APRW BBC yasezerewe, REGW BBC ikomeza muri 1/2 cy’imikino Nyafurika

  • Imvaho Nshya
  • Ugushyingo 3, 2023
  • Hashize amezi 7
Image

APRW BBC yasezerewe na JKL Lady Dolphins yo muri Uganda iyitsinze amanota 75 -58, mu gihe REGW BBC yasezereye Gladiators y’i Burundi iyitsinze amanota 83-73 ibona itike ya 1/2 mu mikino ya “FIBA Africa Women Basketball League”

Iyi mikino ya 1/4 yabaye ku mugoroba wo kuri uyu wa Kane tariki 2 Ugushyingo 2023 muri Lycee de Kigali.

Umukino wa APRW BBC na JKL Lady Dolphins watangiye iyi kipe yo muri Uganda isatira cyane ari nako Imanishimwe Ritha yayitsindiraga amanota menshi.

Agace ka mbere karangiye JKL Lady Dolphins iyoboye umukino n’amanota 29 kuri 13 ya APRW BBC.

Iyi kipe yo muri Uganda yakomeje gutsinda amanota menshi no mu gace ka kabiri yari yiganjemo atatu yatsindwaga na Imanishimwe ndetse na Brenda Ekone.

Ikinyuranyo cyazamutse kigera ku manota 26 irusha cyane ikipe y’Ingabo yakozweho no kutagira Abigayle Jane Jackson wari urwaye ariko umutoza agapfa kumushyira mu kibuga.

Igice cya mbere cyarangiye JKL Lady Dolphins yatsinze APRW BBC amanota 52-21.

Mu gace ka gatatu Ikipe yo muri Uganda yakomeje koroherwa n’umukino abakinnyi bayo nka Hope Akello na Agatha Kamwanda bakomeza gutsinda amanota menshi. Habura iminota itatu ngo agace ka gatatu karangiye, ikinyuranyo cyakomeje kuzamuka kigera ku manota 37.

Agace ka gatatu karangiye JKL Lady Dolphins ikiyoboye umukino n’amanota 68 kuri 39 ya APRW BBC.

Mu gace ka kane Ikipe y’Ingabo z’igihugu yaje yakosoye amakosa yakoze mu duce dutatu tubanza, ariko byari bigoye ko yatsinda umukino kubera ikinyuranyo cyari cyashyizwemo.

Umukino warangiye JKL Lady Dolphins itsinze APRW BBC amanota 75-58.

Iyi kipe yo muri Uganda irahura na Kenya Ports Authority muri 1/2 na yo yagezemo nyuma yo gutsinda Vijana Queens yo muri Tanzania amanota 81-36.

REGW BBC yageze muri ½

Umukino wa REGW BBC na Gladiators watangiye wegeranye cyane amakipe yombi atsinda amanota ariko iy’i Burundi igenda imbere.

Aka gace ka mbere karangiye Gladiators iyoboye umukino n’amanota 19 kuri 13 ya REG WBBC.

Mu gace ka kabiri Ikipe ya Sosiyete y’Igihugu ishinzwe ingufu yazanye  imbaraga myinshi  itsinda amanota menshi ibifashijwemo na Mwizerwa Faustine na Kalanga Betty.

Aka gace karangiye REGW BBC itsinze Gladiators amanota 35-31.

Mu gace ka gatatu, Ikipe ya REGW BBC yakomeje gutsinda amanota menshi yiganjemo atatu ya Micomyiza Rosine bakunze kwita ‘Cisse’ byari byakundiye kuri uyu munsi.

Ku rundi ruhande, Kamba Yoro Diakite wa Gladiators na we yatsindaga amanota atatu ariko ikinyuranyo gikomeza kuba amanota arindwi.

Aka gace karangiye REG WBBC ikiyoboye umukino n’amanota 59 kuri 51 ya Gladiators.

Mu gace ka nyuma k’umukino REGW BBC yakomeje gutsinda amanota ibifashijwemo na Micomyiza Rosine na Mwizerwa  batsindaga amanota atatu.

Umukino warangiye REGW BBC yatsinze Gladiators amanota 83-73 ikatisha itike ya 1/2.

Muri 1/2 iyi kipe ihagarariye u Rwanda irahura na Equity Bank yo muri Kenya.

Imikino yose ya 1/2 irakinwa kuri uyu wa Gatanu tariki 3 Ugushyingo 2023.

SHEMA IVAN

  • Imvaho Nshya
  • Ugushyingo 3, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE