Abanyarwanda badakoreye hamwe ntaho dushobora kugera- Dr Bizimana

  • NTAWITONDA JEAN CLAUDE
  • Kamena 25, 2023
  • Hashize amezi 11
Image

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yagaragaje agaciro gakomeye k’ubumwe bw’Abanyarwada, aho yemeza ko nta cyo bashobora kugeraho badashyize hamwe.

Yabikomojeho ku wa Gatandatu taliki ya 24 Kamena, ubwo yayoboraga umuhango wo gusoza Itorero ry’Urubyiruko rwiga mu mashuri makuru na kaminuza zitandukanye, rwitabiriye icyiciro cya Kane cy’Itorero Intagamburuzwa.

Iki cyiciro cyitabiriwe n’abanyeshuri 202 baturutse mu mashuri makuru na kaminuza bigera kuri 25 byo hirya no hino mu gihugu, bakaba bari bamaze iminsi umunani mu Kigo cy’Ubutore cya Nkumba giherereye mu Karere ka Burera.

Minisitiri Dr. Bizimana yagaragarije urwo rubyiruko ingingo eshatu zarufasha kugera ku ntego z’iterambere rirambye ari zo kuba umwe, kureba kure no guhitamo ibibakwiye.

Avuga ku bumwe, yagaragaje ko ari ngombwa kandi ari ingenzi cyane ndetse ashimangira ko butangirira mu miryango, aho abantu bari, bukabona kuba ubw’Igihugu.

Ati: “Abanyarwanda badakoreye hamwe ntaho dushobora kugera. Kandi buriya ubumwe butangirira mu rugo, ku Mudugudu, mu ishuri, ntabwo ubumwe ari ubw’Igihugu gusa. Butangirira aho muri, ni yo mpamvu ririya Torero mwemeye gutangiza muri kaminuza mugomba kurikora mushyize hamwe.”

Ku birebana no kureba kure, Minisitiri Dr. Bizimana yasabye Intagamburuzwa kumenya gusesengura bakamenya kuvangura ibishimwa mu bigawa, bibanda ku byo bakeneye byabafasha kugera ku iterambere haba mu byo babona mu gihugu ndetse n’ibyo bashobora kwiga mu mahanga.

Ati: “Imico y’ahandi habamo imico myiza ariko habamo n’ingeso mbi. Ingeso mbi ntituzige ariko tukareba imico yo hanze yadufasha ijyanye n’amahitamo yacu nk’Abanyarwanda. Igihugu kigira ibyo gikenera bijyanye n’imiterere yacyo, bijyanye n’umuco wacyo, bijyanye n’amateka yacyo.”

Iri Itorero rikorwa kuva mu mwaka wa 2014, aho mu byiciro bitatu byabanjirije icya kane cyasoje ku wa Gatandatu hamaze gutozwa Intore z’Intagamburuzwa 2728. Bivuze ko bose hamwe bamaze kuba 2930.

Iri torero ry’Intagamburuzwa ryaherukaga kuba mu mwaka wa 2016, Minisiteri y’Ubumwe bw’Abanyarwanda n’Inshingano Mboneragihugu ikaba ivuga ko habayemo icyuho ariko kitari kirekire k’uko hari ibindi by’iciro mu mashuri makuru na kaminuza byagiye bitozwa mu bihe bitandukanye.

Intagamburuzwa ziyemeje guharanira no gusigasira ubumwe bw’Abanyarwanda, barwanya Jenoside n’ingengabitekerezo yayo. Biyemeje kandi kubaka Itorero rikora neza mu mashuri bigamo.

Intagamburuzwa zifatanyije n’abaturage b’Umurenge wa Kinoni mu Karere ka Burera mu muganda usoza ukwezi kwa 6, aho bafashije kubumba amatafari azubaka inzu izatuzwamo imiryango ine ikeneye icumbi, batanga n’inkunga y’amafaranga yo kugura amabati.

  • NTAWITONDA JEAN CLAUDE
  • Kamena 25, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE