CAN 2023: Côte d’Ivoire yatangiye neza itsinda Guinea-Bissau (Amafoto)

  • SHEMA IVAN
  • Mutarama 14, 2024
  • Hashize amezi 4
Image

Côte d’Ivoire yakiriye Igikombe cy’Afurika cy’Ibihugu, yatangiye neza irushanwa itsinda Guinea-Bissau ibitego 2-0 mu mukino ufungura irushanwa wabereye kuri Sitade Alassane Ouattara-Ebimpé.

Imbere y’abarimo Perezida Alassane Ouattara wari witabiriye ibirori biryoheye ijisho byo gufungura irushanwa ribaye ku nshuro ya 34, Côte d’Ivoire yatangiye neza umukino isatira cyane izamu rya Guinée-Bissau.

Ku munota wa 4′ Côte d’Ivoire yafunguye amazamu ku igitego cyatsizwe na Seko Fofana wacenze ba myugariro ahita atera ishoti rikomeye  umunyezamu wa Guinée-Bissau Ouparine Djoco, ntiyashobora kugera ku mupira.

Cote d’Ivoire yarushaga cyane Guinea Bisasau yakomeje kubona uburyo bwo gutsinda igitego cya kabiri ariko ntibubyare umusaruro.

Ku munota wa 34′ Cote d’Ivoire yongeye kubona uburyo bwo gutsinda igitego cya kabiri, Seko Fofana ateye ishoti rikomeye umupira ukubita igiti cy’izamu.

Côte d’Ivoire yihariye umupira mu minota 15 ibanza nubwo Guinée-Bissau yanyuzagamo ikagera mu rubuga rw’amahina ariko kwishyura igitego bigakomeza kuba ingutu.

Mama Baldé wa Guinée-Bissau yacenze ba myugariro ba Côte d’Ivoire ku munota wa 29, yinjira mu rubuga rw’amahina, ariko ateye ishoti mu izamu rigera ku munyezamu Yahia Fofana ridakomeye, arifata yitonze.

Nyuma yaho, Jonathan Bamba yazamukanye umupira anyuze ku ruhande rw’iburyo, awuhereza Seko Fofana wari uhagaze neza inyuma gato y’urubuga rw’umunyezamu, atera ishoti rikomeye rikubita umutambiko w’izamu, umupira uhita ukurwaho n’Abanya-Guinea.

Igice mbere cyarangiye Côte d’Ivoire itsinze Guinea-Bisasau igitego 1-0 cya Seko Fofana.

Mu gice cya kabiri, Cote d’Ivoire yatangiye impinduka havamo Wilfried Singo, hinjiramo Serge Aurier ukinira Nottingham Forest yo mu Bwongereza.

Côte d’Ivoire yatangiye n’ubundi yataka cyane izamu rya Guinée-Bissau ishaka igitego cya kabiri cyo kwizera itsinzi.

Ku munota wa 58′ Côte d’Ivoire yabonye igitego cya kabiri cyatsizwe na Jean-Philippe Krasso nyuma y’ikosa ryakozwe na Opa Sangate wa Guinée-Bissau mu rubuga rw’amahina.

Umutoza wa Guinée-Bissau, Baciro Candé, yabonye ko imibare itangiye kuba myinshi ku munota wa 67, akura mu kibuga Carlos Mané, Mauro Rodrigues na Moreto Cassama, ashyiramo rutahizamu Franculino Gluda Djú, Ze Turbo na Carlos Mendes.

Hashize iminota itandatu gusa hahise haboneka uburyo bukomeye bwari kuvamo igitego cyabazwe ku mupira watewe na Gluda Djú ariko umunyezamu Yahya Fofana wa Côte d’Ivoire amubera ibamba, akuramo ishoti rikomeye yari ateye rijya muri koruneri.

Iminota 90 yarangiye Côte d’Ivoire itsinze Guinea Bisasau ibitego 2-0 biyihesha gutangirana amanota atatu mu Itsinda A.

Undi mukino muri iri tsinda urakinwa kuri iki Cyumweru hagati ya Nigeria na Guniea Equatorial saa kumi ku isaha ya Kigali.

Itsinda A rizasubira mu kibuga ku wa Kane, tariki ya 18 Mutarama 2024, ubwo Côte d’Ivoire izakina na Nigeria mu mukino itegerejwe n’abatari bake mu gihe Guniea Equatorial izakina na Guinea-Bissau.

Si iri tsinda rizakina gusa kuko na Misiri izakina na Mozambique, Ghana igakina na Cap-Vert mu Itsinda B.

Perezida wa FIFA Gianni Infantino yitabiriye umukino ufungura irushanwa rya CAN 2023
Abafana bari benshi kuri Stade Olympique Alassane Ouattara d’Ébimpé
Jean-Philippe Krasso ubwo yatsindaga igitego cya kabiri cya Cote D’Ivoire
  • SHEMA IVAN
  • Mutarama 14, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE