CAN 2023: RDC yasezereye Guinea Conakry ibona itike ya ½

  • SHEMA IVAN
  • Gashyantare 3, 2024
  • Hashize ibyumweru 4
Image

Ikipe y’Igihugu ya Repubulika Iharanira Demokarasi ya Congo (RDC) yatsinze iya Guinea ibitego 3-1, ibona itike ya ½ mu gikombe cy’Afurika.

Ku wa Gatanu, tariki 2 Gashyantare 2024, ni bwo hakomeje gukinwa imikino y’Igikombe cy’Afurika kiri kubera muri Côte d’Ivoire hakinwa imikino ya ¼.

Uyu mukino wabereye kuri Stade Alassane Ouattara d’Ebimpé, utangirana imbaraga ku mpande zombi kuko zatangiye kugera imbere y’izamu no kugaragaza inyota y’ibitego mu minota ya mbere.

Ku isegonda rya 45, Guilavogui yarengeje umupira Chancel Mbemba bisa n’aho yawukoze n’ukuboko ariko umusifuzi avuga ko nta kosa ryabayemo ahubwo bakwiye gutera koruneri.

RDC yahise ikanguka ihererekanya neza ndetse ku munota wa gatatu yirukankana umupira iwugeza mu rubuga rw’amahina rwa Guinea, Meschak Elia awuha Yoane Wissa wateye mu izamu ariko ku bw’amahirwe make uca hanze yaryo.

DRC yongeye kubona andi mahirwe ku munota wa 12 ubwo Moutoussamy Samuel ukina mu kibuga hagati yageragezaga ishoti rigana ku izamu ariko myugariro wa Guinea, Ibrahim Diakite aritambika awusubiza mu kibuga.

Ntibyatinze ku munota wa 16 Syli National yahise ibona penaliti yaturutse ku ikosa Mbemba yakoreye Mohamed Bayo mu rubuga rw’amahina.

Uyu rutahizamu yahise anayiterera ayishyira mu izamu, aba agize igitego cya gatatu mu irushanwa.

Kapiteni wa RDC yagaragaje ubuhanga yishyura iki gitego ku munota wa 27, atera ishoti mu izamu mu buryo butunguranye kuko abakinnyi benshi ba Guinea bakekaga ko ari mu ruhande atareba izamu ngo atsinde igitego ku mupira wari uvuye muri koruneri.

Iki gitego cyasubije RDC mu mukino ndetse na Guinea itangira kubona ko ishobora gutsinda ikindi gitego, ihitamo gusubira inyuma cyane kurusha uko yasatiraga mbere.

Mbere y’uko igice cya mbere cyarangiye amakipe yombi yabonye uburyo bukomeye. Kuri RDC, Wissa yashyize umupira mu rubuga rw’amahina ariko Cedric Bakambu atinda kuwukoraho na Guinea yahushije ubwa Bayo wageze imbere y’izamu akananirwa kuriteramo akawushyira hanze.

Amakipe yombi yagiye mu ikiruhuko anganya 1-1.

Igice cya kabiri cyatangiye amakipe asa n’aho ari kwiga imikinire mishya kuko Guinea yakiniraga mu mpande cyane cyane urw’iburyo ariko RDC yo ihitamo gukoresha hagati mu kibuga ariko iminota 60 irangira nto cyo birayamarira.

Umutoza wa Guinea, Kaba Diawara, yahise akora impinduka hakiri kare akura mu kibuga Sekou Sylla na Morgan Guilavogui ashyiramo Abdoulaye Touré na Facinet Conte. Uwa RDC, Sébastien Desabre yakuyemo Meschak Elia ashyiramo Silas.

Zombi zikimara gukora impinduka, Syli National yahise igera imbere y’izamu ku munota wa 62, Facinet, asigarana n’Umunyezamu wa RDC, Mpasi-Nzau wari wasohotse nabi ariko ananirwa kumurenza umupira ngo awushyire mu izamu.

Abakinnyi ba Guinea batangiye kwibaza ibibabayeho, Les Léopards ihita ibyaza umusaruro ayo mahirwe izamukana umupira iwugeza mu rubuga rw’amahina, Amadou Diawara ahita ashyira hasi rutahizamu wayo, umusifuzi Mustapha Ghorbal atanga penaliti.

Yoane Wissa yahise ahabwa amahirwe yo kuyitera ndetse ayishyira mu izamu neza ku munota wa 63, ateye ishoti rikomeye Ibrahim Koné ananirwa kuwukoraho.

Igitego cya gatatu cya RDC cyatsinzwe na Arthur Masuaku wateye neza ‘coup franc’ y’ishoti rikomeye ihita yijyana mu izamu ku munota wa 82.

Umukino warangiye Ikipe y’Igihugu ya RDC yatsinze iya Guinea ibitego 3-1, igera muri ½ cy’Igikombe cya Afurika, ikurikira Nigeria yakuyemo Angola iyitsinze igitego 1-0.

Iyi kipe ya RDC yaherukaga muri 1/2 mu 2015 aho yegukanye umwanya wa gatatu muri iyi mikino iheruka kuzamuramo igikombe mu myaka 50 ishize, ari nabwo iheruka ku mukino wa nyuma.

RD Congo igomba gutegeraza ikipe itsinda umukino wa ¼ hagati ya Côte d’Ivoire na Mali mu mukino uteganyijwe kuri uyu wa Gatandatu, tariki ya 3 Gashyantare 2024.

  • SHEMA IVAN
  • Gashyantare 3, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE