Cricket: Ikipe ya Sorwathe CC yegukanye igikombe  cya shampiyona mu bagore

  • Imvaho Nshya
  • Gicurasi 23, 2022
  • Hashize imyaka 2
Image

Ku Cyumweru taliki 22 Gicurasi 2022 ni bwo hasojwe shampiyona y’icyiciro cya mbere n’icya kabiri  mu mukino wa Cricket mu bagore “ 2022 RCA T20 Cup Women Division 1 & Division 2”.

Ikipe ya Sorwathe CC ni yo yegukanye igikombe mu cyiciro cya mbere nyuma yo  gutsinda  ku mukino wa nyuma ikipe ya Indatwa Hampshire CC.

Muri uyu mukino wabereye kuri Sitade Mpuzamahanga ya Gahanga, Sorwathe CC ni yo yatangiye ikubita agapira ishaka amanota “Batting” aho yakoze amanota 72 mu dupira 120 (Overs 20) , abakinnyi 8 bava mu kibuga (8 Wickets).

Ikipe ya Indatwa Hampshire CC yatangiye gukubita agapira  na yo ishaka amanota  “Batting” maze mu dupira 116 (Overs 19.2) ikora amanota 72 abakinnyi bayo 10 bava mu kibuga (10 Wickets).

Kuko aya makipe yanganyaga amanota 72 kuri 72, hongeweho udupira 6 kuri buri kipe “Super Over”.

Ikipe ya Indatwa Hampshire CC ni yo yabanje gukubita agapira   «Batting » maze ikora amanota 11 mu dupira 6 (Over 1). Ikipe ya Sorwathe CC yasabwaga gutsinda amanota 12 igahita yegukana intsinzi. Mu dupira 4 (Overs 0.4 ) iyi kipe yahise ikora amanota 14 ihita yegukana igikombe.

Ikipe ya Sorwathe CC yegukanye igikombe

Umukinnyi Mukandayisenga Jeannette  ukinira ikipe ya Sorwathe CC  ni we witwaye neza muri uyu mukino.

Muri iki cyiciro amakipe 5 ni yo yari yitabiriye aho yakinnye hagati yayo maze ikipe ya  Indatwa Hampshire CC igasoreza ku mwanya wa mbere n’amanota 8 ikurikiwe na Sorwathe CC  n’amanota 6,  Charity CC ku mwanya wa 3 n’amanota  4, Queens of Victory CC ku mwanya wa 4 n’amanota  2 naho ku mwanya wa 5 haza Indorwa Women CC  aho nta nota na rimwe ifite.

Igikombe giheruka cyari cyegukanwe n’ikipe ya Charity CC ubu yasoreje ku mwanya wa 3 mu gihe ikipe ya Sorwathe CC   yari yasoreje ku mwanya wa 4.

Mu cyiciro cya kabiri  ho nta mukino  wa nyuma wabaye ahubwo  amakipe yakinnye hagati yayo umukino ubanza n’uwo kwishyura maze ikipe ya  White Clouds CC isoreza ku mwanya wa mbere n’amanota 12 aho yatsinze imikino yose yegukana igikombe.

Ku mwanya wa kabiri hasoreje Eastern Phoenix CC  n’amanota 6, Muhanga Zebra CC isoreza ku mwanya wa 3 n’amanota 4 naho Bugesera Dolphins CC isoreza ku mwanya  4 n’amanota 2.

Ikipe ya  White Clouds CC yegukanye igikombe cya shampiyona y’icyiciro cya kabiri

Ubuyobozi  bwa Sorwathe Ltd bwishimiye igikombe

Uyu mukino wa nyuma witabiriwe n’Umuyobozi Mukuru w’uruganda rw’icyayi “Sorwathe Ltd” rutera inkunga iyi kipe,  Rohith Peiris.  Nyuma yo kwegukana igikombe yatangaje ko bishimishije cyane kuko ubwo batangizaga umukino wa Cricket i Kinihira nta mwana wari uzi kuwukina.

Akomeza avuga ko ubu bamenye kuwukina kugeza no ku rwego rwo kwegukana igikombe.

Rohith Peiris avuga ko kwitwara neza  nta rindi banga ari ugukunda umukino no kwishimira kuwukina.

Umuyobozi Mukuru w’uruganda rw’icyayi “Sorwathe Ltd”,   Rohith Peiris

Uyu mukino warebwe  n’ababyeyi ba bamwe muri aba bakinnyi, Umuyobozi Mukuru wa Sorwathe Ltd, Rohith avuga ko bahisemo kuzana ababyeyi kugira ngo barebe aho abana babo bakina kandi byabaye byiza kuko babateye ishyaka ryo gutsinda.

Abakinnyi ba Sorwathe CC bari kumwe n’ababyeyi babo nyuma y’umukino

Ikipe ya Sorwathe CC kugeza ubu nta kibuga cyiza ifite  ariko muri gahunda, Umuyobozi Mukuru wa  Sorwathe Ltd, Rohith Peiris ashimangira ko  barimo kuvugana n’Akarere ka Rulindo  kugira ngo babahe ubutaka ubundi  bagitunganye.

Umutoza w’ikipe ya Sorwathe CC,  Rurangwa Landry yatangaje ko bibashimishije kwegukana igikombe kuko umwaka ushize basoreje ku mwanya wa 4.

 Yakomeje avuga ko iyi kipe  ya Indatwa Hampshire CC mu matsinda yabatsinze ku gapira ka nyuma  amanota 70 kuri 68. Ati : “ Kuba tubatsinze rero biradushimishije cyane”.

Umutoza w’ikipe ya Sorwathe CC,  Rurangwa Landry

Umutoza Rurangwa avuga ko aba bana badafite ikibuga cyiza bitorezaho  ariko kuba  batsinze, ababyeyi babo bakaba babaherekeje ari ikimenyetso cy’uko uyu mukino ukunzwe kuko hari n’ikipe y’abahungu ibarizwa mu cyiciro cya kabiri.

Akomeza avuga ko ubu icyo bagiye gukora  ari ugukomeza kuzamura abana kuko  bikorwa buri gihe.  Ati : “Aba bana mubonye hari abakinnye irushanwa ry’abatarengeje imyaka 15 muri 2018 ubu barakuze bafite imyaka hagati ya 17 na 18, hari abasigaye bitoza  bari hagati y’imyaka 13 na 14, urumva ko ni ugukomeza gushyira imbaraga  muri aba no gutegura ab’ejo hazaza.”

Ku ruhande rw’ishyirahamwe ry’umukino wa Cricket mu Rwanda “RCA”,  Uwimana Sonia ushinzwe iterambere ry’uyu mukino mu cyiciro cy’abagore yatangaje ko Cricket igeze ahashimishije kuko hamaze kuboneka abakinnyi benshi batangiye kwitabira imikino yo ku rwego rwo hejuru.

Akomeza avuga ko kuba ikipe itari iyo muri Kigali itwara igikombe ari icyerekana ko imbaraga bashyize muri uyu mukino ngo ugere hirya no hino  zirimo kugenda zitanga umusaruro.

Umuyobozi ushinzwe ibikorwa muri RCA, Byiringiro Emmanuel  avuga ko aya makipe yagaragaje umukino mwiza kuko wageze ku musozo ntawuzi iri butsinde. Yakomeje avuga ko habonetsemo n’abandi bakinnyi bafite impano bikaba bigaragaza ko mu Rwanda hari abakinnyi benshi b’abakobwa bakina umukino wa Cricket ku rwego rushimishije.

  • Imvaho Nshya
  • Gicurasi 23, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE