Basketball: Ikipe ya REG BBC yisubije igikombe cya shampiyona

  • Imvaho Nshya
  • Nzeri 19, 2022
  • Hashize imyaka 2
Image

Patriots BBC 74-84 REG BBC (2-3)

Ikipe ya REG BBC yegukanye  igikombe cya shampiyona  y’icyiciro cya mbere mu bagabo  “Rwanda Basketball League 2021-2022” nyuma yo gutsinda ikipe ya Patriots BBC muri “Playoffs 2022” imikino 3-2.

Umukino wa nyuma wa 5 muri  “Playoffs 2022” wakinwe ku Cyumweru taliki 18 Nzeri 2022 aho  buri kipe yaba REG BBC ndetse na Patriots BBC yasabwaga gutsinda  ikegukana igikombe kuko aya makipe yombi yagiye gukina anganya imikino  2-2.

Muri uyu mukino wabereye muri BK Arena, ikipe ya REG BBC yari ifite igikombe cya shampiyona giheruka yatangiye neza itsinda agace ka mbere ku manota 24 kuri 13. Agace ka kabiri aya makipe yanganyije amanota 18-18. Agace ka gatatu Patriots BBC  yatsinze amanota 18 kuri 17 naho agace ka nyuma ka 4 aya makipe anganya amanota 25-25.

Ikipe ya REG BBC yahise yegukana intsinzi ku manota 84 kuri 74 bituma ihita yegukana n’igikombe cya shampiyona ku ntsinzi y’imikino 3-2. Iyi kipe ikaba yisubije iki gikombe kuko ni yo yari yacyegukanye umwaka ushize  wa 2021  na bwo itsinze Patriots BBC imikino 2-0.

Iyi kipe ya REG BBC ikaba ari igikombe cya shampiyona cya gatatu yegukanye nyuma ya 2017 na 2021.

Uko imikino yose ya “Playoffs 2022” yagenze

Taliki 07 Nzeri 2022 ni bwo habaye umukino wa mbere wa  “Playoffs 2022” aho ikipe ya Patriots BBC yitwaye neza igatsinda REG BBC amanota 75 kuri 70.  Taliki 10 na 11 Nzeri 2022, ikipe ya REG BBC yitwaye neza itsinda  Patriots BBC imikino 2,  amanota  79 kuri 70 na 82 kuri 75. Umukino wa 4 wabaye taliki 14 Nzeri 2022, ikipe ya Patriots BBC yatsinze REG BBC amanota 78 kuri 62 naho umukino wa nyuma wa 5  wabaye talki 18 Nzeri 2022, REG BBC itsinda Patriots BBC amanota 84 kuri 74.

Uko urutonde ruhagaze

Nyuma y’imikino ya “Playoffs 2022”, ikipe ya REG BBC yasoreje ku mwanya wa mbere ihabwa igikombe na miliyoni 15 z’amafaranga y’u Rwanda. Ku mwanya wa kabiri hasoreje Patriots BBC yahawe miliyoni 7.5 , ku mwanya wa 3 hasoreza APR BBC  yahawe miliyoni 3,5.  Ku mwanya wa 4 haje Tigers BBC, Espoir BBC (5), UGB (6), Shoot 4 Stars (7), IPRC Kigali BBC (8), IPRC Huye BBC (9), IPRC Musanze BBC (10), Rusizi BBC (11), UR Huye BBC (12) na UR CMHS BBC (13).

Patriots BBC yasoreje ku mwanya wa kabiri
APR BBC yasoreje ku mwanya wa 3

Aya makipe 3 ya nyuma, Rusizi BBC (11), UR Huye BBC (12) na UR CMHS BBC (13) azamanuka mu cyiciro cya kabiri mu gihe ikipe ya Kigali Titans BBC na Orion BBC  zazamutse mu cyiciro cya mbere.

Ikipe ya REG BBC nyuma yo kwegukana igikombe cya shampiyona ni yo izahagararira  u Rwanda mu irushanwa ry’Afurika ry’amakipe yatwaye ibikombe  iwayo muri Basketball mu bagabo  “Africa Basketball League 2023”.

  • Imvaho Nshya
  • Nzeri 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE