Basketball: REG BBC na APR BBC ntabwo zitwaye neza muri Tanzania

Ikipe ya REG BBC yegukanye shampiyona y’u Rwanda ndetse na APR BBC zari zaserukiye u Rwanda mu mikino y’Akarere ka 5 yabereye  i Arusha muri Tanzania kuva taliki 26 Nzeri kugeza 01 Ukwakira 2022.

Aya makipe yari yaserukiye u Rwanda, ikipe ya APR BBC yasoreje ku mwanya wa 3 itsinze ikipe ya REG BBC  amanota 42 kuri 39.

 Ikipe ya Alexandria SC  yo mu Misiri ni yo yegukanye igikombe itsinze ku mukino wa nyuma ikipe ya KPA yo muri Kenya  amanota 78 kuri 67. Iyi kipe ya  Alexandria SC   yageze ku mukino wa nyuma isezereye REG BBC muri ½  ku manota 79 kuri 45 naho KPA isezerera APR BBC ku manota 61 kuri 39.

Iyi kipe ya Alexandria SC ni yo izaserukira aka Karere ka 5 mu mikino y’Afurika y’amakipe “FIBA Africa Club Championship 2022” izabera i Maputo muri Mozambique.

Iyi mikino y’Akarere ka 5 yari yitabiriwe n’amakipe 9  aho yari  agabanyijwe mu matsinda 3. Itsinda A ryari ririmo Equity (Kenya), Alexandria SC  (Misiri) na Nile Legends (South Sudan). Itsinda B  ryari rigizwe na Vijana Queens (Tanzania), APR BBC (Rwanda) na Wolkite (Ethiopia) naho itsinda C rigizwe na KPA (Kenya), REG BBC (Rwanda) na Young Sisters (Burundi).

Umwaka ushize wa 2021, ikipe ya REG BBC na The Hoops ni zo zari zaserukiye u Rwanda muri Zone 5. Ikipe ya REG BBC yasoreje ku mwanya wa 3 naho The Hoops yegukana umwanya wa 4.