ADEPR igiye kwizihiza imyaka 75 imaze itangije uburezi mu Rwanda

  • NTAWITONDA JEAN CLAUDE
  • Kamena 26, 2023
  • Hashize amezi 11
Image

Itorero ADEPR ryatangije Icyumweru cyahariwe Uburezi, mu gihe hanitegurwa kwizihiza Isabukuru y’imyaka 75 iryo torero rimaze ritangije uburezi, n’imyaka 50 ritangije Ishuri Ryisumbuye rya mbere mu Rwanda.

Icyo cyumweru cyatangirijwe mu Ishuri rya G.S Rango riherereye mu Karere ka Bugesera ku Cyumweru taliki ya 25 Kamena. Ubuyobozi bw’Akarere ka Bugesera bwatangaje ko itorero ADEPR ari umufatanyabikorwa w’imena muri gahunda z’uburezi.

Umwali Angelique, Umuyobozi w’Akarere ka Bugesera wungirijwe ushinzwe iterambere ry’ubukungu, yavuze ko mbere ya Jenoside yakorewe Abatutsi Akarere ka Bugesera kari gafite ishuri rimwe ryisumbuye.

Ati: “Iryo ni ishuri riri i Rilima. Iryo shuri ntiryari ryarubakiwe abaturage b’Akarere ka Bugesera ahubwo ryari ryarubakiwe impunzi z’Abarundi zari zarahungiye muri iki gihugu”.

Asobanura ko Igihugu cyifuza kugira umuturage uteye imbere kandi utekanye. Akomeza agira ati: “Ntabwo wavuga umuryango uteye imbere abana batiga, baragwingiye, umuryango ukirimo amakimbirane. Ni yo mpamvu duhora dukora ubukangurambaga butandukanye kugira ngo tugire umuryango uteye imbere kandi utekanye”.

Avuga ko buri mwaka Intara y’Iburasirazuba yongera umubare w’ibyumba by’amashuri ndetse hakubakwa n’amashuri y’imyuga ariko hagashyirwa imbere gusigasira ibyagezweho.

Ati “Ibyo ntitwabigeraho tutari kumwe n’abafatanyabikorwa. Tukaba dushimira itorero ADEPR kuko ni umwe mu bafatanyabikorwa b’imena dufite muri iyi Ntara”.

Avuga ko mu Karere hari ibigo 5 by’amashuri bikora ku bufatanye na Leta ndetse n’itorero ADEPR.

Umuyobozi Mukuru w’itorero ADEPR Rev Ndayizeye Isaïe, asobanura ko iki cyumweru kigenewe ababyeyi kuko ngo ni bo abana bakomokaho.

Yongeraho kandi ko kigenewe n’abana, abashumba, abayobozi b’ibigo by’amashuri, abarezi ariko nanone ngo kigenewe n’inzego zose.

Itorero ADEPR rifite amashuri 316 arimo amarerero, amashuri y’inshuke, abanza n’ayisumbuye. Ibyo byiciro byose bifite abarezi 3,477 n’abanyeshuri 15,511 bari mu gihugu hose.

Ku matorero yose ya ADEPR hatangirwa amasomo y’abakuze bigishwa gusoma, kwandika no kubara hakiyongeraho urubyiruko rugera ku 1,819 rurimo gukurikirana izo nyigisho mu bigo by’igororamuco bya Iwawa na Nyamagabe.

Hashingiwe ku ntego y’itorero, uburezi ni kimwe mu byo rimaze igihe rishyiramo imbaraga cyane cyane mu mashuri abanza n’ayisumbuye.

Gutangiza icyumweru cyahariwe uburezi byateguwe mu kwizihiza Isabukuru y’

Mu rwego rwo kwizihiza isabukuru y’imyaka 75 mu burezi n’imyaka 50 hatangiye ishuri ryisumbuye rya mbere ry’itorero ADEPR, hateguwe icyumweru cy’uburezi mu itorero cyatangiye ku Cyumweru taliki 25 Kamena 2023, kikazarangira ku ya 02 Nyakanga 2023.

Insanganyamatsiko y’uyu mwaka igira iti ‘Gutegura abakiri bato, bo mbaraga za none n’ejo hazaza, tubaha uburezi bufite ireme n’indangagaciro za Gikirisitu’.

Ubuyobozi bw’Itorero ADEPR buvuga ko iyi nsanganyamatsiko ishimangira akamaro ko kwigisha abakiri bato mu gutegura neza Umuryango Nyarwanda mu gihe kiri imbere.

Muri iki cyumweru cyahariwe uburezi, ubuyobozi bw’Itorero bugaragaza ko hateganyijwemo ibikorwa bitandukanye birimo n’ibiganiro bizatangirwa mu bigo by’amashuri.

Umushumba Mukuru w’itorero ADEPR, Rev. Ndayizeye, yagize ati: “Itorero ADEPR ryateguye ibikorwa by’isuku mu mashuri yose y’itorero hagamijwe kwimakaza umuco w’isuku.

Hazibandwa kandi ku bikorwa by’isuku y’umubiri, kwita ku bidukikije, gushyira imyanda ahabugenewe no kuyibyaza umusaruro hamwe no kwita ku bidukikije mu rwego rwo kongera isuku mu bigo by’amashuri”.

Muri iki cyumweru cyahariwe uburezi muri ADEPR, hazagaburirwa abana mu rwego rwo gushyigikira gahunda ya Leta yo kugaburira abana ku ishuri.

Biteganijwe ko hazabaho ibikorwa bijyanye no kugarura mu ishuri abana barivuyemo no kubafasha gukemura ibibazo bibangamiye imibereho yabo bituma bata ishuri.

G.S Nyakabwende ni ryo shuri rya mbere ry’Itorero ADEPR, ryubatswe mu 1948, riherereye mu Rurembo rwa Gihundwe. Ni n’isabukuru y’imyaka 50 hubatswe ishuri rya mbere ryisumbuye ryitwa G.S Gihundwe na ryo riherereye mu Rurembo rwa Gihundwe.

Ubuyobozi bw’Itorero ADEPR butangaza ko ibirori bizaba tariki 02 Nyakanga 2023 bikazabera mu karere ka Rusizi mu ntara y’Iburengerazuba kuri G.S Gihundwe.

  • NTAWITONDA JEAN CLAUDE
  • Kamena 26, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE