Byinshi ku ruzinduko rw’Intumwa ya Korea y’Epfo mu Rwanda

  • NTAWITONDA JEAN CLAUDE
  • Kanama 14, 2023
  • Hashize amezi 6
Image

Mu mpera z’icyumweru gishize ni bwo Minisitiri w’Ububanyi n’Amahanga wa Korea y’Epfo Park Jin, yasuye u Rwanda abonana n’abayobozi batandukanye barimo Perezida wa Repubulika Paul Kagame bahuye ku wa Gatandatu taliki 12 Kanama 2023.

U Rwanda ni kimwe mu bihugu Minisitiri Park Jon yagiriyemo uruzinduko rw’akazi rw’iminsi ine aho yazanywe by’umwihariko no gusaba ibyo bihugu gushyigikira ubusabe bw’Imurikagurisha ry’Isi ryo mu 2030 (EXPO2030).

Uretse u Rwanda, Minisitiri Park Jin yagombaga gukomereza mu bihugu birimo Ethiopia, Zambia na Leta Zunze Ubumwe z’Abarabu (UAE).

Ibiganiro yagiranye n’abayobozi bo mu Rwanda, byibanze no ku nzira zo kurushaho kunoza no gushimangira umubano mu ikoranabuhanga ndetse n’izindi nzego zijyanye no kugera ku iterambere rirambye mu gihe kizaza.

Perezida Kagame na Minisitiri Park bagiranye ibiganiro byibanze ku butwererane burenze imishinga y’iterambere mu ikoranabuhanga risanzwe n’irigezweho.

Perezida Kagame yavuze ko ibihugu byombi bikwiye guhanga amahirwe mashya, ashimangira ko Korea y’Epfo ari igihugu u Rwanda rufatiraho urugero kuko yageze ku iterambere ry’ubukungu rijyana n’abakozi bafite ubumenyi buhambaye.

Minisitiri Park yasabye Perezida Kagame gushyigikira Korea yifuza kwakira Imurikagurisha ry’Isi rya 2030, anamusaba ko yazitabira Inama ihuza Korea y’Epfo n’Afurika izaba mu mwaka utaha.

Uretse ibiganiro yagiranye na Perezida Kagame byibanze ku kurushaho kunoza ubutwererane bw’u Rwanda na Korea y’Epfo, Minisitiri Park Jin, yagiranye ibiganiro na Minisitiri w’Ububanyi n’Amahanga n’Ubutwererane Dr Biruta Vincent.

Abo bayobozi bombi, banashyize umukono ku masezerano agamije kurushaho kwimakaza ibiganiro hagati ya Minisiteri z’Ububanyi n’Amahanga z’Ibihugu byombi.

Ba Minisitiri bombi nanone kandi bashyize umukono ku masezerano y’inguzanyo Korea y’Epfo iteganya guha u Rwanda binyuze mu Kigega cy’Iterambere ry’Ubukungu hagati y’umwaka wa 2022-2026 banashimangira ko biteguye kurushaho kwagura ubutwererane mu nzego zirimo ubuzima, ibikorwa remezo n’izindi nzego zitandukanye.

Ba Minisitiri bombi banahamije ko umubano w’ibihugu byombi wakomeje kwiyongera ushingiye ku butwererane mu iterambere bw’imyaka 60, by’umwihariko bikarushaho gufatanya mu guhanga udushya mu ikoranabuhanga.

Minisitiri Park yavuze ko ubutwererane bw’ibihugu byombi bukomeje gutezwa imbere mu gihe u Rwanda rukomeje umuvuduko wo kuba icyicaro cy’ikoranabuhanga muri Afurika, aho n’ubukungu bw’u Rwanda bukomeza kuzamuka ku kigero kiri hejuru ya 8%.

Minisiteri y’Ububanyi n’Amahanga ya Korea y’Epfo yatangaje ko Park Jin ari we Minisitiri w’Ububanyi n’Amahanga w’icyo gihugu wa mbere usuye ibihugu by’Afurika mu myaka 10 ishize.

  • NTAWITONDA JEAN CLAUDE
  • Kanama 14, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE