Abikorera muri Turikiya barerekwa amahirwe yo gushora imari mu Rwanda

  • NTAWITONDA JEAN CLAUDE
  • Ugushyingo 22, 2022
  • Hashize umwaka 1
Image

 Inama y’Ubukungu ihuza abikorera bo muri Turikiya n’abo ku Rwanda iteraniye muri Istanbul, aho itsinda ryaturutse mu Rugaga rw’Abikorera mu Rwanda (PSF) ririmo kwereka abashoramari bo muri icyo gihugu amahirwe ari mu gushora imari mu Rwanda. 

Itsinda ryaturutse mu  Rwanda ryitabiriye iyo nama bayobowe n’Umuyobozi w’Urwego rw’Abikorera mu Rwanda, Robert Bafakulera.

Yavuze ko iyo nama yateguwe ku bufatanye n’Ishami ry’Urwego rw’Abikorera muri Turikiya rishinzwe ububanyi n’amahanga ruzwi nka “DEIK”. 

Bafakulera yavuze ko bajyanywe muri Turikiya no gushaka amahirwe y’ubucuruzi n’ishoramari, bakaba biteguye gufasha abashoramari bo muri icyo gihugu koroherwa no kubona ubufasha bwose bakeneye. 

Ati: “Nagira ngo nizeze abacuruzi bo muri Turikiya ko uyu ari umwanya ukomeye wo gukorera ubucuruzi mu Rwanda. Turi hano dushaka amahirwe y’ubucuruzi n’ishoramari kandi twiteguye kubaha ubufasha bwose mwakenera ngo mushore imari mu Rwanda.”

Yakomeje ahamya ko iyo nama ikwiye kuba amahirwe yo kuganira hagati y’abikorera bo mu bihugu byombi ari na ko batangiza ubufatanye buhoraho mu bijyanye n’ubucuruzi n’ishoramari. 

Uru ruzinduko rubaye mu gihe u Rwanda na Turikiya bisanzwe bifitanye umubano n’ubushuti mu nzego zitandukanye. 

Nko muri Mata 2017, ibihugu byombi byasinyanye amasezerano y’ubufatanye mu buhinzi n’ubworozi, yashyizweho umukono na Minisitiri wa Turikiya Ushinzwe Ubuhinzi n’Ubworozi Faruk Celik, n’Ambasaderi w’u Rwanda muri icyo gihugu, Williams Nkurunziza. 

Ibihugu byombi bizashyira mu bikorwa ibikubiye muri ayo masezerano y’ubufatanye mu nzego zitandukanye 13 zirimo iterambere ry’uruhererekane nyongeragaciro ku bikomoka ku buhinzi n’ubworozi, inganda ziciriritse zitunganya umusaruro n’ikoranabuhanga mu kuwuhunika.

Ambasade ya Turikiya mu Rwanda yafunguye i Kigali guhera mu kwezi k’Ukuboza 2014, mu gihe iy’u Rwanda yafunguwe i Ankara muri Kanama 2013. 

Ubwo Minisitiri w’Ububanyi n’Amahanga wa Turikiya Mevlüt Çavuşoğlu yasuraga u Rwanda taliki ya 30 n’iya 31 Gicurasi 2016,  na bwo hasinywe amasezerano y’ubutwererane mu nzego zinyuranye. 

Ubucuruzi bukorwa hagati y’u Rwanda na Turikiya bwariyongereye buva ku gaciro ka miliyoni 32,4 z’amadolari y’Amerika mu 2019, bugera kuri miliyoni 81 z’amadolari y’Amerika mu 2020.  

Mu gice cya mbere cy’umwaka wa 2022 ishoramari rya Turikiya ryageze kuri miliyoni 173 z’amadolari y’Amerika yikubye inshuro ebyiri miliyoni 79 z’amadolari y’Amerika yo mu 2021.

Ishoramari rya Turikiya mu Rwanda rirarenga miliyari 400 z’amadolari y’Amerika, ndetse imibare y’Urwego rw’Igihugu rw’Iterambere (RDB) Turikiya yatanze hejuru ya 13% by’ishoramari mpuzamahanga mu Rwanda muri uwo mwaka wa 2020. 

Guhera mu mwaka 1992, Turikiya imaze gutanga buruse zikabakaba 200 ku banyeshuri b’Abanyarwanda.

  • NTAWITONDA JEAN CLAUDE
  • Ugushyingo 22, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE