional Final Qualifier”.

Ku munsi wa nyuma w’iyi mikino yabereye muri Sitade Mpuzamahanga ya Gahanga  no  muri IPRC Kigali, taliki 09 Ukuboza 2022, ikipe ya Tanzania yitwaye neza itsinda Cameroun naho ikipe ya Nigeria itsinda Ghana.

Mu yindi mikino, ikipe ya Gambia yatsinze Cameroun naho Mozambique itsinda Sierra Leone.

Nyuma y’iyi mikino, ikipe ya Tanzania  ni yo yegukanye umwanya wa mbere n’amanota 13 ikurikirwa  na Nigeria  n’amanota 13, ku mwanya wa 3 haje Mozambique  (10), Sierra Leone (8), Ghana (6), Eswatini (3), Gambia (2) na Cameroun ku mwanya wa nyuma  wa 8 n’inota rimwe.

Ikipe ya Tanzania na Nigeria (Itsinda B)  zikaba zasanze ikipe ya Kenya n’u Rwanda (Itsinda A) ziyongera kuri Uganda, Zimbabwe na Namibia zo zitakinnye imikino  yo mu matsinda zikaba zizakina imikino ya  nyuma yo gushaka itike “Africa Regional Finals” izabera muri Namibia mu Kwakira 2023. Amakipe abiri ya mbere  akaba ari yo azabona itike y’igikombe cy’Isi “ICC Men’s T20 World Cup 2024” kizabera muri West Indies na  USA muri Kamena 2024.