Arsenal yegukanye Community Shield itsinze Manchester City

Arsenal yegukanye Igikombe cya Community Shield itsinze Manchester City ibitego 3-0 mu mukino wabereye kuri Principality Stadium mu Gihugu cya Wales kuri uyu iki Cyumweru, tariki ya 16 Kanama 2026.

Igikombe cya Community Shield gikinirwa n’ikipe yatwaye Shampiyona n’iyatwaye ‘FA Cup’ mu mwaka w’imikino uba wabanjirije uwo mukino.

Arsenal yatwaye Shampiyona ni yo yatangiye neza umukino kuko ku munota wa mbere Riccardo Calafiori yafunguye amazamu ku mupira mwiza Lewis-Skelly yamucomekeye asiga ba myugariro ahita aroba umunyezamu Gianluigi Donnarumma, umupira ujya mu izamu.

Ku munota wa 28, Kai Harvetz yatsindiye Arsenal igitego cya kabiri n’umutwe ku mupira Christos Tzolis yamuhaye ari mu rubuga rw’amahina awushyira mu izamu.

Igice cya mbere cyarangiye Arsenal itsinze Manchester City ibitego 2-0.

Arsenal yakomeje gukina neza mu gice cya kabiri bidatinze ku munota wa 48, Martin Ødegaard yatsinze igitego cya gatatu ku mupira yatereye mu rubuga rw’amahina.

Nta kindi gitego cyigeze gishyirwamo, umukino urangira ari ibitego 3-0, Arsenal yegukana Igikombe cya ‘Community Shield’. Izi ni intangiriro nziza ku mwaka w’imikino wa 2026/27 kuri Arsenal kuko yegukanye iki gikombe ku nshuro ya 18 mu mateka yayo.

The Gunners izatangira Premier League ikina na Coventry ku wa Gatanu, tariki ya 21 Kanama 2026, mu gihe Man City izakina na Bournemouth ku Cyumweru.