Cricket: Harasozwa imikino yo gushaka itike y’igikombe cy’Isi

  • NTAWITONDA JEAN CLAUDE
  • Ugushyingo 25, 2022
  • Hashize umwaka 1
Image

Malawi 39-37 Saint Helena

Rwanda 122-47 Seychelles

Botswana 116-122 Kenya

Rwanda 34-30 Mali

Taliki 25-11-2022

Botswana-Saint Helena (Gahanga-09h30)

Lesotho-Malawi (IPRC Kigali-13h45)

Kenya-Seychelles (Gahanga-09h30)

Rwanda-Lesotho (IPRC Kigali-13h45)

Kuri uyu wa Gatanu taliki 25 Ugushyingo 2022 ni bwo hasozwa imikino y’irushanwa ryo gushaka itike y’igikombe cy’Isi ku rwego rw’Afurika mu bagabo mu mukino wa Cricket «ICC Men’s T20 World Cup Sub Regional Africa Qualifier Group A 2022 ».

Mbere y’imikino y’umunsi wa nyuma wa 7, ku wa Kane taliki 24 Ugushyingo 2022 habaye imikino y’umunsi wa 6 aho ikipe ya Kenya yitwaye neza ikabona itike yo gukomeza mu cyiciro cya nyuma mu gihe ikipe y’u Rwanda na yo yatsinze imikino ibiri bikayongerera amahirwe yo gukomeza.

Mu mikino yabaye, ikipe y’u Rwanda  yatsinze Seychelles, umukino wabereye muri IPRC Kigali. Kuko uyu mukino watangiye utinze kubera ikirere hemejwe ko hagomba gukinwa udupira 78 (13 Overs).

Ikipe y’u Rwanda ni yo yatangiye ikubita agapira ishaka amanota « Batting » maze mu dupira 78 ( 13 Overs) ikora amanota 122 mu gihe abakinnyi 4 ari bo basohowe mu kibuga ( 4 Wickets).

Mu gice cya kabiri, ikipe ya Seychelles yasabwaga amanota 123 yatangiye gukubita  agapira ishaka amanota « Batting » maze mu dupira 78 (13 Overs) ikora amanota 47 mu gihe abakinnyi 8 ari bo basohowe mu kibuga (8 Wickets).

Ikipe y’u Rwanda yahise yegukana intsinzi ku kinyuranyo cy’amanota 75.

Muri uyu mukino, Dusingizimana Eric ni we wahawe igihembo cy’umukinnyi witwaye neza aho yanatsinze amanota menshi 66 mu dupira 42.

Mu mukino wa kabiri na wo wabereye muri IPRC Kigali, ikipe y’u Rwanda yitwaye neza itsinda Mali yakinaga umukino wayo wa nyuma muri iri rushanwa.

Muri uyu mukino, ikipe ya Mali yatangiye ikubita agapira ishaka amanota « Batting ». Ubwo yari imaze gukora amanota 30 mu dupira 75 (12.3 overs), abakinnyi bose basohowe mu kibuga (10 Wickets).

Mu gice cya kabiri ikipe y’u Rwanda yasabwaga amanota 31 yatangiye gukubita agapira “Batting” maze mu dupira 15 (2.3 Overs) ikora amanota 34 ihita yegukana intsinzi.

Muri uyu mukino, Irakoze Kevin ni we wahawe igihembo cy’umukinnyi witwaye neza.

Nyuma yo gutsinda iyi mikino yombi ikipe y’u Rwanda yahise igira amanota 10 inganya na Kenya iyoboye. Ibi bikaba biha amahirwe iyi kipe y’u Rwanda yo kubona itike yo gukomeza mu cyiciro cya  nyuma cyo gushaka itike y’igikombe cy’Isi.

Kenya  yamaze kubona itike

Ikipe ya Kenya mu mukino w’umunsi wa 6 yatsinze Malawi, umukino wabereye i Gahanga. Nyuma yo gutsinda uyu mukino ikipe ya Kenya yahise ibona itike yo gukomeza mu cyiciro cya nyuma   cyo gushaka itike.

Undi mukino wabaye, ikipe ya Malawi yatsinze Saint Helena. Uyu mukino wabereye i Gahanga.

Mbere yo gukina imikino isoza iri rushanwa, ikipe ya Kenya iyoboye urutonde n’amanota 10 inganya n’u Rwanda ruri ku mwanya wa kabiri. Ikipe ya Malawi iri ku mwanya wa 3 n’amanota 8. Ikipe ya Saint Helena iri ku mwanya wa 4 n’amanota 6, Botswana ku mwanya wa 5 n’amanota 5, Lesotho ku mwanya wa 6 n’amanota 4, Seychelles ku mwanya wa 7 n’amanota 3 naho Mali iri ku mwanya wa nyuma wa 8 n’amanota 2.

Gahunda y’imikino isoza irushanwa

Imikino y’umunsi wa 7 iteganyijwe kuri uyu wa Gatanu taliki 25 Ugushyingo 2022,  ikipe ya Botswana irakina na Saint Helena i Gahanga (09h30), Lesotho ikine na Malawi muri IPRC Kigali (13h45), Kenya ikine na Seychelles i Gahanga (09h30)   naho ikipe y’u Rwanda ikine na Lesotho muri IPRC Kigali (13h45).

  • NTAWITONDA JEAN CLAUDE
  • Ugushyingo 25, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE