Kuri uyu wa Kabiri taliki 01 Ugushyingo 2022, ikipe y’u Rwanda mu bagabo mu mukino wa Cricket yakinnye umukino wa kabiri wa gicuti n’ikipe y’igihugu ya Tanzania.
Iyi mikino ya gicuti irimo kubera i Dar es salaam muri Tanzania yatangiye ku wa Mbere taliki 31 Ukwakira 2022 aho ikipe ya Tanzania yatsinze u Rwanda umukino wa mbere ku kinyuranyo cy’amanota 54.
Mu mukino wa kabiri, ikipe ya Tanzania yatangiye ikubita agapira ishaka amanota “Batting” maze mu dupira 120 (20 Overs) ikora amanota 130 mu gihe abakinnyi 6 basohowe mu kibuga (6 Wickets).
Ikipe y’u Rwanda yasabwaga amanota 131 yatangiye gukubita agapira ishaka amanota “Batting” maze mu dupira 120 (20 Overs) ikora amanota 109 mu gihe abakinnyi 6 ari bo basohowe mu kibuga (6 Wickets).
Ibi byatumye ikipe ya Tanzania yegukana intsinzi y’uyu mukino wa kabiri wa gicuti ku kinyuranyo cy’amanota 21.
Kuri uyu wa Gatatu taliki 02 Ugushyingo 2022, ikipe y’u Rwanda na Tanzania zirakina umukino wa gicuti wa gatatu guhera saa tatu (09h00) muri Tanzania akaba ari saa mbiri (08h00) mu Rwanda gusa harakinwa udupira 300 (50 Overs).
Iyi mikino irimo kubera ku kibuga Annadil Burhani ikaba iri mu rwego rwo gufasha aya makipe yombi kwitegura irushanwa rizabera mu Rwanda ryo gushaka itike y’igikombe cy’Isi “ICC Men T20 World Cup qualifiers”.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE