Basketball: Ingimbi z’u Rwanda zegukanye Igikombe cy’Akarere ka Gatanu

Ikipe y’Igihugu y’u Rwanda y’Abahungu batarengeje imyaka 18 mu mukino wa Basketball yegukanye Igikombe cy’imikino y’Akarere ka Gatanu (AfroBasket U18 Zone V Qualifiers), nyuma yo gutsinda Misiri yari yakiriye iri rushanwa amanota 62-58 ku mukino wa nyuma. 

Uyu mukino wa nyuma wabereye i Cairo ku gicamunsi cyo kuri uyu wa Gatatu, tariki ya 29 Nyakanga 2026. Abasore b’u Rwanda ni bo batangiye neza umukino batsinda agace ka mbere amanota 17 kuri 15 ya Misiri. 

Iyi kipe yakomereje muri uwo mujyo mu gace ka kabiri itsinda amanota 20 kuri 13 bituma isoza igice cya mbere iyoboye n’amanota 37 kuri 28 ya Misiri. Mu gace ka gatatu, Misiri yagarukanye imbaraga nyinshi itangira kugabanya ikinyuranyo cy’amanota ibifashijwemo n’abakinnyi barimo Rami Magdy na Belal Sohaib.

Ku rundi ruhande ingimbi z’u Rwanda zakomeje kongera amanota binyuze muri Sean Mwesigwa watsindaga amanota menshi. Aka gace karangiye u Rwanda rutsinze Misiri amanota 16-15, bituma bakomeza kuyobora n’amanota 58-43. 

Mu gace ka nyuma, Misiri yari imbere y’abafana bayo yokomeje kugerageza kugabanya ikinyuranyo abarimo Rami Magdy na Ahmed Youssef Hendawy batsinda amanota. U Rwanda rwakomeje guhatana kugeza ku munota wa nyuma rubifashijwemo na Joshwa Alvin Muhirwa watsindaga.

Umukino warangiye u Rwanda rutsinze Misiri amanota 62-58, rwegukana Igikombe cy’imikino y’Akarere ka Gatanu (AfroBasket U18 Zone V Qualifiers).  U Rwanda rwihoreye kuri Misiri yari yarutsinze mu mikino y’amatsinda amanota 80-71. 

Ibihugu byombi ni byo bizahagararira aka Karere mu Gikombe cya Afurika cy’Abatarengeje imyaka 18 kizabera i Abidjan muri Côte d’Ivoire, kuva tariki ya 5 kugeza ku ya 16 Kanama 2026.