Cabo Delgado: Bafitiye icyizere Ingabo z’u Rwanda zabakijije ibyihebe

  • Imvaho Nshya
  • Nzeri 27, 2022
  • Hashize imyaka 2
Image

Nyuma y’umwaka umwe gusa mu Ntara ya Cabo Delgado, ahamaze imyaka irenga ine harahindutse isenga ry’ibyihebe byayogoje abaturage bigatuma abasaga 800,000 bava mu byabo, kuri ubu ubuzima bwongeye kugaruka ndetse abasaga 130,000 bamaze kugaruka mu byabo.

Imirimo itandukanye ya buri munsi irakomeje, aho abaturage bagaragaza icyizere cy’uko batazongera gutsimburwa mu byabo, mu gihe babona abasirikare n’abapolisi b’u Rwanda bahora bambariye kubarwanirira igihe cyose ibyihebe byahirahira bishaka kugaruka gusenya amahoro amaze kubakwa mu bice bitandukanye by’Intara ya Cabo Delgado.

By’umwihariko ku bufatanye bw’ingabo za Mozambique n’izoherejwe n’Umuryango w’Ubukungu w’Ibihugu by’Afurika y’Amajyepfo (SAMIM), Inzego z’umutekano z’u Rwanda zikomeje ibikorwa birimo gukuriirana ibyihebe mu zindi ntara byahungiyemo ndetse no gukomeza gufasha abaturage gusubira mu byabo.

Ibyo biri mu birushaho guha abaturage b’Intara ya Cabo Delgado icyizere cy’uko umutekano wabo wizewe nk’uko byagarutsweho n’Umuvugizi w’Ingabo z’u Rwanda (RDF) Brig. Gen. Ronald Rwivanga, mu kiganiro yagiranye n’itangazamakuru.

Mu gihe hashize umwaka u Rwanda rwohereje abapolisi n’abasirikare mu butumwa bwo guhangana n’ibyo byihebe byari bimaze guhitana abasivili barenga 3000, abaturage bo mu Mujyi wa Palma ubuzima bwaragarutse kuko basubiye mu mirimo yabo ya buri munsi, ubucuruzi n’ibindi bikorwa by’iterambere.

Brig. Gen. Rwivanga yagize ati: “Umwaka ushize ntabwo abantu bari benshi nk’uko mubabona hano. Ikigaragara ntabwo bari bafite icyizere cyo kugaruka mu byabo, ariko ubungubu ikigaragara hashize umwaka wose ngira ngo babonye ko inzego z’umutekano zacu zazanye amahoro n’umutekano ku buryo burambye.”

Yakomeje agira ati: “Abaturage bagize icyizere gihagije cyo kugira ngo bagaruke mu byabo. Buri gice cyagiye kigira uruhare rwo kwambura ibi byihebe ibice byari byarigaruriye. Palma ni wo Mujyi wa mbere twagezemo, ni ho twatangiriye ibikorwa byacu… Inzego z’umutekano zacu zamanutse ziva muri uyu Mujyi wa Palma zikomeza zerekeza Mocimboa da Pria mu mijyi itandukanye.”

Yakomeje agaragaza ko uyu mujyi wa Palma wibasiwe cyane n’ibyihebe kuko ari na wo urimo ishoramari riremereye ry’Ikigo cyitwa Total Energies na ryo rikaba ryari rimaze imyaka ine ridakora ariko kuri ubu ryarasubukuwe.

Mu bice ibi byihebe byari byarigaruriye, byo byarasenye ibikorwa remezo ariko ubu ubuzima bugenda bugaruka ndetse ibyinshi mu bikorwa remezo byamaze gusangwa n’abaturage basaga 130 bamaze gusubira mu byabo.

Yakomeje agira ati: “Kugira ngo amahoro abeho, ni uko ibikorwa byo gucunga umutekano bigomba gukomeza. Iyo abaturage babona ingabo zacu zibarindiye umutekano, bagira icyizere, kugira ngo basubire mu byabo bumva umwanzi adashobora kongera kugaruka. Ikosa rikunze kubaho ni uko abarwana abo ari bo bose barwana n’umwanzi bagera aho bakamwihorera akongera akagaruka muri ibyo birindiro yari arimo. Ariko abasirikare bacu icyo bakora ni uko bakomeza gukora ibikorwa byabo byo kurinda abaturage aho baba bari hose.”

Kuri ubu, ibyihebe bigendera ku matwara ya Kiyisilamu byarahashijwe, ndetse n’aho bigerageje kwisuganyiriza hose bihita bimenyekana bigacanwaho umuriro. Brig Gen. Rwivanga yatanze urugero rw’igikorwa cyise “Operation Volcano” giheruka ku bufatanye n’ingabo za SAMIM, aho ibyihebe byatsimbuwe mu birindiro byari byamaze gushinga ahitwa Macumia.

Umuhuzabikorwa w’inzego z’umutekano z’u Rwanda ziri mu butumwa bw’amahoro muri Cabo Delgado Maj. Gen. Eugene Nkubito, na we yashimangiye ko hagaragara impinduka zikomeye mu birebana n’umutekano w’Intara ya Cabo Delgado.

Ibyo binashimangirwa n’abaturage bo mu Mujyi wa Palma, barimo Sumail Buancu w’imyaka 35, ushimangira ko yari yaratakaje icyizere cyo kuzatahuka agasubira mu bye, ariko aho ingabo z’u Rwanda zaziye ibyo batashoboraga no kurota byarashobotse.

Uyu mucuruzi w’amangazini yagize ati: “Twasengeye cyane amahoro, ndetse mu by’amahirwe twarayabonye. Ubu turi gukora imirimo yacu mu mutuzo.”

Awa Ali Momadi, na we ni umubyeyi ucururiza amazi yo kunywa mu Mujyi, wongeyeho ati: “Dushimira Imana kuba dufite Abanyarwanda barimo gukorana n’Abanyamozambike mu kubohora Palma. Turishimye cyane.”

Uretse gukurikirana ibyihebe aho byaba bihungira hose muri iki gihugu, inzego z’umutekano z’u Rwanda zikomeje gukorana n’iza Mozambique ndetse n’ubuyobozi mu cyiciro cyo gusubiza ibintu mu buryo (stabilization Phase), aho abaturage basubira mu byabo bagakomeza guharanira iterambere bizeye umutekano usesuye.

  • Imvaho Nshya
  • Nzeri 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE