Bitwaye iki guhindura ibyahozeho bitadufasha? – Jeannette Kagame

  • NTAWITONDA JEAN CLAUDE
  • Ukwakira 4, 2022
  • Hashize imyaka 2
Image

Madamu Jeannette Kagame yakomoje ku mikorere yamenyerewe n’abatuye Isi ariko idatanga umusaruro ikwiye guhinduka kugira ngo bagere ku bisubizo birambye by’ingorane zitandukanye zugarije Isi zaganiriweho zikanashakirwa umuti ariko ukaba utaragerwaho mu myaka isaga 20 ishize.

Yabigarutseho mu nama mpuzamahanga yiga ku guhanga udushya mu buzima (WISH) izamara iminsi itatu iteraniye i Doha muri Qatar, ikaba igamije kwigira hamwe no gufata ingamba zakoroshya gahunda zo guhanga udushya mu rwego rw’ubuvuzi tugamije “Kuvura Ahazaza h’Isi”.

Iyi nama itegurwa n’Umuryango uharanira iterambere ry’uburezi siyansi n’umuryango Qatar Foundation, yashyizweho bwa mbere taliki ya 1 Kanama 2012 mu Nama Mpuzamahanga yiga kuri Politiki z’Ubuzima yateraniye i London mu Bwongereza.

Madamu Jeannette Kagame yashimiye Qatar Foundation yamutumiye, akaba yifatanyije n’abandi Badamu b’Abakuru b’Ibihugu ndetse na Perezida wa Tanzania, Samia Suluhu Hassan.

Madamu Jeannette Kagame yashimangiye ko inama y’uyu mwaka ije mu gihe gikomeye aho ibihugu bihuriye mu Muryango w’Abibumbye bigeze mu ikorosi rigana ku Ntego z’Iterambere Rirambye (SDGs) zashyiriweho kugerwaho mu mwaka wa 2030.

Mu mpanuro yagejeje ku bitabiriye iyo nama, yakomeje agaragaza agaciro ko kureba Isi mu buryo butandukanye n’uko yarebwaga kera, kugira ngo abantu babashe gushaka umuti urambye w’ibibazo bisa n’ibyabaye akarande.

Yagaragaje uburyo u Rwanda rwanyuze mu icuraburindi ariko ubu rukaba rwaratangiye kugera ku nzozi rwari rufite mu myaka 28 ishize zirimo kugira imihanda isukuye ikikijwe n’ibimera, ibikorwa remezo byiza, kurandura ubukene, uburinganire n’ubwuzuzanye, kubaka urwego rw’ingufu ruramba, ibigo bikomeye kandi bikora neza, inyubako za Leta zigezweho, kugeza ubuvuzi kuri bose harimo gukingira abangavu bose kanseri y’inkondo y’umura, bikajyana no kuba igihugu cya mbere ku Isi cyaranduye iyo kanseri.

Ibyo ngo byajyanye no gusimbuza amacakubiri amahoro, urupfu no kubuzwa amahirwe bigasimbuzwa ubuzima no kwihaza. Yavuze ko nubwo ibyo byafatwaga nk’inzozi mu myaka yashize ariko kuri ubu hari bimwe byatangiye gukoreka mu maso y’Abanyarwanda.

Aha ni ho yahereye yibaza impamvu hari ibibazo bitarakemuka mu bihugu byiganjemo ibikiri mu nzira y’amajyambere, kandi bizwi ndetse byaranashyizwe mu mirongo migari y’Intego z’Iterambere Rirambye (SDGs).

Yagize ati: “Kuva mu mwaka wa 2000, amafaranga ahererekanywa ku Isi yikubye inshuro zisaga eshatu. Iterambere ry’ikoranabuhanga ryahinduye ubuzima bwacu kurusha uko twari tubyiteze, ariko turacyahura twibanda ku bihugu bikiri mu nzira y’amajyambere nk’uko twabikoraga mu myaka 20 ishize, tuvuga ko abagore n’abana badakwiye kuba bakizira imfu zakabaye zikumirwa. Ni igiki kiduca mu rihumye?”

Yakomeje ahamya ko ibyuho biri mu nzego z’ubuzima zizwi, bikaba birimo ubusumbane hagati y’ibyo ibihugu byiyemeza gukora n’ibishyirwa mu bikorwa, kudatera inkunga zihagije inzego z’ubuzima n’ibindi.

Yavuze ko ibitabasha gukorwa bisaba inyurabwenge n’indangagaciro nzima, kugira ngo abantu bahitemo gukora ibyiza mu kurinda Igihugu n’agaciro k’abaturage, gukurikirana inshingano zahawe ibigo bitandukanye no guhoza iteka umuturage ku isonga.

Yakomeje agira ari: “None se ibyo bipimo biramutse biriho twaba tugaruka ku iterambere n’imikorere byacu mu buryo butandukanye? Ni izihe ngorane zavuka mu kurebera Isi mu mboni itandukanye uyu munsi? Kuki tutatekereza bundi bushya ku mikorere itadufasha uko bikwiye tukayinoza?”

Iterambere ntiryagerwaho hari ibyirengagijwe gukorwa

Madamu Jeannette Kagame yasobanuye ko bigoye kuba wagera ku iterambere rirambye mu gihe nta mahoro, uburumbuke, nta kirere gikora neza, n’ubukene bugifite icyicaro.

Yavuze ko nko ku Rwanda, amahoro nyuma ya Jenoside yari ikintu kitagibwaho impaka, ati: “Ni cyo gisobanuro cyimbitse twakira iyo tuvuga Intego z’Iterambere Rirambye mu ishusho yagutse, iyo twibanze ku bibazo birimo ubuzima bw’umugore n’umwana… Intego zose ziruzuzanya.”

Ashingiye ku biganiro byabaye uyu munsi, ku nsanganyamatsiko yibanze ku buzima bw’umugore n’umukobwa, yagaragaje ko hari impinduka zitanga icyizere mu bihe biri imbere, aboneraho gusaba buri wese kuzirikana buri gihe intego nyamukuru  yo kugera ku mahoro n’uburumbuke, n’inshingano bafite ngo bigerweho.

Yavuze ko ari yo ntekerezo nyamukuru Umuryango Imbuto Foundation wubakiyeho mu cyerekezo cyawo cyo kubaka iterambere rirambye.

Yibukije abitabiriye WISH 2022 ko uyu munsi bafite ububasha bwo kugenzura intege nke zihari, kwibaza ku mitekerereze yajenjekewe, kuvugurura no guhindura ingamba zikajyana n’ibihe Isi igezemo.

  • NTAWITONDA JEAN CLAUDE
  • Ukwakira 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE