Amagare: Mugisha na Ingabire begukanye “Musanze Gorilla Race 2022”

Abagabo (105 km)

1. Mugisha Moise 02h44’26”

2. Muhoza Eric 02h44’40”

3. Nzafashwanayo Jean Claude 02h44’50”

Ingimbi (87 km)

1. Nshutiraguma  Kevin  02h24’50”

2. Ntirenganya Moise 02h24’52”

3. Uhiriwe Espoir 02h24’53”

Abagore (87 km)

1. Ingabire Diane 02h18’12”

2. Nzayisenga Valentine 02h21’11”

3. Nirere Xaverine 02h22’42”

Abangavu (73 km)

1. Mwamikazi Djazilla 02h09’50”

2. Iragena Charlotte 02h09’55”

3. Uwera Aline 02h10’56”

Kuri uyu wa Gatanu taliki 16 Ukuboza 2022, habaye isiganwa ry’umukino w’amagare “Musanze Gorilla Race 2022” ryateguwe n’ishyirahamwe ry’umukino w’amagare mu Rwanda “FERWACY”  ku bufatanye n’Akarere ka Musanze nyuma y’amasezerano y’ubufatanye mu gutegura amarushanwa  impande zombi zashyizeho umukono taliki 30 Ugushyingo 2022.

Iri siganwa ryakinwe mu byiciro bitandukanye mu bakuru n’abakiri bato mu bagabo n’abagore. Isiganwa ryatangiriye mu Kinigi abasiganwa bakomeza Nyakinama baragaruka basoreza mu Mujyi wa Musanze imbere ya Virunga Hotel.

Mu bagabo “Men Elites & U-23” basiganwe intera ya kilometero 105 maze Mugisha Moise yegukana isiganwa aho yakoresheje amasaha 2, iminota 44 n’amasegonda 26 (02h44’26”) ku mwanya wa kabiri haje Muhoza Eric akoresheje amasaha 2, iminota 44 n’amasegonda 40  (02h44’40” ) naho Nzafashwanayo Jean Claude  yegukana umwanya wa 3 akoresheje amasaha 2, iminota 44 n’amasegonda 50 (02h44’50”).

Muri iki cyiciro hitabiriye abakinnyi 52 ariko 28 ni bo bashoboye gusoza isiganwa.

Mu ngimbi “Men Juniors” basiganwe intera ya kilometero 87,Nshutiraguma  Kevin  ukinira ikipe ya Cine Elmay CC ni we wegukanye isiganwa aho yakoresheje amasaha 2, iminota 24 n’amasegonda 50  (02h24’50”) yakurikiwe na Ntirenganya Moise  wakoresheje amasaha 2, iminota 24 n’amasegonda 52 (02h24’52”) naho ku mwanya wa 3 haza Uhiriwe Espoir  wakoresheje amasaha 2, iminota 24 n’amasegonda 53 (02h24’53”).

Muri iki cyiciro hitabiriye abakinnyi 32 muri rusange ariko  24 ni bo basoje isiganwa.

Mu bagore “Women Elites” basiganwe intera ya kilometero 87 aho Ingabire Diane yegukanye umwanya wa mbere akoresheje amasaha 2, iminota 18 n’amasegonda 12 (02h18’12”) yakurikiwe na Nzayisenga Valentine wakoresheje amasaha 2, iminota 21 n’amasegonda 11 (02h21’11”) naho ku mwanya wa 3 haza Nirere Xaverine  wakoresheje amasaha 2, iminota 22 n’amasegonda 42 (02h22’42”).

Muri iki cyiciro hari hitabiriye abakinnyi 6 aho bose basoje isiganwa.

Mu bangavu “Women Juniors” basiganwe intera ya kilometero 73 aho  Mwamikazi Djazilla ukinira Les Amis Sportifs yegukanye umwanya wa mbere akoresheje amasaha 2, iminota 09 n’amasegonda 50 (02h09’50”) yakurikiwe na Iragena Charlotte  wakoresheje amasaha 2, iminota 09 n’amasegonda 55 (02h09’55”) naho ku mwanya wa 3 haza Uwera Aline wakoresheje amasaha 2, iminota 10 n’amasegonda 56 (02h10’56”).

Muri iki cyiciro hari hitabiriye  abakinnyi 8 bakaba bose barasoje isiganwa.

Uretse ibi byiciro hari n’abasiganwe bakoresheje amagare asanzwe  bagera kuri 31 barimo abahungu 27 n’abakobwa 4. Aba bazengurutse mu Mujyi wa Musanze aho bakoze intera ya kilometero 30.

Mu bagabo uwa mbere yabaye Niyonteze Prince akurikirwa na Tuyisenge Vedaste  na Niyomugabo Jean Claude.

Mu bagore uwa mbere yabaye Uwimbabazi Liliane akurikirwa na Nyirabashatsimana Jeannette, Nyambere Marie  naho Uwamahoro Adeline aba uwa 4.

Irushanwa rizasoza umwaka wa 2022 riteganyijwe taliki 30 Ukuboza 2022  « Royal Nyanza Race 2022 »  rikazabera mu Karere ka Nyanza.