Basketball: Msgr.MUBILIGI TSS na Igihozo St Peter zegukanye  “Igihozo St Peter 3×3 Tournament”

  • Imvaho Nshya
  • Ukwakira 23, 2022
  • Hashize umwaka 1
Image

Ikipe ya Msgr.MUBILIGI TSS mu bahungu na Igihozo St Peter Secondary School mu bakobwa, ni zo zegukanye irushanwa rya Basketball y’abakina ari batatu kuri batatu (3×3) “Igihozo St Peter 3×3 Tournament 2022”, ryateguwe n’ishyirahamwe ry’umukino wa Basketball mu Rwanda  “FERWABA” ku bufatanye n’Ubuyobozi bw’Ishuri,  Igihozo St Peter Secondary School.

Iri rushanwa ryabaye kuwa Gatandatu, taliki 22 Ukwakira 2022 ribera mu kigo cy’ishuri, Igihozo St Peter SS riherereye mu Karere ka Nyanza rikaba ryari ryitabiriwe n’amakipe y’ibigo by’amashuri 8 mu bahungu n’atandatu mu bakobwa.

Uko amakipe yari agabanyijwe mu matsinda

Aya makipe 8 mu bahungu na 6 mu bakobwa akaba yari agabanyijwe mu matsinda abiri

Mu bahungu hari amakipe 8 aho yari agabanyijwe  mu matsinda abiri,  itsinda A ryari rigizwe na Igihozo St Peter SS A, ES St Esprit, Ecole des Sciences Louis de Montfort. Itsinda B ryari ririmo Igihozo St Peter SS B, Igihozo St Peter SS C, Msgr.MUBILIGI TSS na College Christ-Roi.

Mu bakobwa  hari amakipe 6 yari aganyijwe mu matsinda abiri, itsinda A ryari ririmo Igihozo St Peter SS A, ES St Esprit, GS Mater Dei Nyanza naho itsinda B ryari ririmo Igihozo St Peter SS B, ESN Louis Monford na College Christ- Roi.

Uko irushanwa ryagenze

Amakipe yahuye hagati yayo mu matsinda maze ayitwaye neza  komeza muri ½ cy’irangiza.

Mu bahungu, uko amakipe yahuye, Msgr.MUBILIGI TSS yatsinze  ESN Louis Monfort (11-2) naho Igihozo St Peter SS A itsinda Igihozo St Peter SS C (21-11).

Mu bakobwa, GS Mater Dei Nyanza yatsinze Igihozo St Peter SS B (6-3) naho Igihozo St Peter SS A itsinda ESN Louis Monfort (6-3).

Ku mukino wa nyuma mu bahungu, Msgr.MUBILIGI TSS yatsinze Igihozo St Peter SS A   naho mu bakobwa Igihozo St Peter SS A itsinda GS Mater Dei Nyanza.

Msgr.MUBILIGI TSS yegukanye umwanya wa mbere mu bahungu
Igihozo St Peter SS A yegukaye umwanya wa mbere mu bakobwa

Irakoze Jules, ukinira Msgr.MUBILIGI TSS yabaye iya mbere mu bahungu yashimishijwe no kuba bageze ku ntego bari bihaye.

Tuyisenge Aline, kapiteni wa Igihozo St Peter SS A yatangaje ko bishimiye gutwara igikombe. Yahishuye ko  icyabafashije kubigeraho ari ishyaka, gukunda umukino, kudacika intege, gukorana n’imyitozo myinshi.

Umuhuzabikorwa w’iri rushanwa rya Basketball y’abakina ari 3 kuri 3, Mutokambali Moïse, usanzwe ari Umuyobozi wa Tekinike muri FERWABA, yatangaje ko bishimiye uko ryagenze muri rusange. Avuga ko iri rushanwa rigamije kumenyekanisha uyu mukino wa batatu kuri batatu.

Umuhuzabikorwa w’irushanwa rya Basketball y’abakina ari 3 kuri 3, Mutokambali Moïse

Mutokambali akaba yaraboneyeho no gushishikariza abana bari bitabiriye iri rushanwa gukunda no gukina uyu mukino w’abakina ari 3 kuri 3 kuko hari amahirwe yo kuba bazakinira ikipe y’igihugu ndetse ko wabahindurira ubuzima dore ko umaze kuba umukino ukinwa mu mikino Olempike.

Padiri, Dushimye Robert uyobora Igihozo St Peter SS yasobanuye ko bivuze byinshi kuri bo kuba bakiriye iri rushanwa. Ati “ Ni ibintu by’agaciro kuri twe kwakira ino mikino kuko bifasha abanyeshuri kwidagadura, bagakunda aho bari ariko by’umwihariko ni uko tubafasha kubona ko hari n’izindi mpano zibarimo, tukabafasha kuzizamura kugira ngo bagende barushaho kuziteza imbere. Ikindi bibafasha kuruhura umubiri no bigatuma babasha no kwiga neza.”

Padiri, Dushimye Robert uyobora Igihozo St Peter SS

Yemeza ko bifuza gushyiramo imbaraga bakaba bagarura ibihe byiza bahoranye muri uyu mukino.

Mu bihembo byatanzwe, ikipe ya mbere muri buri cyiciro yahembwe imidali ya zahabu ndetse n’imipira 2 yo gukina naho amakipe yabaye aya kabiri ahabwa imidali ya Feza ndetse n’umupira umwe wo gukina. Ku rundi ruhande, buri kipe yitabiriye iri rushanwa yahawe umupira umwe wo gukina.

Kuri iki Cyumweru tariki 23 Ukwakira 2022, biteganyijwe kandi ko irushanwa nk’iri ry’abakina Basketball ya 3 kuri 3, rizakomereza mu Karere ka Muhanga, ahazarushanyirizwa amakipe atandukanye y’ibigo by’amashuri azahahurira.

Bimwe mu byo wamenya kuri  uyu mukino

Mu byo wamenya kuri uyu mukino wa Basketball y’abakina ari batatu ni uko ukinwa muri ½ cy’ikibuga gisanzwe, aho buri kipe iba ifite abakinnyi bane ariko batatu bakaba ari bo bajya  mu kibuga, umwe akaba ari umusimbura. Umukino ukinwa iminota 10, ahasanzwe hatsindirwa amanota atatu muri Basketball isanzwe, habarirwa amanota abiri mu gihe ahatsindirwa abiri, habarirwa inota rimwe. Iyo hari ikipe igize amanota menshi ni yo yegukana intsinzi naho mu gihe ikipe itanga indi amanota 21, umukino uhita urangira.

  • Imvaho Nshya
  • Ukwakira 23, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE