Cricket : Indatwa Hampshire CC yegukanye irushanwa “RCA Dafabet T20” mu bagore

Taliki 04 Kamena 2023 kuri Sitade Mpuzamahanga ya Gahanga hasojwe irushanwa “RCA Dafabet Women’s T20 Tournament 2023” aho ikipe ya Indatwa Hampshire CC yegukanye igikombe itsinze ku mukino wa nyuma ikipe ya Sorwathe CC.

Iri rushanwa ryateguwe n’ishyirahamwe ry’umukino wa Cricket mu Rwanda “RCA” ku bufatanye na Dafabet ryatangiye taliki14 Gicurasi 2023 aho ryitabiriwe n’amakipe 5 asanzwe akina shampiyona y’icyiciro cya mbere mu bagore ari yo Gahanga Queens CC, Indatwa Hampshire CC, Charity CC, Sorwathe CC na White Clouds CC.

Aya makipe yakinnye hagati yayo  hanyuma ikipe ya Indatwa Hampshire CC isoza iyoboye n’amanota 8 ikurikirwa na  Sorwathe CC (6), Gahanga Queens CC (4), Charity CC (2) na White Clouds CC (0).

Mu gusoza iri rushanwa, ikipe ya mbere yahuye n’iya kabiri mu guhatanira igikombe naho iya 3 n’iya 4 zihatanira umwanya wa 3.

Ikipe ya Indatwa Hampshire CC yitwaye neza itsinda  Sorwathe CC ihita yegukana igikombe.

Mu guhatanira umwanya wa 3, ikipe ya Gahanga Queens CC yitwaye neza itsinda Charity CC.

Ikipe ya  Indatwa Hampshire CC yegukanye igikombe yahawe sheki ya  miliyoni 1 y’amafaranga y’u Rwanda  aho  ikipe ya  Sorwathe CC yabaye iya kabiri  ihabwa ibihumbi 500.

Mu bakinnyi ku giti cyabo bahawe ibihembo, Ishimwe Gisele (Indatwa Hampshire CC) yahawe igihembo cy’uwarushije abandi gukubita  agapira “Best Batter” akaba yarahawe ibihumbi 100 by’amafaranga y’u Rwanda.

Sifa Ingabire (Indwatwa Hampshire CC) yahawe igihembo n’uwarushije abandi gukina mu kibuga hagati “Best Fielder” anahabwa ibihumbi 70.

Ishimwe Henriette  ukinira ikipe ya Indatwa Hampshire  yahawe ibihembo 3 birimo icy’uwahize abandi mu gutera agapira “Best Bowler”, yahawe ibihumbi 100. Yegukanye igihembo  cy’uwatsinze amanota 6 inshuro nyinshi  zigera kuri 6 “Most Six” ahabwa ibihumbi 70 ndetse anahembwa nk’umukinnyi witwaye neza mu irushanwa ryose “Player of the Tournament” aho yahawe ibihumbi 200.

Nyuma yo kwegukana iki gikombe, umutoza mukuru wa Indatwa Hampshire CC, Hirwa Eric  yavuze ko  bafashe umwanya  bakareba amakosa bakoze mu marushanwa aheruka ari yo mpamvu bitwaye neza bagasoza iri rushanwa badatsinzwe.

Umuyobozi ushinzwe ibikorwa muri RCA, Byiringiro Emmanuel yagaragaje ko bishimira uko irushanwa ryagenze kandi ko ryatumye abakinnyi  bazamura urwego rwabo rw’imikinire.Yakomeje avuga ko abahamagawe mu ikipe y’igihugu bagomba guhita batangira umwiherero bitegura irushanwa ryo Kwibuka   “ Kwibuka Cricket Women’s Tournament 2023”rizatangira 08 rigasozwa 18 Kamena 2023 rikaba rizitabirwa n’amakipe 5 ari yo  Botswana, Nigeria, Kenya na Uganda n’u Rwanda.

Iri rushanwa  ryabaye rikurikira   irindi “Dafabet RCA T10 Women’s Tournament 2023” ryakinwe taliki 04 kugeza 12 Werurwe 2023 aho ryegukanwe n’ikipe ya Charity CC itsinze Indatwa Hampshire CC ku mukino wa nyuma.