AfDB yemereye u Rwanda miliyari 117 Frw zigenewe amazi n’isukura

  • Imvaho Nshya
  • Nyakanga 18, 2023
  • Hashize amezi 11
Image

Banki Nyafurika Itsura Amajyambere (AFDB) yemereye u Rwanda inguzanyo ya miliyoni 101 z’amadorali y’Amerika (miliyari zisaga 117 z’amafaranga y’u Rwanda) yo kwita ku mazi n’isukura hashingiwe ku gushyigikira ishyirwa mu bikorwa ry’Umushinga ugamije kubaka ibikorwa remezo by’amazi n’isukura biramba kandi bikomeye (WASH).

Uwo mushinga wo guteza imbere ibikorwa remezo by’amazi n’isukura mu Rwanda uterwa inkunga na AfDB ukaba ugamije kunoza imiyoborere mu rwego rushinzwe amazi n’ibikorwa by’isukura, bikajyana no gukwirakwiza serivisi z’ibanze z’amazi n’isukura.

Umuyobozi wa AfDB ushinzwe iterambere ry’amazi n’isukura, Osward Chanda, yabwiye Inama y’Ubutegetsi yemeje irekurwa ry’iyo nguzanyo ko iyo nguzanyo izagirira akamaro abaturage b’u Rwanda barenga miliyoni 13.

Ati: “Iyi gahunda izagirira akamaro abaturage b’u Rwanda barenga miliyoni 13.2, bazagerwaho na serivisi z’amazi meza n’isukura.  Bizanafasha  imicungire y’umutungo kamere w’amazi, ivugurura no kuzamura ibijyanye n’imiyoborere muri urwo rwego.”

Minisiteri y’Imari  n’Igenamigambi, Ibikorwa  remezo n’ibidukikije, Ikigo cy’amazi n’isuku n’isukura , Ikigo cy’Igihugu cy’Umutungo w’Amazi  n’ Urwego rw’Igihugu rushinzwe kugenzura Imikorere y’Inzego zimwe z’imirimo ifitiye Igihugu Akamaro RURA bizashyira mu bikorwa gahunda irambye y’amazi n’isuku guhera muri uyu mwaka kugeza mu 2026.

Gahunda y’amazi n’isukura mu Rwanda ni umushinga uheruka guterwa inkunga na Banki nyafurika itsura amajyambere binyuze mu ishami rishinzwe iterambere ry’amazi n’isukura. Banki igamije kwihutisha iterambere ry’u Rwanda mu gihe kirekire, aho ruzaba rufite ubukungu buciriritse mu 2035, nk’uko bigaragara mu Cyerekezo 2050.

Iyi gahunda kandi ihuza n’ingamba ya Banki y’igihugu 2022-2026 ku Rwanda hamwe n’ingamba y’imyaka icumi ya Banki (2013 – 2022, yongerewe ikagera muri Kamena 2023) kugira ngo habeho iterambere ryuzuye. Bizatanga umusanzu mu bice bitatu by’ingenzi Banki ishyira imbere, izwi kandi nka High 5s: ari byo kuzamura imibereho y’abaturage b’Afurika; kugaburira Afurika, no Guteza imbere  Afurika.

Inguzanyo yagenewe u Rwanda yitezweho gutanga umusaruro mu bikorwa by’amazi n’isukura

Yanditswe na NYIRANEZA Judith

  • Imvaho Nshya
  • Nyakanga 18, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE