Abanyeshuri 26 482 batangiye ibizamini ngiro bya Leta

  • NTAWITONDA JEAN CLAUDE
  • Kamena 20, 2023
  • Hashize amezi 11
Image

Kuri uyu wa Mbere taliki ya 19 Kamena 2023, Abanyeshuri 26 482 biga mu mashuri y’imyuga n’ubumenyi ngiro batangiye gukora ibizamini ngiro bya Leta bisoza amashuri yisumbuye, aho barimo kubazwa ibyo bize bakabishyira mu bikorwa.

Ku rwego rw’igihugu, ibyo bizamini byatangijwe n’Umunyamabanga wa Leta muri Minisiteri y’Uburezi ushinzwe Amashuri Abanza n’Ayisumbuye, Twagirayezu Gaspard muri IPRC Kicukiro ndetse no kuri APAER Rusororo aho byatangijwe n’Umunyamabanga wa Leta muri Minisiteri y’Uburezi ushinzwe Ikoranabuhanga, Amashuri y’Imyuga n’Ubumenyi ngiro, Irere Claudette.

Twagirayezu Gaspard yatangaje ko uburyo umubare w’abakobwa bitabira kwiga imyuga uzamuka bishimishije.

 Ati “Icyo twishimira ni uko umubare w’abakobwa ugenda uzamuka mu mashuri ya tekiniki.”

Bamwe mu banyeshurri barimo gukora ibizamini bya Leta bisoza amashuri yisumbuye bavuze ko bakurikije ubumenyi bahawe bizeye gutsinda ndetse bagakomeza no muri kaminuza. Intego akaba ari uko bazigirira akamaro bakakagirira n’igihugu, kuko bazihangira imirimo bakayiha n’abandi.

Guverinoma y’u Rwanda ikomeza gushishikariza by’umwihariko urubyiruko kwiga imyuga ndetse abize ibindi na bo bakaba badahejwe kuba bakwiga imyuga ikiyongera ku bundi bumenyi basanganywe, kuko uwize imyuga aba ashobora kwihangira akazi agaha n’abandi imirimo.

Gahunda y’ibizamini ngiro bya Leta ikaba igamije kuzamura ubumenyi bw’abanyeshuri biga muri ayo mashuri y’imyuga n’ubumenyi ngiro, bityo ibyigwa bigahuzwa n’ibikenewe ku isoko ry’umurimo.

Abanyeshuri biga imyuga n’ubumenyi ngiro batangiye ibizami ngiro bisoza amashuri yisumbuye

Abakora ibizamini bose hamwe ni 26 482, harimo abagabo 14 506 n’abagore 11 976, n’abakandida bigenga 2 106 biyandikishije, bagizwe n’abagabo 944 n’abagore 1 162. Bazakorera mu bigo 183 byatoranyijwe hirya no hino mu gihugu.

Ibyo bizamini byatangiye ku ya 19 Kamena biteganyijwe gusozwa ku italiki ya 30 Kamena 2023.

U Rwanda ruteganya ko mu 2024, abanyeshuri bagera kuri 60% bazaba bakurikirana amasomo y’imyuga n’ubumenyi ngiro.

  • NTAWITONDA JEAN CLAUDE
  • Kamena 20, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE