Abana basaga miliyoni ebyiri bagiye gukingirwa COVID-19 mu Rwanda

  • NTAWITONDA JEAN CLAUDE
  • Nzeri 21, 2022
  • Hashize imyaka 2
Image

Leta y’u Rwanda yatangiye gahunda yo gukingira icyorezo cya COVID-19 abana bari hagati y’imyaka itanu na 11 aho biteganyijwe ko abasaga miliyoni ebyiri bazagerwaho n’ayo mahirwe mu Gihugu hose. 

Gahunda yo gutangira gutanga izo nkingo mu gihugu hose yatangijwe ku mugaragaro ku wa Kabiri taliki ya 20 Nzeri 2022. 

Umunyamabanga wa Leta muri Minisiteri y’Ubuzima ushinzwe ubuvuzi bw’ibanze Dr Mpunga Tharcisse, yavuze ko Leta yatangiye gutanga urukingo rwa COVID-19 rwakorewe abana bato rwo mu bwoko bwa Pfizer, nyuma yo kwemezwa n’Ikigo cy’Igihugu gishinzwe ubugenzuzi bw’imiti n’ibiribwa (Rwanda FDA) ko rwizewe.

Ishami ry’Umuryango w’Abibumbye ryita ku Buzima (OMS) na ryo ryamaze kwemeza urwo rukingo kugira ngo rukoreshwe mu bihe bidasanzwe. 

Uru rukingo rwo rufite umwihariko wo kuba rutangwa inshuro ebyiri hagati y’ibyumweru biri hagati na bine n’umunani, mu gihe urwa Pfizer rw’abakuru rushobora gutangwa mu ntera y’ibyumweru bibiri. 

Dr. Mpunga yagize ati: “Gukingira abana COVID-19 byatangiye gukorwa kare no mu bindi bihugu. Ikigenderewe ni ukurinda sosiyete ngari ingaruka za COVID-19 hagabanywa ibyuho biri mu budahangarwa dusangiye mu baturage.”

Yakomeje avuga ko gukingira abana bari hagati y’imyaka 5 na 11 bigabanya ikwirakwizwa rya virusi mu baturage kandi bigakumira inkubiri y’ubwandu mu bantu bafite amagara mazima n’abandi bafite ibyago byo kuzahazwa n’iki cyorezo barimo ababyeyi batwite, abafite indwara zidakira n’izitandura, n’abageze mu zabukuru. 

Yakomeje ashimangira ko nubwo umubare w’abana bakiri bato banduye COVID-19 n’abo yahitanye ukiri hasi, ababyeyi bashishikarizwa gukingiza abana bari hagati y’imyaka 5-11 kugira ngo birinde ko ubwandu bw’abo bana bwagira ingaruka ku bagize umuryango babamo na bo ubwabo nubwo biri ku kigero cyo hasi.

Yavuze ko mbere yo gukingira umwana hari inyandiko yabugenewe ababyeyi bari kubanza gusinya kugira ngo bikorwe mu nzira ziboneye habayeho n’ubwumvikane bw’inzego z’ubuzima n’abahagarariye umwana utarageza igihe cyo kwihitiramo nk’uko bisanzwe bikorwa ku byemezo by’ubuvuzi bukorerwa umwana. 

Imibare itangazwa n’Ikigo cy’Igihugu cy’Ubuzima (RBC) yerekana ko kugeza ku ya 18 Nzeri, imibare y’abanduye COVID-19 kuva yaduka mu Rwanda bamaze kurenga ibihumbi 132.4  barimo abana bari hagati y’imyaka itanu na 11 babarirwa mu 4,358 bangana n 3.3%. 

Biteganyijwe kogahunda yo gukingira abana izakorerwa ahanini ku mashuri, Minisiteri y’Ubuzima ikaba irimo gukorana n’ibigo bitandukanye by’amashuri mu guharanira ko abana bashyikiriza ababyeyi babo cyangwa abandi babarera inyandiko zibemerera gukingirwa, bakazisinya mbere yo kuzibasubiza ngo bazigeze ku ishuri cyangwa ku yindi santeri yose y’ikingira. 

Hagati aho abamaze guhabwa inkungo za COVID-19 mu Rwanda muri rusange, bamaze kurenga miliyoni 9.1 aho miliyoni 8.9 bahawe doze ebyiri na ho abakabakaba ibihumbi 317 bakaba bamaze guhabwa doze ya 3. 

  • NTAWITONDA JEAN CLAUDE
  • Nzeri 21, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE