Byinshi kuri Laboratwari igezweho y’ubuvuzi bw’amatungo ya miliyari 13 Frw

  • ZIGAMA THEONESTE
  • Mutarama 10, 2024
  • Hashize amezi 2
Image

Guverinoma y’u Rwanda irimo kubaka Laboratwari igezweho yiswe ‘Veterinary Laboratory Complex’, izafasha abiga ubuvuzi bw’amatugo mu Rwanda kurushaho kongera ubumenyi n’ubunararibonye mu buvuzi bw’amarungo mu Rwanda.

Biteganywa ko iyo Laboratwari yatangiye kubakwa muri Kaminuza y’u Rwanda Koleji ya Nyagatare, izuzura miliyari 13.5 z’amafaranga y’u Rwanda.

Ubuyobozi bwa Kaminuza y’u Rwanda busobanura ko iyo Laboratwari gubatswe ari mu rwego rwo kuzamura urwego  ubuvuzi bw’amatungo,  kongera umusaruro w’amatungo no kwimakaza ikoranabuhanga muri urwo rwego.

Inzego z’ubuyobozi kandi zihamya ko iyo Laboratwari yitezweho kuba ahantu ho gukorera ubushakashatsi mu bya siyansi, isesengura, ubushakashatsi ku matungo yaba ayo mu ngo n’inyamaswa z’ishyamba ziri mu gihugu cyose ndetse no mu Karere u Rwanda ruherereyemo.

Raymond Ndikumana, Umuyobozi wungirije ushinzwe igenamigambi n’imiyoborere muri kaminuza y’u Rwanda yabwiye itangazamakuru ko iyo Laboratwari igezweho ije ari igisubizo kuri Kaminuza mu gutanga uburezi bufite ireme, kwimakaza ubushakashatsi bunoze, gahunda zo kwegera abaturage no guteza imbere imishinga itandukanye.

Ni umushinga kandi witezweho kongera umubare w’inzobere mu buvuzi bw’amatungo ndetse n’abatekinisiye bakora muri uru rwego cyane ko bakiri bake ugeranije n’abakenewe mu kwita ku matungo ndetse n’umubare w’amatungo ugenda wiyongera.

Kugeza ubu Inama y’Igihugu y’Abavuzi b’Amatungo igaragaza ifite abaganga b’amatungo 5000, kandi igahamya ko uwo mubare udahagije mu kuziba icyuho giterwa n’ubuke bw’abavuzi b’amatungo.

Ndikumana yagize ati: “Iyo nyubako irahagije, dufite intego yo  gutangiza porogaramu zitandukanye z’icyiciro cya gatatu cya Kaminuza na poragaramu  icyenda zo gukomeza  iterambere ry’umwuga (CPD). Bivuze ko hagamijwe kongerera ubushobozi umubare munini w’inzobere muri serivisi zitanzwe kinyamwuga, gutanga  ubumenyi bugezweho mu buvuzi bw’amatungo, kongera umusaruro  w’ubworozi bw’amatungo no kwimakaza ikoranabuhanga.”

Ndikumana kandi yanavuze ko kubaka iyo nyubako bizatwara amafaranga y’u Rwanda miliyari 8 mu gihe ibikoresho bizakenerwa bifite agaciro ka miliyari 5.5 Frw.

Ati: “Mu gihe amafaranga akenewe azaba yabonetse,iyi nyubako izuzura bitarenze mu mpera za 2024 cyangwa muri 2025 hagati”.

Ni umushinga Ndikumana avuga ko uje gushyigikira impinduka n’amavurura muri Porogaramu za Kaminuza y’u Rwanda isanzwe ifite yo kuvurura uburezi butangwa mu mashami yayo.

Iyo Laboratwari igezweho yigisha ubuvuzi bw’amatungo yitezweho kuzagirwa ishami (College) ryigisha ubuvuzi bw’amatungo (College of Veterinary Medicine, Animal Production and Sciences).

Kugeza ubu ishimi ryigisha ubuvuzi bw’amatungo ribarizwa muri  Koleji y’Ubuhinzi Ubumenyi n’Ubuvuzi bw’amatungo (CAVM), iri mu Karere ka Musanze mu Ntara y’Amajyaruguru.

Ndikumana yagize ati: “Turifuza ko Ishami ry’Ubumenyi bw’amatungo  n’ubuvuzi bw’amatungo biherera mu koliji imwe, uwo mushinga wagejeje ku bagize guverinoma kugira ngo wemezwe.”

  • ZIGAMA THEONESTE
  • Mutarama 10, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE