CAN U-23: Ikipe y’u Rwanda yatangiye kwitegura Mali

  • Imvaho Nshya
  • Ukwakira 15, 2022
  • Hashize umwaka 1
Image

Taliki 22-10-2022

Rwanda-Mali (Huye)

Taliki 29-10-2022

Mali-Rwanda (Bamako)

Ikipe y’u Rwanda “Amavubi” mu batarengeje imyaka 23 yitwaye neza ikomeza mu cyiciro cya kabiri mu mikino yo gushaka itike y’imikino y’Afurika  mu batarengeje imyaka 23 “Africa U-23 Cup of Nations 2023” nyuma yo gusezerera ikipe ya Libiya.

Iyi kipe y’u Rwanda nyuma yo gukomeza, mu cyiciro cya kabiri izahura na Mali aho umukino ubanza uzabera i Huye   mu Rwanda taliki 22 Ukwakira 2022 naho umukino wo kwishyura ubere i Bamako  muri Mali taliki 29 Ukwakira 2022.

Mu rwego rwo kwitegura uyu mukino ubanza, ikipe y’u Rwanda U-23 kuva ku wa Gatanu taliki 14 Ukwakira 2022 iri mu Karere ka Huye aho yatangiye imyitozo.

Mu bakinnyi 23 bahamagawe, abakinnyi 5 bakinira APR FC bazasanga bagenzi babo taliki 17 Ukwakira 2022 nyuma y’umukimo wa shampiyona w’ikirarane iyi kipe  izakina na Police FC.

Ikipe y’u Rwanda “Amavubi U-23” yageze muri iki cyiciro cya kabiri nyuma yo gusezerera  Libiya ku bitego 4-4 mu mikino yombi. Taliki 22 Nzeri 2022, ikipe y’u Rwanda yatsindiwe muri Libiya ibitego 4-1. Mu mukino wo kwishyura wabereye i Huye taliki 27 Nzeri 2022, ikipe y’u Rwanda yitwaye neza itsinda Libiya ibitego 3-0 birangira ikipe y’u Rwanda ikomeje ku gitego yatsindiye hanze kuko amakipe yari yanganyije ibitego 4-4.

Mu cyiciro cya gatatu ari na cyo cya nyuma, ikipe izakomeza hagati y’u Rwanda na Mali izahura n’ikipe izaba yakomeje hagati ya Burkina Faso na Senegal.

Imikino ya CAN-23 izabera muri Maroc  muri Kamena 2023 aho  izitabirwa n’amakipe 8. Amakipe 3 ya mbere  azabona itike yo kuzaserukira Afurika mu mikino Olempike  “Summer Olympic Games 2024” izabera i Paris mu Bufaransa.

Abakinnyi 23 bahamagawe mu kwitegura Mali

Abanyezamu: Ishimwe Pierre (APR FC), Hakizimana Adolphe (Rayon Sports) na Ruhumuriza Clovis (Police FC).

Myugariro: Niyigena Clement (APR FC), Nsengiyumva Samuel (Gorilla FC), Niyonzima Faustin (Bugesera FC), Nshimiyimana Yunus (APR FC), Ishimwe Jean Rene (Marines FC) na Dylan Georges Francis.

Hagati: Rutonesha Hesbone (Gorilla FC), Nyamurangwa Moses (Sunrise FC), Hoziyana Kenedy (Bugesera FC) na Kamanzi Ashraf (Mukura).

Rutahizamu: Nyarugabo Moise (AS Kigali), Nsabimana Deny (Kiyovu), Ishimwe Anicet (APR FC), Irankunda Rodrigue (Gorilla FC), Hakim Amissi (Gasogi United), Niyonshuti M. Hakim (APR FC), Rudasingwa Prince (Rayon Sports), Gitego Arhur (Marines FC), Mugisha Desire (Vision FC) na Habimana Glen.

  • Imvaho Nshya
  • Ukwakira 15, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE