Basketball: Mu bagore, REG BBC yegukanye igikombe, Patriots na REG BBC zisigaje undi mukino

Taliki 14-09-2022

APR BBC 54-63 REG BBC

REG BBC 62-78 Patriots BBC

Taliki 18-09-2022

Patriots BBC-REG BBC (BK Arena-19h00)

Ikipe ya REG BBC mu bagore yegukanye igikombe cya shampiyona ya Basketball y’u Rwanda  “Rwanda Basketball League 2021-2022” nyuma yo kwitwara neza mu mikino ya “Playoffs 2022” aho yatsinze ikipe ya APR BBC imikino 3-1.

Ku mugoroba wo ku wa Gatatu taliki 14 Nzeri 2022 ni bwo habaye umukino wa   wa 4 wa “Playoffs 2022” wahuje ikipe ya REG BBC na APR BBC. Aya makipe yagiye gukina ikipe ya REG BBC iri imbere  aho yari imaze gutsinda imikino 2-1.

Muri uyu mukino wabereye muri BK Arena, ikipe ya REG BBC yitwaye neza itsinda APR BBC amanota 63 kuri 54. Ikipe ya REG BBC na APR BBC zanganyije agace ka mbere, amanota 16 kuri 16, REG BBC yatsinze akace ka kabiri n’aka gatatu ku manota 20 kuri 19 na 19 ku 10 hanyuma agace ka 4, APR BBC itsinda amanota 9 ku 8.

Nyuma yo gutsinda uyu mukino, ikipe ya REG BBC yahise yegukana igikombe cya shampiyona itsinda APR BBC imikino 3-1. Iyi kipe yisubije igikombe cya shampiyona kuko n’umwaka ushize wa 2020-2021 yari yegukanye igikombe itsinze The Hoops imikino 2-1. Ikipe ya REG BBC yahawe igikombe na sheki ya miliyoni 10 z’amafaranga y’u Rwanda.

Mu bagabo, Patriots BBC na REG BBC zigiye gukina umukino wa 5

Ikipe ya Patriots BBC na REG BBC zigomba gukina umukino wa nyuma wa 5 kugira ngo hamenyekane ikipe izegukana igikombe cya shampiyona  “Rwanda Basketball League 2021-2022”.

Mu mukino wa 4 wa “Playoffs 2022” wabaye ku wa Gatatu taliki 14 Nzeri 2022, ikipe ya Patriots BBC  yitwaye neza itsinda REG BBC amanota 78 kuri 62  bituma aya makipe anganya imikino 2 kuri 2 ari yo mpamvu hagomba gukinwa mukino wa 5 kugira ngo ikipe izabasha  gutsinda  ari yo yegukana igikombe.

Uyu mukino, ikipe ya REG BBC ni yo yahabwaga amahirwe kuko yari imaze gutsinda Patriots BBC mu mikino ibiri yikurikiranya. Gusa ikipe ya Patriots BBC iheruka igikombe muri 2020 yitwaye neza itsinda uduce tubiri tubanza ku manota 14 kuri 11 na 27 ku 10. Agace ka gatatu, REG BBC yatsinze Patriots BBC amanota 22 kuri 15 naho agace ka 4 aya makipe anganya amanota 22 kuri 22.

Nyuma y’umukino wa nyuma wa 4 muri  “Playoffs 2022”, ikipe ya Patriots BBC na REG BBC ziranganya imikino 2 kuri 2, bikaba iteganyijwe ko ku Cyumweru taliki 18 Nzeri 2022 ari bwo hazaba umukino wa nyuma wa 5 guhera saa moya (19h00). Ikipe izitwara neza igatsinda ni yo izahita yegukana igikombe.