Bumbogo: Abanyamuryango ba FPR Inkotanyi bagabiye inka imiryango 3

Mu mpera z’icyumweru gishize taliki 03 Ukuboza 2022, abanyamuryango ba FPR Inkotanyi mu Murenge wa Bumbogo mu Karere ka Gasabo, bahuriye mu Nteko rusange y’Umuryango FPR-Inkotanyi barebera hamwe ibyo bageze n’ibyo bazakora mu minsi iri imbere.

Muri iyo Nteko Rusange y’Umuryango FPR Inkotanyi hakiriwe abanyamuryango bashya 50, Abanyamuryango bagabiye inka imiryango 3 itishoboye.

Mujawamariya Beatha utuye mu Mudugudu wa Murarambo mu Kagari ka Mvuzo muri uwo Murenge, yishimiye inka yagabiwe n’abanyamuryango ba FPR Inkotanyi mu murenge wa Bumbogo.

Ati: “Nishimiye ko bampaye inka abana banjye bakaba bagiye kunywa amata nanjye nkanywa amata n’umuryango wanjye tukabaho neza”.

Ashimira Perezida wa Repubulika akaba na Chairman w’Umuryango FPR Inkotanyi, Paul Kagame, woroje abanyarwanda binyuze muri gahunda ya Girinka Munyarwanda.

Komiseri ushinzwe ubukangurambaga mu muryango FPR Inkotanyi mu Murenge wa Bumbogo, Nyamutera Innocent, yabwiye Imvaho Nshya ko bimwe mu byo bishimira harimo kuba Bumbogo imaze kuba Umurenge w’umujyi n’icyerekezo.

Ahamya ko hari igice cy’umujyi n’icyaro. Ibi abishingira ku kuba Bumbogo ari umurenge urimo guturwa cyane bitewe n’ibikorwa remezo birimo amazi, amashanyarazi n’ibindi ndetse n’umuhanda Zindiro – Masizi – Gasanze.

Akomeza agira ati: “Turanishima ibikorwa biteze imbere abaturage nk’ubworozi n’ubuhinzi bimaze kugera ku batuye mu murenge wa Bumbogo”.

Mu byo bateganya gukora, Nyamutera ashimangira ko bazakora ibikorwa bishingiye ku Isibo. Yagize ati: “Turateganya gukora cyane cyane ibikorwa bishingiye ku Isibo, gufasha abaturage badafite ubushobozi, kubafasha kubona aho kuba haba kububakira ubwiherero bwiza n’ibindi”.

Yongeraho ko igikomeye cyane ari ugukomeza kuremera abantu amatungo, gahunda ya Girinka yo irasanzwe ariko ngo bazongeramo ikibatsi.

Mu bindi abanyamuryango ba FPR Inkotanyi bateganya gukora, ni ugukomeza gukora ubukangurambaga muri gahunda ya EjoHeza no gushyira imbaraga mu miyoborere myiza baha umuturage serivisi nziza. 

Esther K. Sabiti umugore witeje imbere avuga ko intekerezo z’Umuryango FPR Inkotanyi zatumye atinyuka agakora akiteza imbere ahereye ku gutunganya imboga.

Afata imboga zisanzwe bakoresha mu isoko zirimo betarave, kaloti cyane cyane ibyangirikira mu masoko bipfa vuba, akabyongerera agaciro hanyuma akavanamo ifu umuntu ashobora guhita akoresha ako kanya.

Avuga ko Umuryango FPR Inkotanyi umufasha mu bijyanye n’ubukangurambaga. Ati: “Kugeza ubu baramfasha cyane kuko bamaze kumenya igitekerezo mfite, baranyegera bambwira ko igitekerezo mfite cyafasha abanyarwanda.

Abanyamuryango ba Bumbogo barambwiye ngo bazamfasha mu buryo bwo kugira ngo nibimara kuzamuka tuzubake uruganda tugere ku ntego ishimishije ku buryo bishobora gufasha abanyarwanda bose”.

Abanyamuryango ba FPR Inkotanyi bakoze Inteko Rusange y’Umuryango mu gihe barimo kwizihiza imyaka 35 uyu muryango umaze utangiye.