Cricket: Ikipe y’u Rwanda yatsinzwe umukino wa mbere mu  irushanwa ryo Kwibuka

  • Imvaho Nshya
  • Kamena 10, 2022
  • Hashize imyaka 2
Image

Rwanda 68-69 Uganda

Kenya 137-102 Botswana

Brazil 53-56 Nigeria

Taliki 10-06-2022

Kenya-Uganda (Gahanga-09h30)

Botswana-Tanzania (IPRC Kigali-09h30)

Rwanda-Brazil (Gahanga-13h30)

Germany-Nigeria (IPRC Kigali-13h30)

Ikipe y’u Rwanda yatangiye itsindwa mu irushanwa mpuzamahanga ryo   kwibuka abazize Jenoside yakorewe Abatutsi mu 1994 “Kwibuka Women’s T20I Tournament 2022”.

Uyu mukino wabaye kuri uyu wa Kane taliki 09 Kamena 2022 kuri Sitade mpuzamahanga ya Gahanga, ikipe y’u Rwanda yatsinzwe na Uganda.

Muri uyu mukino, ikipe y’u Rwanda ni yo yabanje gukubita agapira ishaka amanota “Batting”  maze mu dupira 115 (19.1 overs) ikora amanota 68 mu gihe abakinnyi 10 bavuye mu kibuga.

Ikipe ya Uganda kugira ngo yegukane intsinzi yasabwaga  gutsinda amanota 69. Iyi kipe  yegukanye iri rushanwa muri 2014 na 2016   yatangiye gukubita agapira ishaka amanota “Batting” maze mu dupira 84  (14 overs) ikora amanota 69 mu gihe abakinnyi 4 ari bo bari bavuye mu kibuga (4 wickets).

Umukinnyi wa Uganda, Consylate Awekonimungu ni we watowe nk’uwitwaye neza muri uyu mukino  aho yateye udupira 24 (4 Overs) agakura abakinnyi 2 b’u Rwanda mu kibuga.

Ikipe y’u Rwanda
Ikipe ya Uganda

Hari indi mikino yabaye

Mu yindi mikino yabaye, ikipe ya Kenya ifite igikombe giheruka (2021) yatangiye neza aho yatsinze ikipe y’igihugu ya Botswana.

Muri uyu mukino wabereye  muri IPRC Kigali, ikipe ya Kenya yatangiye ikubita agapira ishaka amanota “Batting” maze mu dupira 120 twatewe na Botswana ikora amanota 137 , mu gihe abakinnyi 6 ari bo basohowe mu kibuga (6 wickets).

Ikipe ya Botswana yatangiye gukubita agapira ishaka amanota “Batting” aho yasabwaga amanota   138 kugira ngo yegukane intsinzi. Mu dupira 120, Botswana yakoze amanota 102  mu gihe abakinnyi 7 bavuye mu kibuga (7 wickets).

Mary Mwangi ukinira Kenya ni we wabaye umukinnyi witwaye neza muri uyu mukino. Umukinnyi wa Botswana, Oratile Kgeresi ni bwo yari akinnye ku nshuro ya mbere umukino mpuzamahanga.

Umukino wasoje umunsi wa mbere wahuje ikipe ya Brazil na Nigeria. Ikipe ya Brazil yari ikinnye umukino wayo wa mbere muri Afurika yatangiye ikubita agapira ishaka amanota “Batting” maze mu dupira 92 (15.2 Overs) ikora amanota 53 mu gihe abakinnyi 10 basohowe mu kibuga.

Ikipe ya Nigeria yasabwaga amanota 54 yatangiye gukubita agapira ishaka amanota “Batting” maze mu dupira 65 (10.5 overs) ikora amanota 56 ihita yegukana intsinzi.

Umukinnyi Eseigbe Favour ukinira Nigeria ni we watowe nk’uwitwaye neza muri uyu mukino. Abakinnyi Carolina Nascimento, Maria Silva (Brazil) na Rukayat Abdulrasaq (Nigeria) ni inshuro ya  mbere bari bakinnye irushanwa mpuzamahanga.

Gahunda y’imikino y’umunsi wa kabiri

Imikino irakomeza kuri uyu wa Gatanu taliki 10 Kamena 2022 aho ikipe ya Kenya ikina na Uganda (09h30) kuri Sitade mpuzamahanga ya Gahanga mu gihe ikipe ya Botswana ikina na Tanzania muri IPRC Kigali.

Guhera saa saba n’igice (13h30) kuri Sitade ya Gahanga, ikipe y’u Rwanda irakina na Brazil naho muri IPRC Kigali , ikipe y’u Budage ikine na Nigeria.

Iri rushanwa ribaye ku nshuro ya 8 ryitabiriwe n’amakipe 8 ari yo u Rwanda, Kenya, Uganda, Nigeria, Botswana, Tanzania, Brazil n’u Budage.

  • Imvaho Nshya
  • Kamena 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE