Abaturage ba Rushaki bakuye isomo ku Rwibutso rwa Jenoside rwa Ntarama

  • NTAWITONDA JEAN CLAUDE
  • Kamena 25, 2023
  • Hashize amezi 11
Image

Abaturage 290 bo mu Murenge wa Rushaki mu Karere ka Gicumbi mu Ntara y’Amajyaruguru, baratangaza ko hari isomo bakuye ku rwibutso rwa Jenoside rwa Ntarama ruherereye mu Karere ka Bugesera mu Ntara y’Iburasirazuba. 

Basuye Urwibutso rwa Jenoside rwa Ntarama ku wa Gatandatu taliki 24 Kamena 2023. 

Ngombwa Evode, umukozi wa Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), yagaragaje ko mu Rwibutso rwa Ntarama haruhukiyemo imibiri isaga 6000. 

Gitimbanyi Christophe wo mu Murenge wa Rushaki mu Kagari ka Gitega yabwiye Imvaho Nshya ko yakuye amasomo ku rwibutso rwa Ntarama.

Avuga ko basobanuriwe icyatumye Jenoside yakorewe Abatutsi ibaho. Ati “Nubwo twari tubizi muri rusange ariko tugeze hano twabonye ukuri kwabayeho, uko abantu bafashe imihoro bakica abandi babaziza ubwoko bwabo”.

Babwiwe ko byose byaturutse kuri politiki mbi yariho icyo gihe hakiyongeraho n’amacakubiri abazungu bari barabibye mu Banyarwanda.

Akomeza agira ati: “Twese uko twaje n’urubyiruko twazanye twiyemeje ko ibyabaye bitazongera ukundi”.

Biyemeje kwigisha abana babo basize mu rugo ndetse n’abandi kandi bakababwiza ukuri k’uko Jenoside yakorewe Abatutsi yabaye kandi Abatutsi bakicwa nabi bazira ubwoko bwabo.

Ndayisenga Emmanuel, umwana wiga mu mwaka wa Kane w’amashuri abanza ku kigo cya Ecole Primaire Karambi giherereye mu Murenge wa Rushaki, yabwiye Imvaho Nshya ko yize ibyabaye kera.

Ati: “Twize ko Jenoside ari umwijima w’ibintu byakozwe biherekejwe n’ingengabitekerezo”.

Avuga ko nagera mu rugo azabwira abo bigana ibibi yabonye byakorewe abana by’umwihariko ku Rwibutso rwa Ntarama kandi ko baziyemeza ko ibyabaye bitazongera kuba.

Sr Vincentia umwe mu bihaye Imana basuye Urwibutso rwa Ntarama, avuga ko ari inshuro ya mbere ageze kuri uru rwibutso ariko ko yasuye urwa Murambi ruherereye mu Karere ka Nyamagabe mu Ntara y’Amajyepfo ndetse n’urwa Cyanika.

Agaragaza ko biteye agahinda guhungira mu Kiliziya ukicirwamo kubera imitima y’abantu yari yabaye iya kinyamaswa.

Ati: “Ntibivuze ko abicwaga Imana itabumvaga. Ibi ntibyagombye kubaho ufite ubuzima. Ntawe ukwiye kumena amaraso ahubwo dukwiye kumva ko twaremwe n’Imana, tukubahana tugahana n’agaciro”.

Avuga ko icyo ahigiye ari ukwigisha abandi urukundo rw’Imana no kugaragaza ko baremwe mu ishusho yayo. 

Ndizihiwe Cyriaque, Umunyamabanga Nshingwabikorwa w’Umurenge wa Rushaki, asobanura ko Rushaki ifite umwihariko wo kuba ahantu hamwe mu hatangiriye urugamba rwo kubohora Igihugu.

