Cricket : Ikipe ya Tanzania nyuma yo gutsinda u Budage irakina n’u Rwanda 

Tanzania 147- 89 Germany

Taliki 14-06-2022

Kenya-Nigeria (Gahanga-09h30)

Rwanda-Tanzania (IPRC Kigali-09h30)

Botswana-Germany (Gahanga-13h30)

Brazil-Uganda (IPRC Kigali-13h30)

Kuri uyu wa Mbere taliki 13 Kamena 2022, imikino  y’irushanwa ryo Kwibuka  “Kwibuka Women’s T20I Tournament 2022” yari yakomeje ahabaye umukino umwe aho ikipe ya Tanzania yatsinze u Budage.

Muri uyu mukino wabereye kuri Sitade mpuzamahanga ya Gahanga, ikipe ya Tanzania yatangiye ikubita agapira ishaka amanota maze mu dupira 120 (Overs 20) itsinda amanota 147, abakinnyi 7 basohorwa  mu kibuga (7 Wickets).

Ikipe y’u Budage yasabwaga amanota 148 ngo yegukane intsinzi yatangiye gukubita agapira ishaka amanota «Batting» maze mu dupira 120 (Overs 20) ikora amanota 89, ikipe ya Tanzania yegukana intsinzi ku kinyuranyo cy’amanota 58.

Nasra Saidi ukinira ikipe ya Tanzania ni we watowe nk’umukinnyi witwaye neza muri uyu mukino.

Ikipe ya Tanzania nyuma yo gutsinda u Budage  ni yo iyoboye urutonde n’amanota 8 aho itaratsindwa umukino n’umwe. Ikurikiwe na Nigeria na Kenya zifite amanota 6, Uganda, u Rwanda na Brazil  zifite amanota 4. Ku mwanya wa 7 hari Botswana naho ku mwanya wa nyuma wa 8 hari u Budage aho zose nta nota na rimwe zifite.

Gahunda y’imikino y’umunsi wa 6

Kuri uyu wa Kabiri taliki 14 Kamena 2022, imikino y’irushanwa ryo Kwibuka irakomeza aho igeze ku munsi wayo wa 6.  Ikipe ya Kenya irakina na Nigeria i Gahanga (09h30), ikipe y’u Rwanda ikine na Tanzania muri IPRC Kigali (09h30). Ikipe ya Botswana irakina n’u Budage i Gahanga (13h30) naho Brazil ikine na Uganda muri IPRC Kigali (13h30).