Avuga ko ingabo zari iza RPA Inkotanyi zahageze kare kuko ngo zari zifite inshingano zo kurinda Abanyarwanda ndetse no kubarokora mu gihe cya Jenoside yakorewe Abatutsi , ngo byatumye mu Murenge wa Rushaki hatagaragara ingaruka za Jenoside nkuko bigaragara ahandi.

Akomeza agira ati: “Dufite urubyiruko n’abana bacu badafite amakuru ahagije ku mateka ya Jenoside, dutegura uru rugendo turabazana ariko dushyiramo n’ababyeyi.

Ni ukugira ngo abana bacu basobanurirwe amateka ya Jenoside yakorewe Abatutsi bityo na bo basobanurire abandi ndetse bagendere kure uwabazanamo ingengabitekerezo ya Jenoside”.

Avuga ko isomo bahakuye ari uko Jenoside ari mbi kandi ko yahekuye Igihugu bityo bakaba bose bagomba kuyirwanya ntawe usigaye.

Yongeraho ko bagiye gushyiramo imbaraga mu guhangana n’abapfobya ndetse n’abahakana Jenoside cyane cyane bigisha urubyiruko kuko ngo ni yo maboko y’u Rwanda rw’ejo.

Uwamahoro Donatila, Umuyobozi w’Ishami ry’imiyoborere myiza mu Karere ka Gicumbi, agaragaza ko kuba abaturage bo mu Murenge wa Rushaki basuye Urwibutso rwa Ntarama bivuze kwiga, kureba igihe u Rwanda rwanyuzemo cy’icuraburindi, kugereranya ibihe kugira ngo barebe aho bavuye n’aho bageze. 

Avuga ko Imirenge ikora ku mupaka w’u Rwanda na Uganda izakomeza gusura inzibutso za Jenoside mu rwego rwo gukomeza kwiga amateka ya Jenoside yakorewe Abatutsi mu 1994. 

Akomeza agira ati: “Inkotanyi ziza twavuga ko bari mu mutekano uhagije. Muri iriya Mirenge yo ku mupaka dufite gahunda ko buri Murenge ugomba kuza ukagera ku rwibutso kugira ngo bige amateka”.

Ahamya ko ari inshingano z’ubuyobozi gukora ubukangurambaga kugira ngo abo bayoboye bamenye amateka, aho Igihugu cyavuye n’ibyabaye muri Jenoside yakorewe Abatutsi. 

Umuryango Uharanira Inyungu z’abacitse ku icumu (IBUKA) mu Karere ka Gicumbi, utangaza ko kuba abaturage bo mu Murenge wa Rushaki basura Urwibutso rwa Jenoside rwa Ntarama bigaragaza imyumvire yabo uyu munsi.

Kamizikunze Anastase, Perezida w’Umuryango IBUKA mu Karere ka Gicumbi, yagize ati: “Niba abaturage bishyize hamwe kandi ari benshi kuriya twebwe bitugaragariza ko ari imyumvire y’Abanyarwanda, aho bageze batekereza ku buryo umuntu wategura Jenoside tubona bitashoboka mu Gihugu cyacu kubera ko bamaze kugira imyumvire iri hejuru”.

Umuryango IBUKA mu Karere ka Gicumbi ugaragaza ko ingengabitekerezo ya Jenoside iri hasi cyane kuko kuva taliki 07 Mata 2023 kugeza uyu munsi, abagaragaweho ingengabitekerezo ya Jenoside ari babiri ugereranyije n’umwaka wa 1995-1996 habonekaga abasaga 10 mu gihe cy’iminsi 100 yo kwibuka.

  • NTAWITONDA JEAN CLAUDE
  • Kamena 25, 2023
  • Hashize amezi 11
TANGA IGITEKEREZO
Hatanabuzuye Theogene says:
Kamena 26, 2023 at 6:16 pm

Yego rwose byari bikwiye ko tujyago rwose

Andika igitekerezo

AMATEGEKO AGENGA IYANDIKA RY'IGITEKEREZO CYAWE